ISAYA 63 - Embimbiliya - Bíblia Sagrada em Umbundu

¹ Helie o, o tunda ke Edome luwalo u kusuka wo ko Bosira? Helie o, luwalo wa posoka, iya lunene wupami waye wa lua? U ame, ndeya oku sapula eyovo. Ndukuepondolo lioku popela.

² Uwalo wove u kusukila nye? Ci kasi ndati okuti olonanga viove vi lisoka levi viu o kosela vocikoselo covinyu?

³ Lika liange nda kosela vocikoselo covinyu, kuenje lomue ukualofeka wa kala lame. Nda va kosa lonyeño yange, nda va liata lokutema kuange. Osonde yavo ya nyilĩwila volonanga viange, luwalo wange wosi we yuka atime.

⁴ Momo eteke liefetuluinyo lia kala vutima wange, kuenje unyamo wange woku yovola weya.

⁵ Nda vanja, puãi ka kua kaile oñuatisi. Nda komõha, puãi ka kua kaile u o silamẽla. Oco okuokuo kuange muẽle kua njulisa, lonyeño yange ya silamẽla.

⁶ Nda kosa vakualofeka lokutema kuange, nda va koluisa lonyeño yange kuenje osonde yavo nda yi pesila posi.

⁷ Ndi sapula ocisola ca Yehova ka ci pongoloka. Sivayaila Yehova ovina viosi Yehova a tu ĩha. Ndu sivayaila ovina via lua viwa vionjo ya Isareli, vina a va ĩha lohenda yaye, kuenje wa vi sokisa ndokulua kuocisola caye

⁸ Momo eye wa linga hati, Ocili ava omanu vange, haivo omãla ka va niañi. Oco wa linga upopeli wavo.

⁹ Olohali viavo viosi eye wa vi talelavo kumosi lavo. Hamungako pamue ungelo wa va popela, puãi eye muẽle wa kalako kuenje wa va popela. Wa va yovola locisola caye kuenda ohenda yaye, wa va yelula kuenje wa vambata oloneke viosi viosiãhũlu.

¹⁰ Puãi vo ñualẽlãpo, kuenje va tatamisa Espiritu liaye li kola. Oco eye wa pongoloka, wa linga unyãli wavo, kuenje eye muẽle wa yãka lavo.

¹¹ Oco ovo va ivaluka oloneke viosiãhũlu, okuti via Mose lomanu vaye. Va linga vati, U wopa vokalunga angombo vocunda caye o kasi pi? U wa kapa Espiritu liaye li kola pokati kavo o kasi pi?

¹² O kasi pi U wa endisila okuokuo kuaye kua kemãla kondio ya Mose? O kasi pi U wa va tepela ovava ha lisowila onduko ka yi pui?

¹³ U wa va songuila valondo o kasi pi? Ndeci okavalu vekalasoko, haico ka va lipundukile.

¹⁴ Ndeci olongombe vi lokila ketapi, haico Espiritu lia Yehova lia va puyuisa. Haico ove wa songuila omanu vove hu kemãlĩsa onduko yove.

¹⁵ Ove o kasi kilu vonjo yove yi kola ya posoka, vanja posi. Ombili yove kuenda ovikomo viove vi kasi pi? Ongeva yove lohenda yove via nimiliwa.

¹⁶ Momo vuisietu, ndaño Avirahama ka tu kulĩhĩle kuenda Isareli ka tuĩvo. Ove u Yehova vuisietu. Tunde kosiãhũlu ove o tukuiwa Njovoliyetu.

¹⁷ A Yehova, nye o tu yapuisila volonjila viove? Nye o tĩlĩsila ovitima vietu okuti ka tu ku kuatela usumba? Tiuka mekonda liakuenje vove, haivo apata ocipiñalo cove.

¹⁸ Omanu vove va kola va kaile ño naito vocitumãlo cove, ovanyãli vetu va ci kosa.

¹⁹ Tua linga ndava kua la va viala, Pamue ndava ka va la tukuiwa londuko yove.