ISAYA 65 - Embimbiliya - Bíblia Sagrada em Umbundu

¹ Nda yonguile oku puliwa lava ka va mulĩle. Nda yonguile oku sangiwa lava ka va sandele. Nda popia lofeka ka ya tukuile onduko yange siti, Ame ulo. Ame ulo.

² Eteke liosi ndoluĩla ovaka ange komanu va sina, va endela vonjila hayiwako, va linga ndeci va panga;

³ haivo omanu va tongeka ño-o oku nemisa, va lumbila ovilumba voviumbo, kuenda va timihĩla insensu kilu liolondopi,

⁴ Va tumãla volongeleya, va lala valungi; va lia ositu yongulu, usole wovina viumbondo u li povilindo viavo.

⁵ Va popia vati, Likaila, ku ka name ocipepi, momo ame ndi kola ca lua, ove o sule. Ava va linga ndowisi vanyũlu ange, ndondalu yi taima ño-o eteke liosi.

⁶ Tala, ca sonẽhĩwa, kuenje ceci kovaso ange, citi, Si ũha, puãi fetuluinya. Volonulo viavo ndi va fetuluinyila.

⁷ Evĩho liavo leli lia vaisiavo ndi a fetului nyila kumuamue. Omo va timĩhĩla insensu kolomunda, kuenje va mbihĩsĩla kawulu, oco fetuluinyila ovilinga viavo volonulo viavo. Oco ca popia Yehova.

⁸ Ca popia Yehova ceci, hati, Ndeci poku vanja ocisiakata cayuva omanu va lavoka ovinyu, kuenje vati, Ku ka ci nyõle momo mu kuete eci ci sumũluĩsa,— haico ndinga ame mekonda liakuenje vange, okuti si nyõli ocitumbulukila cosi.

⁹ Ku Yakoba njupa ombuto kuenda ku Yuda njupa vakapiñala kolomunda viange. Ava va nolĩwa lame va piñalãko, lakuenje vange va tungako.

¹⁰ Siarone yi linga ulisilo woviunda, kuenda vomaka ya Akore mu pekaila oviunda, kuenje yi linga yomanu vange, ava va sanda.

¹¹ Puãi ene wa si Yehova, kuenje wa ivali omunda yange yi kola, haene wa angiliyili Esanju omesa, kuenje wa itilili Sande ovinyu,

¹² ndu weci kosipata, kuenje vosi yene vu petamẽla koku ipaiwa. Momo eci ndo kovongi ka wa kumbuluili; leci nda popia, ka wa yeveli, puãi wa lingi eci ca viha kokuange, kuenje wa nõli eci sia sanjukilile.

¹³ Oco, ca popia Ñala Yehova ceci, hati, Tala, akuenje vange va lia, ene puãi vu kala lonjala. Tala, akuenje vange va nyua, ene puãi vu kala lenyona. Tala, akuenje vange va sanjuka, ene puãi vu kutisua osõi.

¹⁴ Tala akuenje vange, omo ovitima viavo via sanjuka, va imba ovisungo, ene puãi, omo ovitima via sumua, vu lila, kuenje, omo ovitima vi kasi loku teka, vu liyula.

¹⁵ Vu sila ava va nõlĩwa lame onduko yene ha va siñala layo. Ñala Yehova u wipayi, puãi o tukula akuenje vaye londuko yiñi.

¹⁶ Oco u o likutilila okuti esumũlũho liya vofeka, o likutilila ku Suku yocili. Kuenje wosi o kasi vofeka eci o lisinga, o lisinga la Suku yocili. Momo olohali viosiahũlu via ivaliwa, kuenje via sitikiwa kovaso ange.

¹⁷ Momo tala, ndulika ilu liokaliye kuenda ongongo yokaliye; ovina viale ka vi ivalukiwa, ka vi sokoluiwa.

¹⁸ Puãi yoleli, sanjukili ño-o hũ ovina nda lulika; momo tala, nda lulika Yerusalãi okuti omanu va yi yolela. Nda lulika omanu vaye okuti va va sanjukila.

¹⁹ Kuenje njolaila Yerusalãi, sanjukila omanu vange. Ka mu yevala vali ondaka yoku litetela, pamue ondaka yoku lila.

²⁰ Ka mu fi vali oñaña yi tẽla otuneke tumue ño, pamue ekongo ka lia tẽlẽle oloneke viaye; momo omõla o fa tupu o kuete ocita canyamo, kuenje u wa fa osimbu ka tẽlĩsile ocita canyamo o tendiwa ndu wa siñaliwa.

²¹ Va tunga olonjo kuenje va kalamo; va kũla oviumbo viayuva kuenje va lia epako liavio.

²² Ka va tungi okuti umue wiñi o kalamo. Ka va kũli okuti umue wiñi o liako. Momo oloneke viomanu vange vi linga ndoloneke vioviti, lava va nõlĩwa lame va lialia ño-o kupange wovaka avo toke va kuka.

²³ Ka va lingi upange olivova, ka va citi lohele momo haivo ombuto yava va sumũluĩsua la Yehova, kuenda omãla vavo va kala kumue lavo.

²⁴ Oco osimbu ka va kovongele ndi va kumbulula, losimbu va kasi loku popia ndi ci yeva.

²⁵ Ombinji kuenda omõla omeme vi lila kumuamue, ohosi yi lialia owangu ndongombe; oneketela yi linga okulia kuonyõha. Ka va lingi cĩvi pamue oku nyõla vomunda yange yi kola yosi. Oco ca popia Yehova.