ISAYA 54 - Embimbiliya - Bíblia Sagrada em Umbundu

¹ Asiũle kua citile, imba, ove kua kuatele olongembia vioku cita omõla, imba ovisungo, kaluka. Momo Yehova hati, Omãla vocimbumba va lua, okuti omãla vondombua ya kueliwa va sule.

² Luisa ocitumãlo combalaka yove, ketulũla olonanga vionjo yaco; ku ka lengusule, ovikolo viove vi lepisa, kolisa apanji ove.

³ Momo o nyanyumuĩla kondio lokepĩli, ombuto yove yi kuata olofeka kuenje yi tumbulula alunda.

⁴ Ku ka kuate usumba, momo ku kutisua osõi; ku ka saluke, momo osõi ka yi ku kuti; momo wivala osõi yutila wove; ku ivaluka vali elaviso liumbumba wove.

⁵ Momo Usovoli wove haeye veyove. Yehova Ukualohoka oyo onduko yaye; kuenje U o kola wa Isareli haeye Onjovoli yove, haeye o tukuiwa Ñala yoluali luosi.

⁶ Momo Yehova wa ku kovonga ndukãi wa nyalĩwa kuenda utima waye wa teka, pamue ndombutulua ya nyalĩwa. Oco ca popia Suku yove.

⁷ Nda ku nyalẽle ño naito, puãi hu ondolola lohenda ya lua.

⁸ Nda ku temelẽle ño okatembo, nda ku vundisila ocipãla cange, puãi hu lava lohenda kuenda locisola ka ci pui. Oco ca popia Yehova, onjovoli yove.

⁹ Ci kasi lame ndeci koloneke via Noha. Momo ndeci nda lisila siti, Ovava a Noha ka a tuvika vali ongongo, haico nda lisila okuti, si ku temẽla vali, si ku lemẽla.

¹⁰ Ndaño olomunda vi upiwa kuenda ovikandulukua vi senguluka, haimo ocisola cange ka ci pongoloka ka ci ku tundi, ndaño ocisila cange combembua ka cupiwa. Oco ca popia Yehova u o ku kuetele ohenda.

¹¹ Okuangongo, wa pungiwa lehunguhungu yu kua lembelue, tala, nunga ovawe ove avala, seveta ociseveto cove la safira.

¹² Nunga olonjanela viove la jaspe kuenda olombundi viove lovawe a posoka, lovimbaka viove lovawe a tĩla.

¹³ Omãla vove vosi va longisiwa la Yehova, kuenje okusalala kuomãla vove ku lua.

¹⁴ O sevetiwa lesunga: o kala kupãla loku tokotelua momo ku kuata usumba; o kala kupãla locinjoko momo ka cu ku ami.

¹⁵ Nda umue o wengula ema, ka li tundi kokuange. Wosi o wengula love ema o nyolẽhãpo.

¹⁶ Tala, nda lulika ocivinda, u o yevaiya ondalu yakãla ha teli ocivela cupange waye. Nda sovola ukuakunyõla ha nyõli;

¹⁷ lacimue ocimãlẽho va ci telela oku yaka love ci ku linga cimue; kuenje o yula alimi osi a ku katukila vekanga. Eci oco ocipiñalo cakuenje va Yehova, kuenda esunga liavo lia tunda kokuange. Oco ca popia Yehova.