ISAYA 62 - Embimbiliya - Bíblia Sagrada em Umbundu

¹ Mekonda lia Siono, si ũha. Mekonda lia Yerusalãi, si puyuka toke esunga li tua ndocinyi, kuenda eyovo liaye li linga ndondiyelo yi taima.

² Olofeka vi mõla esunga liove, kuenda olosoma viosi ulamba wove. Kuenje ove o lukiwa onduko yokaliye, eyi yi tukuiwa lomẽla wa Yehova.

³ O linga ekolowa lieposo peka lia Yehova, haive ekofue liosoma peka lia Suku yove.

⁴ Ku tukuiwa vali Elunda, pamue ofeka yove oku tukuiwa Ekalasoko. Puãi o tukuiwa Nesanjuyange, kuenda ofeka yove yi tukuiwa Ndombua. Momo Yehova o ku sanjukila, kuenje ofeka yove yi kueliwa.

⁵ Momo ndeci ukuenje a likuela lufeko, haico omãla vove valume va likuela love. Ndeci Sandombua a sanjukila ondombua haico Suku yove a ku sanjukila.

⁶ A Yerusalãi, nda kapa olondavululi kovimbaka viove, ka vi ũha, ndaño utanya, ndaño uteke. Ene vukuakuivaluisa Yehova ko kõhi,

⁷ ko ka weceleli toke o tumbulula Yerusalãi, loku yi kemãlĩsa kilu lieve.

⁸ Yehova wa lisinga leka liaye liondio kuenda lokuokuo kuaye kua pama, hati, Si eci vali olomema viove ha vi lingi okulia kuovanyãli vove. Vakualofeka ka va nyui vali ovinyu viove viokaliye wa vi kavela.

⁹ Puãi ava va vi lombola ovo va vi lia loku sivaya Yehova. Lava va vi lombola ovo va vi nyuila vocitali cocitumãlo cange ci kola.

¹⁰ Piti, piti volombundi, yelisi onjila yomanu vange; pemi, pendi elila, nõlimo ovawe, tulikili omanu epandela.

¹¹ Yeveleli, Yehova wa imba oluiya toke kasulilo okilu lieve, hati, Popi lomõla a Siono ukãi hoti, Tala, eyovo liove liya; tala, onima yaye yi kasi laye, kuenje upange waye wenda kovaso aye.

¹² Oco va tukuiwa vati, Omanu va kola, haivo va yowiwa la Yehova, kuenje ove o tukuiwa Sandiwa, haive imbo ka lia takumuĩlue.