I ASAPULO 12 - Embimbiliya - Bíblia Sagrada em Umbundu

¹ Omanu va enda ku Daviti, ko Cikilage, eci a kala handi loku vundaila Saulu, omõla a Kisi, haivo vamue povalume vakuotoi, vana vo kuatisa kovita, vava:

² Va maleha olohonji, kuenda va tela oku imba ovawe loku asa isongo ndaño londio, ndaño lepĩli.

³ Usongui wavo Ahiyesere, la Yowasi, omãla va Sema u Givea; kuenda Yisiyele la Pelete omãla va Asimawete; kuenda Beraka la Yehu, u Anatote;

⁴ kuenda Yisimaya, u Giveone, ukuotoi pokati ka vana, akui atatu, haeye usongui wova; kuenda Yeremiya la Yahasiele la Yohanana la Yosavada, u Gedera;

⁵ kuenda Elusai la Yerimote la Bialiya, la Semariya la Sefatiya, u Harufi;

⁶ kuenda Elikana la Yisiya la Asariele la Yoesere la Yasioveama, va Korihi;

⁷ kuenda Yoela la Sevadiya, omãla va Yerohama ko Gedore.

⁸ Ko va Gadi kua tepa alume vakuotoi, yu va enda ku Daviti, kombonge yovekalasoko. Ovo va loñoloha kovita, va maleha ociyepelo lonjelia. Ovipala viavo ndevi violohosi, olupesi luavo ndolu luolombambi viokolomunda.

⁹ Usongui wavo, Esere; wavali Ovadiya, watatu Eliava;

¹⁰ wakuala Misimana, watãlo Yeremiya;

¹¹ wepandu Atai, wepanduvali Eliele,

¹² wecelala Yohanana, wecea Elisavade,

¹³ wekui Yeremiya, wekui lamosi Makibanai.

¹⁴ Ovo vosi va Gadi, haivo vakesongo liovita. U o sule pokati kavo o tela oku liyaka locita covanyali. U wa velapo, o tela oku liyaka lohũlũkãi.

¹⁵ Ava ovo va yoka olui Yordão kosãi yatete, cina ovava aluo a samohaila sinya lilo la sinyolio, kuenje omanu vosi va tunga vovimbota viaco, va va lupuisila kutundilo lo kutakelo.

¹⁶ Ku Daviti, kombonge yaye, kueyavo vamue po va Benjamini la Yuda.

¹⁷ Oco Daviti wa tunda ha ñualẽhẽla lavo, yu wa popia lavo, hati, Nda weyi lombembua kokuange, ha vu ñuatisa, oco utima wange u linala lene. Puãi nda weyilili oku makula kovanyali vange, ndaño sia lingile cĩvĩ, oco Suku yolosekulu vietu a ci mole kuenda a ci lemele!

¹⁸ Oco Espiritu lia wila Amasai usongui wa vakesongo, yu wa popia hati, Tumanu vove, a Daviti, tu tiamẽla kokuove, amõla a Jese. Ombembua, ocili ombembua yi kale love! Ombembua yi kale lava va ku kuatisa, momo Suku yove o ku kuatisa. Oco Daviti wa va tambula, kuenje wa va lingisa vakesongo liolohoka.

¹⁹ Ko va Manase kua tundavo vamue, yu veya ku Daviti, cina a likongela la va Filisiti oku yaka la Saulu. Haimo lumue ka va kuatisile va Filisiti, momo olombuale via va Filisiti va lilungula pokati, vati, Sanga o ka tiamẽla konele ya cime caye Saulu, kuenje etu tu fa. Yu vo tiuwiya.

²⁰ Eci a tiukila ko Cikilage, va Manase veya kokuaye, vava: Adina la Yosavada la Yediyaele la Mingeli la Yosavada la Elihu kuenda Cilitai, vakesongo liolohũlũkãi via Manase.

²¹ Ovo va kuatisa Daviti oku yula ovingumba, momo vosi alume va pama vakuotoi haivo vakesongo liolohoka.

²² Kuenda eteke keteke ku Daviti kua likongiliyila omanu oku u kuatisa, toke va linga olohoka vinene, ndolohoka via Suku.

²³ Alume va malehela ovita, vana veya ku Daviti ko Hevirone, ha va tiamisa kokuaye usoma wa Saulu, ndondaka ya Yehova, va tendiwa ndomo:

²⁴ Va Yuda, vambata ociyepelo lonjelia, va soka olohũlũkãi epandu lovita ecelala kalume va malehela ovita.

²⁵ Po va Simeone, olohũlũkãi epanduvali locita calume va pama haivo vakuotoi kovita.

²⁶ Po va Lewi, olohũlũkãi vikuãla lovita epandu kalume.

²⁷ Yehoyada eye usongui wa va Arone, kuenda kumue laye kua kala olohũlũkãi vitatu lovita epanduvali kalume.

²⁸ Kuenda Sadoke, umalehe wa pama ukuotoi kumue lavakesongo akui avali la vavali, vakuepata lia isiaye.

²⁹ Po va Benjamini, vangandi a Saulu, olohũlũkãi vitatu, momo toke opo valua pokati kavo va lamelela kepata lia Saulu.

³⁰ Po va Efarimi, olohũlũkãi akui avali lovita ecelala kalume va pama vakuotõi, haivo va kemãla vapata avo.

³¹ Ponepa yepata lia va Manase, olohũlũkãi ekui lecelãla kalume va tukuiwa kolonduko ha va endi oku vialeka Daviti.

³² Po va Isakare, vakuokulihiso wolotembo ha va limbuka evi Isareli a sesamela oku vi linga pa kala ovita vivali kasongui, kuenda vosi vakuepata liavo va va imbila atui.

³³ Po va Sevulono, olohũlũkãi akuĩ atãlo kalume va tela oku yaka, va maleha ovimaleho viosi viovita, haivo va liangiliyila oku yaka lutima wosi.

³⁴ Po va Nafitali, ohũlũkãi ya vakesongo, kuenda kumue lavo kua kala olohũlũkãi akuĩ atatu lepanduvali kalume vambata ociyepelo lonjelia.

³⁵ Po va Dani, olohũlũkãi akuĩ avali lecelala lovita epandu kalume va malehela ovita.

³⁶ Po va Asiere, olohũlũkãi akuĩ akuãla, va tela oku enda kovita, haivo va liangiliyila oku yaka.

³⁷ Kesinya lia Yordão po va Ruvene lo po va Gadi lo ponepa yepata lia va Manase, pa tunda ocita lakuĩ avali kolohũlũkãi vialume va maleha ovimaleho viñi viñi viovita.

³⁸ Ovo vosi, alume vakuavita, haivo va liangiliyila oku yaka. Veya ko Hevirone lutima wa sunguluka ha va vialeka Daviti kofeka yosi ya Isareli. Va Isareli vakuavo vosi va kalavo lutima umuamue ha va vialeka Daviti.

³⁹ Yu va kalako la Daviti oloneke vitatu loku lia loku nyua, momo vakuavo va va angiliyilile ovilia.

⁴⁰ Kuenda ava va lisungue lavo, ndaño muẽle kIsakare loko Sevulono loko Nafitali, vosi va nena okulia kovimbulu kuenda kolongamelo lokolomula lokolongombe. Va nena osema lolombolo viakuyu, layuva, lovinyu lulela, kuenda olongombe lolomeme vialua, momo kua kala esanju kIsareli.