ISAYA 6 - Embimbiliya - Bíblia Sagrada em Umbundu

¹ Unyamo wa fa Soma Usiya, oco nda mõla Ñala, wa tumãla kocalo ca lepa ca tumũlua kuenje ocihondo caye ce yukisa onembele.

² Kilu liaye ku taĩ va Serafi, u avava epandu, u avava epandu, avali wa tuvika lao ocipala caye, avali wa sikilĩla olomãi viaye, avali wa palãla lao.

³ Kuenje va livilakaiya vati, O kola, o kola, o kola, Yehova Ukualohoka, oluali luosi lue yuka ulamba waye.

⁴ Kuenje ociseveto colukuki ca lisenga londaka yava va vilakaiya, kuenje onjo ye yuka owisi.

⁵ Oco nda linga siti, Ngongo yange we, nda nyõlẽha momo ndukuamẽla wevĩho, ame ñasi pokati kavakuavimẽla vievĩho; omo ovaso ange a mõla Soma, Yehova Ukualohoka.

⁶ Oco umue u Serafi wa palãlẽla kokuange, wambata ekãla liondalu peka liaye, wa li upa kutala lomala:

⁷ yu wa ndamba lalio komẽla hati, Tala, eli lia ku lamba komẽla; evĩho liove liosi lia ku upiwa, akandu ove a imũha.

⁸ Kuenje nda yeva ondaka ya Ñala ya linga yiti, Elie numa, elie o tu endelako? Oco siti, Ame ulo, va nume ño.

⁹ Eye hati, Kuende, ka sapuile omanu vaco huti, Yeveleli ño-o, puãi ko ka ci yevi. Vanji ño-o puãi ko ka ci limbuki.

¹⁰ Lemisa utima womanu ava, lemisa ovatui avo, patisa ovaso avo, sanga va leta lovaso avo kuenje va yeva lovatui avo ha va limbuka lovitima viavo yu va pongoloka, kuenje va sakuiwa.

¹¹ Oco nda linga siti, A Ñala toke pi? Eye wa ñumbulula hati, Toke ovaimbo a siala upolokoso, lomanu lakamue. Toke volonjo ka mu kala omunu, lofeka yi linga ekalasoko.

¹² Toke Yehova o sondoluila omanu ocipãla, kuenda akalasoko a lua vofeka.

¹³ Ndaño onepa yekuĩ yi sialamo layovo yi timihiwa vali. Yi timihiwa ndocisingi cuti wulemba pamue wocinendele cina ci siala eci uti u timbuiwa. Ombuto yi kola oyo ocisingi caco.