ISAYA 53 - Embimbiliya - Bíblia Sagrada em Umbundu

¹ Helie wa kolela eci tua yeva? Okuokuo kua Yehova kua lekisua kulie?

² Momo eye wa kulila kovaso aye ndocikũla ca leñela, kuenda ndocisĩla ci tunda vongongo ya kukuta; ka kaile lemolẽhelo pamue ulambi okuti tu u tala, ka kaile leposo okuti tu u yongola.

³ Wa pembuiwa, wa nyehũiwa lomanu; ukuahali, haeye ombeyi; wa pembuiwa ndu vo vundisila ovipala, kuenje ka tuo tendele.

⁴ Ocili, eye wa tu velela epuila lietu, haeye wa tu talela ohali yetu; haimo tua sokele tuti, Wa lemẽhĩwa, wa vetiwa la Suku, kuenda wa yambuiwa.

⁵ Puãi eye wa totiwila olombole okulueya kuetu, wa tonyuiwĩla evĩho lietu, wa yambuilua oku ñuaima kuetu, tua sakuiwa lovisimbimbi viaye.

⁶ Etu vosi tua tungayala ndolomeme, u lonjila yaye, u lonjila yaye. Kuenje Yehova wo lundika evĩho lietu liosi.

⁷ Wa tokotelua puãi eci a yambuiwa ka asamẽle, ndomõla omeme wa tualiwa kepondelo. Ndeci omeme yuhĩla vakuaku yi pemũla, haico eye ka asamẽle.

⁸ Wopiwa lundululu kuenda ekanga, puãi kocitumbulukila caye helie wa soka hati, Eye wopilua vofeka ya vakuamuenyo okulueya kuomanu vange.

⁹ Vo lingila eyambo liaye kumue la vakuevĩho, kuenda okufa kuaye kumue londiandia, ndaño ka lingile eci ca puiya, ndaño elimbi ka lia sangiwile vomẽla waye.

¹⁰ Lopo Suku wa panga oku u talisa ohali, wo velisa, eci a lingisa omuenyo waye ocimuenyo cakandu, oco a mõla ombuto yaye, o luisa oloneke viaye. Ocipango ca Yehova ci suisilua peka liaye.

¹¹ O mõla epako liomuenyo waye kuenje o sanjuka. Lukulihiso waye ukuenje wange ukuesunga o muisa valua esunga; eye muẽle ambata olongole viavo.

¹² Oco ndu tepisa onepa lava vanene, kuenje o liamũila eci ca pundiwa kumue la vakualohõlo: momo wa pesela omuenyo waye toke kokufa kuenje wa tendiwa lava va lueya; haimo wambata akandu omanu va lua, kuenje wa fundila ava va lueya.