ISAYA 51 - Embimbiliya - Bíblia Sagrada em Umbundu

¹ Njeveleli, ene vu sanda epopelo, haene vu sanda Yehova. Vanji kohanda oku wa songiwi, vanji vocima omu wa tapuiwi.

² Vanji ku Avirahama isiene, kuenda ku Sara u wo citi. Momo eci a kala lika liaye ndo kovonga, kuenje ndo sumũluĩsa, yu ndo luisa ha lingi va lua.

³ Momo Yehova o lemba Siono, o lemba alunda aye osi, kuenje ekalasoko liaye o li linga nde Edene, kuenda ekango liaye o li linga ndocumbo ca Yehova. Esanju kuenda onjolela vi sangiwamo, olopandu kuenda ondaka yoku imba ovisungo.

⁴ Amanu vange, njeveleli, afeka yange, ñuluili etuĩ. Momo ocihandeleko ci tunda kokuange. Muisa esunga liange ha li lingi ocinyi ca vakualofeka.

⁵ Epopelo liange li li ocipepi, eyovo liange lia katuka, ovimãlẽho viange vi tetulula vakualofeka; olofeka viokokalunga vi njimba ovaso, kuenje vi kolela okuokuo kuange.

⁶ Petuili ovaso ene kovailu, kuenje vanji kongongo; momo ovailu a takata ndowisi, longongo yi kuka nduwalo. Ava va tungamo va fa ndolonyi. Puãi eyovo liange ka li pui, lepopelo liange ka li sulila.

⁷ Njeveleli ene wa kũlĩhi esunga, haene vumanu vovitima viene mu li ovihandeleko viange. Ko ka lulumili oku pembuiwa lomanu, ko ka yokokeli okuimbula kuavo.

⁸ Momo ombunji yi va lia nduwalo, epuka li va lia ndeci li lia ovonya olomeme; puãi epopelo liange ka li pui, ndaño eyovo liange liokovitumbulukila viosi.

⁹ Akuokuo kua Yehova, pasuka, pasuka, mãlẽha ongusu. Pasuka ndeci wa linga koloneke viale, kovitumbulukila viosiãhũlu. Haveko hẽ wa sasa Rahava? Haveko hẽ wa toma Canjangombe?

¹⁰ Haveko wa takatisa okalunga ndaño ovava a longa? Haveko wa tola vokalunga ka longa onjila omu mua pita ava va yovoka?

¹¹ Kuenje ava va yowiwa la Yehova va tiukila, veya ko Siono loku imba ovisungo. Onjolela ka yi pui yi kala kovitue viavo; va mõla esanju kuenda onjolela; esumuo kuenda okusakoka ku tila.

¹² Ame, ame ndukuakukulemba; ove elie okuti o kuatela usumba omunu o fa, kuenda omõla omunu o lingiwa ndowangu?

¹³ Ove elie okuti wa ivala Yehova, utungi wove, una wa yala ilu kuenda wa seveta ongongo? Ove elie okuti eteke liosi o kala ño-o lusumba wonyeño yukuakutalisa ohali osimbu eye angiliya oku nyõla? Onyeño yukuakutalisa ohali yi kasi pi?

¹⁴ Omandekua ya kutiwa yi kutuluiwa lombili, ka yi fi loku enda konjembo, ka yi kambi okulia kuayo.

¹⁵ Momo ame ndi Yehova Suku yove, ame ndi temisa okalunga oco akimba ako õle. Yehova Ukualohoka oyo onduko yaye.

¹⁶ Nda kapa olondaka viange vomẽla wove. Nda ku vundisa vulembo weka liange eci nda yala ilu loku seveta ongongo leci nda popia la Siono siti, Vumanu vange.

¹⁷ A Yerusalãi, pasuka, pasuka, votoka. Ove wa nyuila peka lia Yehova okopo yonyeño yaye, wa nyua muẽle kokopo yi yengengisa toke wa pitila kovitami viaco.

¹⁸ Pokati komãla vaye vosi a cita ka peli u u songuila. Pokati komãla vosi a tekula lomue u kuata peka.

¹⁹ Ovina evi vivali via ku sanga, elie o ku lembeleka? Koku pindiwa loku nyõlẽha, kuenda onjala losipata, helie o ku lemba?

²⁰ Omãla vove valume vambuka, va pekela valuwa osi ndonusi vonjanjo. Ve kuta onyeño ya Yehova lokulemẽla kua Suku yove.

²¹ Kaliye yevelela, okuaku talisua ohali, haive wa kolua puãi halovinyuko.

²² Ñala yove Yehova, haeye Suku yove, u o kaila omanu vaye konyima, eci a popia ceci, hati, Tala, ndopa peka liove okopo yi koka oku yengenga. Ku nyui vali kokopo yonyeño yange.

²³ Ndi yi kapa povaka ava va ku talisa ohali, haivo va popia love vati, Petama oco tu ku endele, kuenje wa lingisa onyima yove ndosi, pamue ndonjila omu va pita.