I ASAPULO 10 - Embimbiliya - Bíblia Sagrada em Umbundu

¹ Va Filisiti va kala loku yaka la va Isareli. Alume va Isareli va tila va Filisiti. Va kupukila vomunda ya Giliboa olongambu.

² Va Filisiti va landula Saulu lomãla vaye kuenje va va sanga. Va Filisiti va ipaya Yonatão la Avindaava la Malikisua, omãla va Saulu.

³ Ocilunga caco ca sakalaisa enene Saulu. Vakuolohonji vo sanga kuenje eye wa lemehiwa la vakualohonji.

⁴ Oco Saulu wa sapuila ukuenje ukuakuambata ovimaleho viaye hati, Somola osipata yove, nome layo sanga oviyamba viaco viya, vi noma ha vi ndalula. Ukuenje puãi ka tavele momo wa kala lusumba walua. Oco Saulu wa kuata osipata yaye eye muẽle, kuenje wa litoma.

⁵ Eci ukuenje ukuavimaleho a mola okuti Saulu wa fa, oco leyevo wa litomavo losipata yaye kuenje wa fa.

⁶ Oco Saulu wa fa. Eye lomãla vaye vatatu lepata liaye liosi, vosi muẽle va fila pamosi.

⁷ Alume vosi va Isareli vana va kaile vocimbota, eci va limbuka okuti va tila kuenda Saulu lomãla vaye va fa, oco va tunda vovaimbo avo kuenje va tila. Va Filisiti veya, yu va piñalamo.

⁸ Hela liaco, eci va Filisiti veya oku sũlula ava va fa, oco va sanga Saulu lomãla vaye va fila vomunda ya Giliboa.

⁹ Vo sulula, kuenje va tambula utue waye lovimaleho viaye. Va tuma olomunga kuosi vofeka ya va Filisiti oku sapula oluiya luaco luwa koviteka viavo lokomanu vavo.

¹⁰ Va kapa ovimaleho via Saulu vonembele yolosuku viavo. Va valela utue waye vonembele ya Dagoni.

¹¹ Puãi eci imbo liosi lia Yavesi Gileada lia yeva cosi va Filisiti va linga la Saulu,

¹² oco alume vosi va pama va katuka, vopa ocivimbi ca Saulu lovivimbi viomãla vaye. Veya lavio ko Yavesi, yu va kenda akepa avo vemi liulemba woko Yavesi, kuenje va likandangiya okulia oloneke epanduvali.

¹³ Oco Saulu wa fila ongole yaye yina a lueyela Yehova, momo ka pokuile kondaka ya Yehova, kuenda vo omo a ka tahele kukualondele oku sanda esituluko,

¹⁴ kuenje ka sandele esituluko ku Yehova. Oco Yehova wa wipa, kuenje usoma wo tiamisa ku Daviti omõla a Jese.