ISAYA 55 - Embimbiliya - Bíblia Sagrada em Umbundu

¹ Ene vosi vu kasi lenyona, enjui kovava. Wosi ka kuete olombongo eye, a lande, a lie. Enjui muẽle, ndo landi ovinyu lasenjele, puãi halolombongoko, halondandoko.

² Nye vu pesili olombongo kueci hakuliako, kuenda onganyu yupange wove kueci ka ci kutisa? Njeveleli lutate ho li eci ciwa, oco ovitima viene vi sanjuke lelau.

³ Kulula etũi liove, enju kokuange; yeva oco utima wove u kale lomuenyo. Ndi lisila love ocisila ka ci pui ndocisila cocisola ka ci pongoloka nda lisila la Daviti.

⁴ Tala, ndo tukula ombangi ya vakualofeka, haeye usongui wa vakualofeka, haeye kesongo liavo.

⁵ Tala, o kovonga olofeka kua kulĩhĩle; kuenje olofeka lea via ku kulĩhĩle vi lupukila kokuove unekonda lia Yehova Suku yove, haeye U o kola wa Isareli, momo wa ku kemãlĩsa.

⁶ Sandi Yehova osimbu a sangiwa, u kovongi osimbu a kasi ocipepi;

⁷ ukuakulinga cĩvi a sie ocituwa caye, u ka lingi esunga a liweke ovisimĩlo viaye, a tiukile ku Yehova, kuenje u linga ohenda, ku Suku yetu kuenje o wecela ca lua.

⁸ Momo ovisimĩlo viange havisimĩlo vieneko, ovituwa viene havituwa viangeko. Oco ca popia Yehova.

⁹ Ndeci ilu li kasi kupãla longongo haico ovituwa viange vi kasi kupãla lovituwa viene, lovisimĩlo viange vi kasi kupãla lovisimĩlo viene.

¹⁰ Momo ndeci ombela la neve vi tunda kilu, kuenje ka vi tiukilako, puãi vi tapela ongongo loku yi yovisa, okuti yeca ombuto kukuakukũla, kuenda okulia kukuakulia,

¹¹ haico ondaka yange yi tunda vomẽla wange; ka yi tiukila ño kokuange, puãi yi linga ndeci nda panga oku tẽlĩsa, leci nda yi tumĩla.

¹² Momo vu tunda lonjolela, vu songuiwa lombembua. Olomunda kuenda ovikandulukua vimbila ovisungo kovaso ene. Oviti viosi viusenge vi pandula ovaka.

¹³ Oku kua kala olosongo ku tundila ovinendele. Oku kua kala olosanyanya ku tundila usombo. Ci linga onjivaluko ya Yehova, haiyo ondimbukiso ka yi pui kuenda ka yi nyõlẽha.