ISAYA 59 - Embimbiliya - Bíblia Sagrada em Umbundu

¹ Tala, eka lia Yehova ka lia tepulukile okuti ka li tẽla oku popela, ndaño etui liaye ka lia sitikilue okuti ka li tẽla oku yeva;

² puãi olohole viove via ku tepa la Suku yove, akandu ove a ku vundisila ocipala caye okuti ka yevi.

³ Momo ovaka ene a liñisua losonde, kuenda ovimuine viene levĩho; ovimẽla viene via popia uhembi elimi liene li mumũla eci hacesungako.

⁴ Lomue o yalela ekanga esunga, lomue o tana locili; puãi va kolela esanda, va popia uhembi, va mina ahuku, va cita evĩho.

⁵ Va lalela asaila a Nailili va tola owavi wa Kovi. U o lia kasaila avo o fa, nda a tuika mu tunda Nailili.

⁶ Ovowavi avo ka a lingi ovowalo, ka va lisikilĩla lupange wavo. Upange wavo ovilinga vievĩho, kuenje oku linga cĩvi ku kasi vovaka avo.

⁷ Olomãi viavo vi lupukila kevĩho, vi lungila koku pesela osonde ye lipua; ovisimĩlo viavo ovisimĩlo vievĩho, enyõlẽho kuenda ekundu vi kasi volonjila viavo.

⁸ Onjila yombembua ka va yi, volongendo viavo ka mũli esunga. Olonjila viavo va vi pengisa, ava va endailamo ka va mõli ombembua.

⁹ Oco, oku yala ekanga liocili ku kasi ocipãla letu, esunga ka li tu palulukila. Tua lavoka ocinyi, puãi tala, owelema yu. Tu lavoka utanya haimo tu endela vongula yekãi.

¹⁰ Tu papayata vocimano, tua soka ndolomeke. Tu papayata ndava ka va kuete ovaso. Kutanya tu lipundoka ndovoluvumbulu. Pokati kava va pama tua linga ndava va fa.

¹¹ Etu vosi tu leñaleña ndonguluve, tu lilalila ndakuti. Tu lavoka ekanga liesunga puãi ka ku li. Tu lavoka eyovo puãi li kasi letu ocipãla.

¹² Okulueya kuetu kovaso ove kua lua, akandu etu a tu imbila uvangi wepiso. Momo okulueya kuetu ku kasi letu, evĩho lietu tua li kũlĩha.

¹³ Oku sina tua likala Yehova, koku kuama Suku yetu tua tundako. Oku lundila tua popia usuanji. Tua popia olondaka viuhembi evi tua sovola vutima.

¹⁴ Ekanga liocili lia tiukila konyima, esunga li taĩlĩli kupãla. Momo ocili ca kupukila vovila, esunguluko ka li tẽla oku iñila.

¹⁵ Oco muẽle kua kamba ocili; kuenje u o liweka oku linga cĩvi o kuatiwa. Yehova wa ci mõla, yo co puiya omo ka ku li ekanga liocili.

¹⁶ Wa mõla okuti ka kua kaile omunu, kuenje wa komõha omo ka kua kaile u o tundila olunda ukuesunga. Oco okuokuo kuaye muẽle kuo popela, kuenda esunga liaye lio kuatisa.

¹⁷ Wa limalẽhĩsa esunga ndocikutu cutale covonete, kuenda eyovo ndongãlãu yokutue. Wa wala uwalo wefetuluinyo, wa lisikĩlĩla ombili ndonyime.

¹⁸ O va fetuluinya ndovilinga viavo, onyeño kuava vo tamãlãila, efetuluinyo kovanyalĩ vaye; o fetuluinya olofeka viokokalunga efetuluinyo.

¹⁹ Oco va kuatela onduko ya Yehova usumba tunde kutakelo wekumbi, tunde kutundilo wekumbi va mõla ulamba waye. Momo iya ndolui lua liuvikile ofela ya Yehova ya luvulula.

²⁰ Ca popia Yehova ceci, hati, Onjovoli yiya ko Siono, haeye onjovoli ya va Yakoba va tinduka kekandu.

²¹ Yehova wa linga hati, Eci oco ocisila cange kokuavo: Espiritu liange li kasi kokuove kuenje olondaka viange nda vi kapa vomela wove. Ka vi tundi vomela wove, pamue vomẽla womãla vove, pamue vomẽla wombuto yomãla vove tunde cilo toke oloneke ka vi pui. Oco ca popia Yehova.