I ASAPULO 11 - Embimbiliya - Bíblia Sagrada em Umbundu

¹ Oco Isareli yosi ya liongoluila ku Daviti ko Hevirone. Va popia vati, Yala, tuakepa ove, tusitu yove.

² Konyima, eci Saulu a kala Soma, ove, ove wa songowaila Isareli nda poku tunda nda poku iñila. Kuenje Yehova wa popia love hati, Ove o linga ungombo womanu vange va Isareli, o lingavo Soma yomanu vange va Isareli.

³ Oco akulu vosi va Isareli veya ku Soma ko Hevirone, kuenje Daviti wa lisila lavo kovaso a Yehova vo Hevirone. Yu va waveka Daviti ha lingi Soma ya va Isareli, ndondaka ya Yehova ya popele Samuele.

⁴ Daviti la Isareli yosi va enda ko Yerusalãi, haiyo Yevusi, kuna kua kala va Yevusi vakuafeka yaco.

⁵ Olonungi via Yevusi via popia la Daviti viti, Mulo ku iñilamo. Haimo lumue Daviti wa kuata ocikolo ca Siono haico imbo lia Daviti.

⁶ Daviti hati, Wosi o yula tete va Yevusi, o linga usongui haeye kesongo. Oco Yoava, omõla a Ceruya, eye wa katukilako tete oco wa linga usongui.

⁷ Daviti wa tumãla vocikolo, oco ca lukiwila citi, Imbo lia Daviti.

⁸ Wa tunga imbo kolonele viaco, ndokuti Milo ya kala vokati kalio. Kuenda Yoava wa tumbulula kolonele vikuavo vimbo.

⁹ Daviti wamamako kunene, momo Yehova yolohoka wa kala laye.

¹⁰ Asongui valume va pama va Daviti, vana va velapo kutõi haivo vo kuatisa loku pamisa calua uviali waye, kumue la Isareli yosi, loku u vialeka ha lingi Soma, ndondaka Yehova a popelele Isareli, vava:

¹¹ Alume va pama va Daviti, haivo vakuotoi, va tendiwa ndomo: Yasioveama, u Hakimoni, eye tete ku vatatu vaco. Wa kuata konjelia yaye kuenje wa ipaya ovita vitatu vialume eteke liongongo.

¹² Wavali povalume vaco vatatu va pama, vakuotõi, eye Eleasara, omõla a Dodo u Ahoha.

¹³ Eye wa kala la Daviti ko Pasidamimi, eci va Filistii vongolokeleleko ocilunga. Kua kala epia lie yuka osevata, kuenda omanu va tila va Filisiti.

¹⁴ Ovo puãi va talama pokati kepia, va li yakela, va ipaya va Filisiti, kuenje Yehova wa va popela leyulo linene.

¹⁵ Pokati kakui atatu ka vakesongo pa tunda vatatu, vaile ku Daviti kocikolo, veleva lia Adulama. Vocimbota ca Refaimi mua kala ocilombo colohoka via va Filisiti.

¹⁶ Daviti wa kala vocikolo, kuenda ocitundo ca va Filisiti ca kala ko Beteleme.

¹⁷ Daviti wa livela hati, Nda ca tavele umue oku nyuisako ovava a tunda ko Beteleme, vocisimo ci kasi kombundi!

¹⁸ Oco alume vaco vatatu va papuila vocilombo ca va Filisiti. Va tapa ovava vocisimo ca kala kombundi ya Beteleme. Va a ambata, yu va a nena ku Daviti. Puãi Daviti ka tavele oku a nyua, wa a pesela kovaso a Yehova,

¹⁹ hati, Suku yange a ndave, si ka ci linge. Ndi nyua nga osonde yomanu ava va kuatele ovimuenyo viavo peka? Momo poku nena ovava, va kuatele ovimuenyo viavo peka. Oco ka tavele oku a nyua. Ovina evi ovio via lingile alume vana vatatu, va pama vakuotoi.

²⁰ Avisiai, manja a Yoava, eye usongui wakuĩ atatu. Wa kuata konjelia yaye kuenje wa ipaya ovita vitatu kalume. Wa si oku lisoka la vatatu vaco.

²¹ Pokati kakui atatu eye wa linga usongui. Vovatatu vaco puãi ka pitililemo, ka lisokele lavo.

²² Benaya u Kavasele, omõla a Yehoyada, onoi haeye ukuavilinga via kemãla. Wa ipaya ovindululu vivali via Moavi. Wa ipayavo ohosi ya kala vocitunu cimue. Eteke liaco kua lokele neve.

²³ Wa ipayavo u Egito umue, ulume wa lepa calua, wa soka olometru vivali lomeyu. U Egito waco wa kala lonjelia peka nduti womakina yoku tuta olonanga. Benaya wo tundila lohunya peka. Wa nyeha onjelia peka liu Egito kuenje wa wipaya lonjelia yaye muẽle.

²⁴ Ovio ovina via linga Benaya omõla a Yehoyada. Wa si oku lisoka la vatatu vaco.

²⁵ Voku lisoka lakuĩ atatu wa pitilamo, puãi voku lisoka la vatatu ka pitililemo. Daviti wo nola ha lingi usongui wasualali vaye velombe.

²⁶ Alume va pama vakuotoi vakualohoka vava: Asahele, manja a Yoava; Elihanana, omõla a Dodo u Beteleme;

²⁷ Siamote u Haroda; Helesi u Peloni;

²⁸ Ira omõla a Yikesi u Tekoa; Aviesere u Anatote;

²⁹ Sibekai u Husiati; Ilai u Ahoha;

³⁰ Maharai u Netofa; Helede omõla a Bahana u Netofa;

³¹ Itai omõla a Rivai u Givea ya va Benjamini; Benaya u Piratoni;

³² Hurai wokotundui tua Gayasi; Aviyele u Aravati;

³³ Asamaveti u Baharumi; Eliava u Sialavoni;

³⁴ Hasieme u Gisoni; Yonatão omõla a Siage u Harari;

³⁵ Ahiyama omõla a Sakare u Harari; Elifale omõla a Uri;

³⁶ Hefere u Mekerati; Ahiya u Peloni;

³⁷ Hesero u Karimele; Naarai omõla a Esivai;

³⁸ Yoele manja a Natana; Mivihare omõla a Hagiri;

³⁹ Seleki u Amoni; Naharai u Berote, ukuakuambatela Yoava omõla a Ceruya ovimaleho;

⁴⁰ Ira u Itiri; Gareve u Itiri;

⁴¹ Uriya u Hiti; Savada omõla a Ahilai;

⁴² Adina omõla a Sisa u Ruvene, usongui umue wa va Ruvene, wa kala lakui atatu komanu;

⁴³ Hanana omõla a Maaka, la Yosafata u Mitini;

⁴⁴ Usiya u Asiterate; Siama la Yeyele omãla va Hotama u Aroere;

⁴⁵ Yediyaele omõla a Simiri la manjaye Yoha, u Tisi;

⁴⁶ Eliele u Mahava la Yerivai la Yosiaviya omãla va Elinama, la Yitima u Moavi;

⁴⁷ Eliele la Ovede la Yaasiyele u Mesova.