ISAYA 57 - Embimbiliya - Bíblia Sagrada em Umbundu

¹ Ukuesunga o taka, kuenje lomue ca tukula utima. Vakuahenda vopiwa kuenje lomue o ci limbuka. Momo ukuesunga upiwa kohali, o sanga ombembua.

² Ava va endela vesunga liavo ovo va pekela vovola avo.

³ Puãi ene, amãla vongonga, haene vumbuto yombaisi kuenda ocipuepue, kokeli.

⁴ Helie vu kasi loku fuangula? Helie wasameli? Helie wa tundisili alimi? Havumãla vekanduko? Havumbuto yuhembiko?

⁵ Ene vu lisiakãlẽla koviteka vemehi lioviti viosi via pulika amẽla; haene wipali omãla vene volondamba kuenda valeva ovawe.

⁶ Wa noli vekungu oloseko via seleña, evi ovio via linga ombuwe yove. Wa vitila ocilumba coku nyua, wa vi lumbila ocilumba cosema. Anga nulumuhĩla kovina evi?

⁷ Wa yala ula wove komunda yinene haiyo yisõvi; oko wa ka lumbilile ovilumba.

⁸ Konyima yepito, konẽle yocikuli oko wa kapa osilo yove; momo poku njanduluka, wa sikulũla ula wove, wa londako, wo tandavaisa, kuenje wa lisila lavo. Wa sola ula wavo kuenje wa vanja kepõlõla liavo.

⁹ Wa ile ku Moleke lilembu viulela, wa vokiyako onguendu yove. Wa tuma olomunga viove kupãla, ndaño kalondo onjembo.

¹⁰ Wa likavisa lungende wove wa lepa; haimo kua popele huti, Ka ci kuete elavoko. Wa sanga ongusu yove ya tumbuluka oco kua ambukile.

¹¹ Wa kuatela elie ocinjoko kuenda usumba, okuti wa kemba kuenje kua njivalukile, ndaño oku sokolola? Omo ndoha osimbu oco hẽ kua sumbilile?

¹² Ndi sapula esunga liove kuenda ovilinga viove; puãi ka viu ku kuatisa cimue.

¹³ Eci o vilikiya owiñi woviteka viove u ku popele! Ofela yi vi ambata. Okafela katito ka enda lavio viosi. Puãi u o vunda kokuange o kuata ofeka kuenje o piñala omunda yange yi kola.

¹⁴ Kuenje ci popiwa, citi, Pakuli, pakuli, yelisi onjila, ovilondokua viosi vi upi vonjila yomanu vange.

¹⁵ Momo Tõlo, haeye wa piãla, o tumãla ño-o hũ, onduko yaye yi kola eci a popia ceci, hati, Nda tunga vocitumãlo ca lepa haico ci kola. Nungavo kumue lomunu we lipua, haeye wonjuka, okuti numbulula utima wu we lipua, kuenda utima wu wonjuka.

¹⁶ Momo si tamãlãla ño-o hũ, pamue oku tema olonjanja viosi. Momo ame ndusovoli wespiritu, haime nda fuimĩla omanu omuenyo.

¹⁷ Nda temẽla evĩho liocipululu caye, ndo veta; ndo vundisila ocipala cange kuenje nda tema; puãi eye wa konyõha ño-o ndeci ca tuwa utima waye.

¹⁸ Nda mõla ovituwa viaye, puãi ndu sakula. Ndu songuila, ndu wĩha onima yelembeleko, sovuila ava vo lila epako liomẽla.

¹⁹ Ca popia Yehova ceci, hati, Ombembua. Ombembua ku o kasi kupãla lu o kasi ocipepi. Ndu sakula.

²⁰ Puãi vakuevĩho va lisoka ndokalunga ka tumõha, momo ka va tẽla oku tulumũha, kuenje ovava ako a inasi onata kuenda eliño.

²¹ Ka ku li ombembua ku vakuevĩho. Oco ca popia Suku yange.