ISAYA 7 - Embimbiliya - Bíblia Sagrada em Umbundu

¹ Voloneke via Ahasi omõla a Yotama, omõla a Usiya Soma ya Yuda, Recini, Soma ya Suria, kumue la Peka, omõla a Remaliya Soma ya Isareli, va ile ko Yerusalãi oku yaka lalio, puãi ka va tẽlẽle oku li yula.

² Eci ca sapuiwila vonjo ya Daviti hati, Suria ya litokeka le Efarimi, oco utima waye lovitima viomanu vaye via luluma ndeci oviti viesisi vi lituñunya lofela.

³ Oco Yehova wa popia la Isaya hati, Kuende, ka tokekele la Ahasi, ove kuenda omõlõve Siara-Yasiuvu. Tokekeli laye kesulilo liolekua yocisimo cokonano yi kasi kelila liokocinyãlẽho colonanga.

⁴ Ka popie laye huti, Lavulula, tula utima, ku ka kuate usumba, utima wove ka u ka yokokele ovisingi evi vivali vi kasi loku tukuta owisi, ka u ka yokokele muẽle onyeño ya kãla ya Recini leyi ya Suria, leyi yomõla a Remaliya.

⁵ Omo Suria kumosi la Efarimi kuenda omõla a Remaliya va ku tumbila ehãla lioku ku linga lãvi, vati,

⁶ Tu katukili ofeka ya Yuda, tu yiyokokisi, tu yi yuli ha yi lingi yetu, ha tu vialekamo omõla a Tavele.

⁷ Oco Ñala Yehova wa popia hati, Ka ci tava, ka ci lingiwa.

⁸ Momo utue wa Suria, Damasko kuenda utue wa Damasko, Recini. Osimbu akũi epandu kanyamo kanyamo atãlo ka a puile oco Efarimi yi nyõlẽha kuenje ka yi lingi vali ofeka.

⁹ Utue we Efarimi, Samária, kuenda utue wa Samária, omõla a Remaliya. Nda ko ci kolela ocili ko kolipo.

¹⁰ Yehova wa popia vali la Ahasi hati,

¹¹ Pinga ku Yehova Suku yove ondimbukiso; yi longe ndonjembo, pamue yi lepe ndokovailu.

¹² Puãi Ahasi hati, Ame si pingi, ndaño oku nyika Yehova si ci lingi.

¹³ Kuenje eye hati, Kaliye njeveleli, anjo ya Daviti: oku kavisa omanu cu lingila citito, okuti vu kavisavo Suku yange.

¹⁴ Oco Ñala eye muẽle u wĩha ondimbukiso. Ota, ufeko o mina, o cita omõla ulume kuenje u luka Emanuele.

¹⁵ O lia lia ongundi kuenda owiki eci a kulĩha oku yuvula cĩvi loku nõla ciwa.

¹⁶ Momo osimbu omõla ka kulĩhĩle oku yuvula cĩvi loku nõla ciwa, ofeka yaco, olosoma viayo vivali wa vi suvuki, yi yandulukiwa.

¹⁷ Yehova o ku nenẽla oloneke ka via leya tunde keteke Efarimi lia litepa la Yuda, ove lomanu vove kuenda onjo ya so o vu nenẽla osoma ya Asuria.

¹⁸ Eteke liaco Yehova o sikila ovilua olunyi lu kasi kolono violondui ve Egito, kuenda olunyĩhi lu kasi vofeka ya Asuria.

¹⁹ Oco viya viosi, vi tumãla viosi vakungu a longa kuenda vovilala viovawe lo kalumbo olosongo kuenda vovililo viosi.

²⁰ Eteke liaco Ñala o pemũla lomoko yomuto yondiliwa kesinya li Olui,— oyo osoma ya Asuria; o puta tunde kutue toke koluvei luokolomãi, yi pemũlãvo olonjele.

²¹ Eteke liaco omunu o fuka onjindi yongombe kuenda olomeme vivali.

²² Oco, omo vi tunda asenjele a lua, oco o lia lia ongundi, momo wosi wa siala vofeka o lia lia ongundi kuenda owiki.

²³ Eteke liaco kuõha kua kaile ohulũkãi yoviti viayuva via soka lohulũkãi yolosiekele viopalata, ku kala olosanyanya kuenda olosongo.

²⁴ Omanu veyako vambata ohonji lovisongo momo ofeka yosi yi yunda yunda olosanyanya kuenda olosongo.

²⁵ Kovivulu kuosi kua limawaile latemo ku pitiko mekonda liusumba wolosanyanya kuenda olosongo; puãi ku linga ovililo violongombe, kuenda olomeme vi kosa kosako.