ISAYA 61 - Embimbiliya - Bíblia Sagrada em Umbundu

¹ Espiritu lia Ñala Yehova lia mbuila, momo Yehova wa mbuavekela oku kundila vakuahali ondaka yiwa. Wa numa oku petula ava va teka itima, loku sapula eyovo kolohute loku pandulula ava va pandekua,

² loku sapula unyamo wocali ca Yehova kuenda eteke liefetuluinyo lia Suku yetu, loku lembeleka vosi va sumua;

³ loku sapuila vakuakulila vo Siono elembeleko; loku piñainya eposuiso petiko, loku piñainya ulela wesanju poku lila. Poku nyumãla pa piñala uwalo wesivayo; okuti va tukuiwa oviti viesunga via kulĩlua ulamba wa Yehova.

⁴ Va tunga eci ca nyõlẽhẽle, va tumbulula alunda osiãhũlu, va tumbulula ovaimbo a nyõlĩwile lovitumbulukila via lua.

⁵ Ovingendeleyi viya, vi lisa oviunda viene, vakualofeka va endisa olosaluwa viene, kuenje va lava oviumbo viene viayuva.

⁶ Ene puãi, vu tukuiwa ovitunda via Yehova. Omanu vo tukuli oloñuatisi via Suku yetu; lene vu lialia ukuasi wolofeka, vu lipandiyila ulamba wavo.

⁷ Posõi yene pa piñala ovikepa vivali viesanju; osõi yene yi pongoloka onjolela. Oco vofeka yene vu kuata evali, kuenje onjolela yene ka yi pui.

⁸ Momo ame ndi Yehova, ndi sole ekanga liocili, ndi suvuka umunu kuenda evĩho, ndi va iha onima yocili, ndi lisila lavo ocisila ka ci pui.

⁹ Ombuto yavo yi kulĩhĩwa pokati kolofeka kuenda omãla vavo pokati komanu. Vosi va va mõla va tava okuti haivo ombuto Yehova a sumuluĩsa.

¹⁰ Oku sanjuka, sanjukila Yehova. Utima wange u yolaila Suku yange; momo wa mbualisa uwalo wepopelo, wa sikilĩla onyime yesunga, ndeci Sandombua a liposuisa lekofue liolonẽlẽho, pamue ndeci ondombua yi limiangulula laposuiso aye.

¹¹ Momo ndeci ongongo yi tundisa osongo yayo, pamue ocumbo ci yovisa ovina via kũlĩwamo, haico Ñala Yehova a yovisila esunga kuenda esivayo kovaso olofeka viosi.