ISAYA 56 - Embimbiliya - Bíblia Sagrada em Umbundu

¹ Ca popia Yehova, ceci, hati, Lavi ovihandeleko, lingi esunga. Momo eyovo liange li li ocipepi kuenda epopelo liange li tukuluka.

² Wa sumũlũha omunu o ci lingainga kuenda omõla omunu o ci yevite. Wa sumũlũha omunu o lava esambata, kuenje ka li lavisa. Wa sumũlũha omunu o lava lava eka liaye okuti ka li lingi cimue cĩvi.

³ Ukualofeka wa tava ku Yehova ka ka popie hati, Ocili Yehova o nepisa lomanu vaye. Enuku ka li ka popie liti, Tala, ndusanje.

⁴ Momo ca popia Yehova ceci, hati, Anuku ava va lava lava asambata ange kuenje va nõla ovina ndi sole loku kolela ocisila cange,

⁵ kokuavo, vonjo yange vokati kovimbaka viange, ngeca onjivaluko londuko. Londuko yaco yi velapo, okuti eyi yomãla yi sule. Ngeca kokuavo onduko ka yi pui, haiyo ka yimũha.

⁶ Vakualofeka va tava ku Yehova ha vo vumbi, haivo va sole onduko ya Yehova kuenje va livela oku linga akuenje vaye,— wosi o lava lava asambata kuenje ka a vĩhĩsa haeye o kolela ocisila cange,—

⁷ ovo muẽle ndi va nena komunda yange yi kola, kuenje ndi va sanjuisila vonjo yange yoku likutilila. Ovilumba viavo vioku yoka kuenda ovilumba viavo vioku pia elisi vi tavelua kovotala ange; momo onjo yange yi tukuiwa onjo yoku likutilila yomanu vosi.

⁸ Ñala Yehova, u ongolola va Isareli va sandoka, wa popia hati, Ngongoluila kokuaye vakuavo oku va vandeka kuava vongoluiwa ale.

⁹ Avinyama viosi viovusenge, enjui ha vu li, oco muẽle, ovinyama viosi viovusenge.

¹⁰ Olondavululi viaye viosi olomeke, vosi ka va kulĩhĩle cimue; va linga anganda ka a tẽla oku kua, a lota lota olonjoi, a sole oku pekaila otulo.

¹¹ Olombua vi kuete onjala yalua, ndaño vi lia haimo ka vi kuta. Ovangombo lavovo ka va kuete olondunge. Vosi va yapukila kolonjila viavo, u konganyu yaye, u konganyu yaye, lakulu lamãlẽhe,

¹² vati, Kokeli, tu kopi ovinyu, tu nyui ha tu kolua; hẽla li soka ndetali, kuenje li piãla vali enene.