ISAYA 66 - Embimbiliya - Bíblia Sagrada em Umbundu

¹ Ca popia Yehova ceci, hati, Ilu ocalo cange, kuenje osi ociliatelo colomãi viange. Onjo ye vu nungila? Ku pi ku linga ocitumãlo cange?

² Ovaka ange a tunga ovina evi viosi, oco ovina evi viosi viange. Oco ca popia Yehova. Puãi omunu mbanja yu wa liketisa, haeye wonjuka vutima, kuenda o lulumĩla ondaka yange.

³ U ipa ongombe wa soka ndu wa ipa omunu; u o lumba omeme wa soka ndu wa teya osingo yombua; u o lumba ocilumba cosema wa soka ndu o lumba osonde yongulu, u o timĩha insensu o linga ndu o sivaya ociteka. Va nõla olonjila viavo muẽle kuenje ovitima viavo via sanjukila evĩho liavo.

⁴ Ame ndi va nolela ohali, ndi va nenela ocinjoko; momo eci nda kovonga lomue wa kumbulula, leci nda popia ka va yevelele; puãi va linga eci cĩvi kokuange kuenje va nõla eci sia sanjukilile.

⁵ Yevi ondaka ya Yehova, ene vu lulumĩla ondaka yaye, yeyi, Vakuẽle ava vo suvuki kuenje vo tundisili onduko yange va popia vati, Yehova a muĩsue ulamba oco tu mole onjolela yene, puãi ovo, ovo va kutisua osõi.

⁶ Yevelela onjuela yi tunda vimbo, ondaka ya tunda vonembele, ondaka ya Yehova yi fetahainya ovanyãli vaye.

⁷ Osimbu ukãi ka yevele olongembia, wa cita; osimbu ka kaile lolongembia viaco, wa cita omõla ulume.

⁸ Helie wa la yeva ocina ndeci? Helie wa la mõla ovina ndevi? Anga ofeka yi citiwa keteke liongongo? Epata li citiwa konjanja? Momo tuli Siono a kala lolongembia haico a cita omãla vaye.

⁹ Ca popia Yehova ceci, hati, Ame nga hu pitilisa keteke lioku cita kuenje si ku citisa? Ame ndukuaku citisa haime sitika imo? Oco ca popia Suku yove.

¹⁰ Yoleli kumue la Yerusalãi, yi sanjukili, ene vosi vu yi sole; yi yoleli lonjolela, ene vosi vu yi lilila;

¹¹ oco vu nyame kavele, kuenje vu kuta elembeleko liaye, oco vu puẽle ho sanjukila elau liulamba waye.

¹² Momo ca popia Yehova ceci, hati, Tala, ndi yi salalisa ndolui, ndi yĩha ulamba wolofeka ndolui lua supoka. Oco vu nyamako, vu pakatiwa, kuenje wangatiwi kolongolo viayo.

¹³ Ndeci umue a lembiwa la inaye haico ndu lembi. Vu lembiwila vo Yerusalãi.

¹⁴ Vu ci mõla, kuenje utima wene u yolela. Akepa ene a yova ndowangu. Ci kulĩhĩwa okuti eka lia Yehova li kasi lakuenje vaye, kuenje wa temẽla ovanyalĩ vaye.

¹⁵ Momo tala, Yehova iya londalu, akãlu aye ovita eya ndocipepe o lekisa onyeño yaye pokati kokutokotelua loku lekisa episo liaye pokati kovilienge viondalu.

¹⁶ Momo Yehova o pisa vakuatimba vosi londalu losipata, kuenje va ipaiwa la Yehova va lua.

¹⁷ Ava va lisesamisa loku liyelisila oku iñila voviumbo, kuenje va tiamẽla kumue wovokati, ha va li ositu yongulu levi viumbondo kuenda olomuku, vosi va takela kumuamue. Oco ca popia Yehova.

¹⁸ Momo ame ñuliha ovilinga viavo lovisimĩlo viavo, oco njiya, ñongela vakualofeka viosi kuenda vakualimi osi, kuenje veya va mõla ulamba wange.

¹⁹ Kuenje ñapa ondimbukiso pokati kavo. Vamue pokati kavo va popeliwa ndi va tuma kolofeka, ko Tarsisi, ko Pulu kuenda ko Ludia, kuava va nãla ohonji, kuenda ko Tuvale lo ko Yavana, kuenda kolofeka viokokalunga kupãla, vina ka via la yeva oluhimo luange, pamue oku mõla uwale wange; kuenje va sapuila vakualofeka ulamba wange.

²⁰ Oco veyilila kumue la vakuẽle vosi vokolofeka viosi ha va lingi ocilumba coku Yehova, va endela kotuvalu, lokakãlu kuenda vavanda, kuenda kolomũla, lokolongamelo ha veya komunda yange yi kola ko Yerusalãi, ndeci omãla va Isareli va iñila vonjo ya Yehova locilumba cavo velonga li yela.

²¹ Kokuavo njupavo ovitunda kuenda va Lewi. Oco ca popia Yehova.

²² Momo ilu liokaliye, kuenda osi yokaliye, evi ndulika, ndeci vi kala hũ kovaso ange, haico ombuto yove kuenda onduko yove vi kala ño-o hũ.

²³ Oco tunde kosãi yokaliye toke kosãi yokaliye, kuenje tunde kesambata toke kesambata, vakuetimba vosi veyaiya oku fendela. Oco ca popia Yehova.

²⁴ Kuenje va tunda, va ka vanja ovivimbi viomanu va sina lame. Momo enyo liavo ka li fi, kuenda ondalu yavo ka yimi; kuenje va linga ocinyuãni ca vakuetimba vosi.