ISAYA 9 - Embimbiliya - Bíblia Sagrada em Umbundu

¹ Puãi ka ku kala owelema ku wa kaile lelamba. Ale eye wa sepuisile ofeka ya Sevulono lofeka ya Nafitali, puãi noke o kemãlĩsa ofeka yokonẽle yokalunga, haiyo yi kasi kesinya lia Yordão, yokuti Galilea yolofeka.

² Omanu va endelele vowelema va mõla ocinyi ca piãla, ava va kaile vofeka yulembo wokufa ocinyi ca va tuila.

³ Ove wa luisa omanu, haive wa luisa esanju liavo. Va ku sanjukila ndeci va sanjukila oku ungula, pamue ndeci alume va sanjukila oku liamuila evi via pundiwa.

⁴ Momo okanga yocitele caye, kuenda osikeyi yopocitãi, loluhava luohangisi, wa vi teya ndeci keteke lia Midiani.

⁵ Momo olosapato viosi via waliwa lasualali va enda kocilunga, kuenda uwalo wosi wa wungiwa vosonde, cosi ci timĩhĩwa ndolohui vondalu.

⁶ Momo omõla wa tu citilua, omõla ulume wa tu ĩhĩwa, kuenje uviali u kala kovitãi viaye. Onduko yaye, o tukuiwa Cikomo, Ndunguli, Suku Eye Fũ, Isia kapui, Soma yombembua.

⁷ Okuamamako kuviali waye loku kuombembua ka ku fulila, kocalo ca Daviti kuenda kusoma waye, oku u kolisa kuenda oku u kuatisa lesunguluko kuenda esunga, tunde cilo toke otembo ka yi pui. Ombili ya Yehova Ukualohoka yi ci linga

⁸ Suku wa tuma ondaka yoku pisa Yakoba haiyo yi veta Isareli.

⁹ Kuenje omanu vosi va ci kũliha; ndeci Efarimi kuenda olonungi viovo Samaria, haivo va popia lepela loku lituna vutima vati,

¹⁰ Olondopi via kupuka puãi etu tu tunga lovawe a songiwa; ovilemba via timbuiwa, puãi tu tuikako oviti violo-cedro.

¹¹ Oci Yehova o va katuila olonjaki kuenje o tuñunya ovanyãli vavo.

¹² Kutundilo va Suria, kutakelo va Filisiti, kuenje va lia Isareli lomẽla wasama. Haimo onyeño yaye ka ya imũhĩle, puãi eka liaye lopo liõlõha.

¹³ Haimo omanu ka va pongolokelele ku wa va veta, ka va vanjiliyile Yehova Ukualohoka.

¹⁴ Oco Yehova wa teta Isareli utue kuenda ucĩla; okuti olunavi kuenda olunelenge eteke liongongo.

¹⁵ Sekulu wa kemãla eye utue waco; uprofeto o longisa uhembi eye ucĩla

¹⁶ Momo ava va songuila omanu ovo va va lueyisa; ava va songuiwa lavo va nyõlẽha.

¹⁷ Oco Ñala ka sanjukila ipombokuenje viavo, ndaño olosiwe viavo kuenda ovimbumba viavo ka vi kuetele ohenda; momo vosi va likala Suku, haivo vakuevĩho. Omẽla wosi u popia popia esanda. Haimo onyeño yaye ka ya imũhĩle kuenje eka liaye lopo liõlõha.

¹⁸ Momo evĩho li taima ndondalu, yi lia olosanyanya kuenda olosongo; yi timĩha ovisaki kuenje vi tumũha avonge owisi.

¹⁹ Ofeka yi pia lonyeño ya Yehova Ukualohoka; omanu vaco va linga ndolohui viondalu, lomue o tava oku popela ndaño manjaye.

²⁰ Va kalula kondio puãi haimo va kasilili lonjala. Va punda kepĩli, puãi ka ve kuta; vosi omunu omunu o lia ositu yokuokuo ku o lisungue laye.

²¹ Manase o lia Efarimi kuenda Efarimi o lia Manase; kavali kavo va katukila Yuda. Haimo onyeño yaye ka ya imũhĩle, kuenje eka liaye lopo liõlõha.