ISAYA 50 - Embimbiliya - Bíblia Sagrada em Umbundu

¹ Ca popia Yehova ceci, hati, Ukanda woku nyãla nyõho, una ndo nyãla lawo, u kasi pi? Pokati kolondevalisi viange kulie nda ku landisa? Tala, wa landisilui olohole viene, nyõho wa nyãlĩwila okulueya kuene.

² Eci ndeya, nye sia sangelele omunu? Eci nda kovonga, nye ka kua kaililile u o ñumbulula? Eka liange nga lia tepuluka okuti ka li tẽla oku yovola? Si kuete hẽ ongusu yoku popela? Tala, ñukutisa okalunga lokututuiya kuange, olondui ndi vi pongolola ekango, olõsi viavio vi lẽha, omo ka mu li ovava vi fa lenyona.

³ Mbualisa ilu owelema, ndi li sikĩlĩla ovikẽlẽyi.

⁴ Ñala Yehova wa nyĩha elimi liuloño ndokuti nẽla oku kolisa lolondaka u wa kava. Omẽle komẽleo pasola, o pasola etuĩ liange okuti njeva ndu o longisiwa.

⁵ Ñala Yehova wa situlula etuĩ liange, kuenje sia sinĩle, sia tiukilile konyima.

⁶ Nda eca onyima yange kuava va veta, kuenda atama ange kuava va sunya olonjele. Sia sitikile ocipala cange koku kutisua osõi pamue koku siyilua.

⁷ Omo Ñala Yehova a ñuatisa, oco sia likosele. Nda luluvaisa ocipala cange ndewe, kuenje ndi ci okuti si kutisua osõi.

⁸ U o njovola o li ocipepi. Helie o tamãlãla lame? Tu talame pamosi. Unyali wange elie? Eye ocipepi lame.

⁹ Tala, Ñala Yehova o ñuatisa, elie o misa? Ota, vosi yavo va kuka nduwalo, ombunji yi va lia.

¹⁰ Helie pokati kene o sumbila Yehova kuenje o tava kondaka yukuenje waye? Helie endaila vowelema kuenje ka kuete ocinyi, puãi haimo o kolela onduko ya Yehova, loku imbĩla ovaso ku Suku yaye?

¹¹ Tali, ene vosi wakuakumĩha ondalu, kuenda wa limalẽhĩsi lovitonga! Endeli ene muẽle vulienge wondalu yene pokati kovitonga wa mĩhi! Eci vu tambula peka liange ceci: Oku pekaila lohali.