ISAYA 60 - Embimbiliya - Bíblia Sagrada em Umbundu

¹ Votoka, tua, momo ocinyi cove ceya, kuenje ulamba wa Yehova wa ku tuila.

² Momo, tala, owelema u sikĩlĩla ongongo, kuenda owelema wosito olofeka. Puãi Yehova o ku tuila, kuenda ulamba waye u muĩwĩla kokuove.

³ Kuenje olofeka viya kocinyi cove, lolosoma kokutua kuokutunda kuove.

⁴ Petuila ovaso ove kolonẽle viosi. Vanja, vosi va likongela pamosi, veya kokuove; omãla vove valume va tunda kupãla, kuenda omãla vove vakãi va pakatua.

⁵ Oco o ci mõla kuenje o sanjuka, utima wove u kuta esanju kuenje u yolela. Momo elau liokalunga li panda kokuove, kuenda ukuasi wokolofeka wiya kokuove.

⁶ Ovaendo olongamelo a pita kokuove, okuti omãla volongamelo via Midiani levi vie Efa; vosi va Seva veya. Va nena ulu lekokoto, kuenje va sapula esivayo lia Yehova.

⁷ Oviunda viosi via Kedare vi kongelua kokuove. Ovitupi via Nevoti viu ku vumba; vi tava oku vi lumbila kutala wange, kuenje mosuisa onjo yulamba wange.

⁸ Ovo velie va palãlã ndelende, pamue ndolopomba vi palãlẽla kolonjanela viavo?

⁹ Momo olofeka viokokalunga vi ndavoka Olonaviyu via Tarsisi ovio tete vi nena omãla vove vokupãla, kumosi lopalata yavo lulu wavo. Cosi ciyilila onduko ya Yehova Suku yove, loku iyilila U o kola wa Isareli, momo eye wa ku kemãlĩsa.

¹⁰ Vakualofeka va tunga ovimbaka viove, kuenda olosoma viavo viu ku vumba. Momo cina nda temele nda ku veta, puãi cilo, omo ñasi love ciwa, nda ku kuatela ohenda.

¹¹ Olombundi viove vi kala ño upulule, ka vi yiliwa ndaño utanya, ndaño uteke. Oco omanu va ku nenẽla ukuasi wolofeka kuenda olosoma viaco vi linga olonjalu violohoka viavio.

¹² Momo ofeka kuenda omanu ka va tava oku ku vumba va nyolẽha. Olofeka ka vi tava oku ku vumba vi nyolĩwa.

¹³ Ulamba wa Levanone wiya kokuove. Ofaya kuenda ocinendele lusombo, viyilila kumuamue ha vi posuisa ocitumãlo cange ci kola. Kuenje ociliatelo colomãi viange ndi ci muisa ulamba.

¹⁴ Omãla vomanu va ku talisile ohali veya oku ku fendela. Vosi va ku lavisile va petamẽla polomãi viove. Va ku tukula vati, Imbo lia Yehova. Siono liu o kola wa Isareli.

¹⁵ Ocili, ale wa siwile, kuenda wa suvukiwile, okuti lomue wa pitapitamo, cilo puãi hu kemãlĩsa lulamba ko pui, hu lingisa onjolela yovitumbulukila via lua.

¹⁶ O nyama asenjele olofeka, kuenje o tekuiwila kavele olosoma. O limbuka okuti ame Yehova ndupopeli wove, haime ndinjovoli yove, haime ndukuangusu ya Yakoba.

¹⁷ Posipi miñainyapo ulu, putale miñainyapo opalata, puti miñainyapo osipi, povawe miñainyapo utale. Ñapa ombembua ha yi lingi ovasongui vove, lesunga ha li lingi vakapatasi vove.

¹⁸ Ungangala ka u yevala vali vofeka yove, ndaño oku kundula, pamue oku nyoliwa, volongave viove. O tukula ovimbaka viove huti, Eyovo, lolombundi viove huti, Esivayo.

¹⁹ Ekumbi ka li lingi vali ocinyi cove co kutanya, ndaño osãi ka yi ku tuila vali uteke. Puãi Yehova o linga ocinyi cove ka ci pui. Suku yove o linga ulamba wove.

²⁰ Ekumbi liove ka liñila vali, ndaño osãi yove ka yi tepuluka; momo Yehova o linga ocinyi cove ka ci pui, loloneke viove vioku lila vi sulila.

²¹ Omanu vove vosi va linga vakuesunga; va piñala ño hũ ofeka. Va linga ndomeko nda tuika, pamue ndupange wovaka ange okuti muĩsua ulamba.

²² U o sule o linga epata, lu otito o linga ofeka ya pama. Ame ndi Yehova ndi ci yayuisa kotembo yaco.