ISAYA 58 - Embimbiliya - Bíblia Sagrada em Umbundu

¹ Vilikiya, ku ka liweke, kaluka londaka ya lua ndolumbeta. Sapuila omanu vange okulueya kuavo, kuenda onjo ya Yakoba akandu avo.

² Haimo va sanda eteke keteke olo viosi, kuenje va sole oku kũlĩha olonjila viange. Va linga ndofeka yi lingainga esunga, yu ka ya sinĩlĩle ovihandeleko via Suku yavo. Va mũla mũla olonimbu viesunga, va sole oku ama ku Suku.

³ Va popia vati, Nye tua likandangiyila okulia, ove yu kua ci muĩle? Nye tua liketisila, ove yu kua ci limbukile? Tali, eteke liokulikandangiya kuene okulia, vu ci lingila esanju liene kuenje vu sakalaisa ño vakuopange vene.

⁴ Tali, okulikandangiya kuene okulia ku koka lika oku tema kuenda oku liyenja loku litendola ovikusi vĩvi. Okulikandangiya kuene okulia ndeci vu linga etali ka ku yevalisa ondaka yene kilu.

⁵ Oku hẽ, oko okulikandangiya okulia ame nda nõla? Eteke ndolio hẽ olio li kuatisa omunu oku liketisa? Anga, okulikandangiya kuocili kua lomboloka oku petamisa utue ndoluneva, pamue oku pekaila vetiko pamue oku wala ovikẽlẽyi? Eci hẽ, oco vu ci tukola, hoti, Oku likandangiya okulia kuenda eteke Yeova a sole?

⁶ Okulikandangiya okulia ame nda nõla, hakoko hẽ, oku yongisa ovikolo vieviho loku pandulula ovikolo viomi, kuenda oku eca ava va kasi loku kangisua loku teya olomi viosi?

⁷ Haku liamuĩlako okulia kuove la vakuanjala? Haku nenako konjo yove olosuke lolohukui? Haku walisako u wa sanga lepẽle? Haku yuvulako oku nyehũla vakuasonde yove?

⁸ Nda oco, ocinyi cove ci tola ndongula yomẽle, okusakuiwa kuove ku iya lombili; esunga liove li ku songuila, lulamba wa Yehova u ku lingila ohando.

⁹ Oco o kovonga, kuenje Yehova o kumbulula; o vilikiya, kuenje eye o popia hati, Ame ulo. Nda wupi pokati kene omi kuenda oku ilika omuine, loku pitisa olombonde,

¹⁰ nda o litumbika ocili oku kuatisa ava va kasi lonjala, loku tẽlisa ava va kasi lohali, oco ocinyi cove ci tuila vowelema, kuenje owelema wove u linga ndutanya.

¹¹ Kuenje Yehova o ku songuila ño-o hũ, loku ku muisa evi viwa vi livela utima wove loku kolisa akepa ove. Oco o linga ndocumbo ca tapelua, pamue ndono yovava ka a takata.

¹² Alunda ove osiahũlu a pasuiwapo vali, o tumbulula oviseveto viovitumbulukila via lua; va ku tukula vati, Utumbululi walunda, haive utumbululi wolokololo vioku tungila.

¹³ Nda o pokuisa omãi yove eteke liesambata, okuti ku lingi ovina viove veteke liange li kola, kuenje huti, Esambata nda li sanjukila cocili, hailio eteke li kola lia Yehova, hailio li sesamẽla oku sumbilua; nda o li sumbila okuti ku endela volonjila viove muẽle pamue oku linga ovina viove, loku vangula ovina viaño,

¹⁴ oco o sanjukila Yehova, kuenje ame hu endisa kolonumbuko via lepa viokilu lieve. Hu tekula locipiñalo ca Yakoba isiene, momo omẽla wa Yehova wa popia.