ISAYA 8 - Embimbiliya - Bíblia Sagrada em Umbundu

¹ Kuenje Yehova wa popia lame hati, Yelula evaya linene, sonẽhãmo lovisonẽhũa via lomboloka, huti, Okupundandopo-cakuatiwaceci.

² Oco nda kovonga ocitunda Uriya, la Sakariya omõla a Yeverekiya, ha va njimbila uvangi omo ovo olombangi via kolelua.

³ Nda ile kuprofeto ukãi kuenje wa mina, yu wa cita omõla ulume. Oco Yehova wa popia lame hati, U luka huti, Okupundandopo-cakuatiwaceci,

⁴ momo osimbu omõla ka tẽla oku popia hati, A tate, pamue a mãi, oco ovikuata via Damasko lolohuate via Samaria vi tualiwa ku Soma ya Asuria.

⁵ Yehova wa popia vali lame hati,

⁶ Omo omanu ava va likala ovava a tulumũha a Siloa, kuenje va yolela Recini lomõla a Remaliya,

⁷ oco Ñala o va nenẽla ovava Olui, a kuete ongusu kuenda a lua, okuti osoma ya Asuria lulamba waye wosi; lu tunda volonjila vialuo viosi, lu supokaila kovingẽingẽi vialuo viosi,

⁸ kuenje lu enda ño toke lu pitila vo Yuda; lu supoka kuenda lu pita ño, lu pitila toke posingo, kuenje oku tanda kuavava aluo ku yukisa unene wosi wofeka yove, a Emanuele.

⁹ Lunguki loku yokoka, ene alofeka, kuluili atũi, ene alofeka viosi vi kasi kupãla. Mãlẽhi, kuenje vu yokoka. Mãlehi, kuenje vu yokoka.

¹⁰ Tumbiki ño ongombo puãi ka yi lingi cimue; popi ño ondaka, puãi ka yi koli, momo Suku o kasi kumue letu.

¹¹ Momo Yehova wa ñapa eka liaye kuenje wa popia lame, wa ndongisa okuti si endela vonjila yomanu ava, hati,

¹² Ku ka tukule huti, Ongombo, ovina viosi via tukula omanu ava vati, Ongombo. Ku ka kuatele usumba cosi ovo va kuatela usumba, ndaño oku ci yokokela.

¹³ Puãi Yehova Ukualohoka, eye o u limbuka okuti o kola, eye a linge usumba wove, kuenda a linge okuyokoka kuove.

¹⁴ Kuenje eye o linga ocitumãlo ci kola, o lingavo ewe liocilondokua, haeye ewe lietatamiso kolonjo viaco vivali via Isareli, haeye onjanjo kuenda ulivi ku va Yerusalãi.

¹⁵ Kuenje va lua va lilondokamo, va kupuka, kuenje va teka, poku fa vonjanjo va kuatiwa.

¹⁶ Ñuta uvangi, sitikila ovilongua viange kolondonge viange.

¹⁷ Njimba ovaso ku Yehova u o kasi loku wundisila ocipala caye onjo ya Yakoba. Elavoko liange li kala kokuaye.

¹⁸ Ota, ame lomãla Yehova a nyĩha vo Isareli, etu tulondimbukiso haetu tuvindekaise via Yehova Ukualohoka u o kasi vomunda ya Siono.

¹⁹ Eci va popia love vati, Pula vakuakutãha kuenda vanalunja va cacacacaca loku ñuñula, ove o pula huti, Ka ca velelepo omanu oku pula Suku yavo muẽle? Ci silivila nye oku pula vakualufa ovina viava va kasi lomuenyo?

²⁰ Kolela ovilongua kuenda uvangi! Ongula ka yi cila ondaka eyi va popia.

²¹ Va ñuala ñuala vofeka longongo lonjala. Eci va kasi lonjala va tema calua kuenje va siñala Soma yavo kuenda Suku yavo. Va vanja kilu,

²² va vanja posi, puãi va mõla lika ohali lowelema kuenda oku tekãvĩsua lelamba. Va hangisiwilua vowelema wosito.