ISAYA 52 - Embimbiliya - Bíblia Sagrada em Umbundu

¹ A Siono, pasuka, pasuka, mãlẽha ongusu yove. A Yerusalãi, aimbo li kola, wala uwalo wove wa posoka; momo oviyamba ka vi iñilãmo vali, pamue vakuevĩho.

² A Yerusalãi ya kuatiwa, litutumũla oneketela, votoka. Ahuate yomõla a Siono ukãi, liupa ukumbi kosingo yove.

³ Momo ca popia Yehova ceci, hati, Lacimue wa pitisiwi, vu yovuiwa puãi halolombongoko.

⁴ Momo ca popia Ñala Yehova ceci, hati, Omami vange tete va ililile oku tunga ke Egito: yu va Asuria va va talisa ño ohali, ndaño ka va lingile cimue.

⁵ Yehova hati, Kaliye ndinga nye? Omo omanu vange vopiwa ka va pitisiwile cimue. Ava va va viala va yuela ño eteke liosi, ka va liweka oku sepula onduko yange.

⁶ Oco omanu vange va kulĩha onduko yange, kuenje eteke liaco va kulĩha okuti ame, ame muẽle mopia. Ame ulo.

⁷ Olomãi viu iya kolomunda londaka yiwa via posoka nye! Eye o sapula ombembua kuenje iya londaka yiwa yesanju. Haeye o sapula eyovo, kuenje o popia la Siono hati, Suku yove o viala.

⁸ Yevelela kondaka yolondavululi viove. Va kaluka ha va imbila kumuamue ovisungo; momo va mõla iso liso ndomo Yehova a tumbulula Siono.

⁹ Alunda a Yerusalãi, kaluki lonjolela, imbili kumuamue ovisungo, momo Yehova wa lemba omanu vaye, yu wa yovola Yerusalãi.

¹⁰ Yehova wa lekisa okuokuo kuaye ku kola ku vakualofeka viosi. Asulilo osi oluali a mõla eyovo lia Suku yetu.

¹¹ Tundi, tundi, tundi mũlo, ko ka lambi cimue ca vĩha. Tundi vokati kayo. Ene wambati ovikuata via Yehova, liyelisi.

¹² Momo ko tundi lonjanga, ko tilimo. Momo Yehova u songuili. Suku ya Isareli o linga ohando yene.

¹³ Tala, ukuenje wange o sumũlũha, o kemãlĩsua, o kapiwa kunene. O linga muẽle omunu unene.

^14-15 Ndeci va lua vo komõha omo ocipala caye ca kuloka ca lua, huti ño hacipala comunuko, kuenje ka setahãile omãla vomanu, haico eye o komohisa olofeka via lua. Olosoma viu munihĩla ovimela momo ovina ka via va la sapuiwa va vi mõla, leci ka va la yeva ci va lomboloka.