ISAYA 5 - Embimbiliya - Bíblia Sagrada em Umbundu

¹ Linga, njimbile ekamba liange ocisungo. Ndu wimbile ocisungo cocumbo caye cayuva. Ekamba liange wa kaile locumbo cayuva. Ca kaile kowulu wombolela.

² Wa ci senda kuenda wongololamo ovawe. Wa ci kũla ayuva a nõlĩwa. Vokati kaco wa tungamo elavelelo. Wa sokotola vewe ocikulungu covinyu. Wa lavokaile okuti cima ayuva vocili, puãi ca ima injuanjua.

³ Kaliye, ene a va Yerusalãi kuenda alume va Yuda, ndu peyi siti, Tetuluili pokati kocumbo cange lame.

⁴ Nye ci tava oku lingila vali ocumbo cange okuti sia ci lingĩlemo? Eci nda lavoka okuti cima ayuva vocili, nye ca imĩla olonjuanjua?

⁵ Kaliye ndu sapuili eci ndinga locumbo cange cayuva. Njupako olumbo luaco kuenje ci liwa; ngulumũla ocimbaka caco kuenje ci kosiwa.

⁶ Ndi ci lingisa ocipembe, ka ci sonjiwa, ka ci sonjuiwa, puãi ci tunda olosanyanya kuenda olosongo; handelekavo alende okuti ka a lokisamo ombela.

⁷ Momo ocumbo cayuva ca Yehova Ukualohoka oco onjo ya Isareli; kuenda alume va Yuda ovo ikũla viesanju liaye. Eye wa lavokaile esunga, puãi ota, osonde yi pita. Wa lavokaile oku sunguluka, puãi ota, oku lila.

⁸ Ene vu vokinyi ño-o olonjo lovapia,— ngongo yene! Vu ci linga ño-o toke ka ku li vali osi, kuenje vu tunga ulika pokati kofeka.

⁹ Yehova Ukualohoka wa lisinga, lame nda ci yeva, hati, Ocili olonjo via lua vi kala upolokoso ndaño vinene kuenda via posoka, haimo ka mu kala omanu.

¹⁰ Momo ocumbo cayuva cekũi liatemo cima lika ombatu, kuenda ohomeri yombuto yima lika efa.

¹¹ Ava va pasuka ociteketeke ha va sandi evi vi koluisa, ngongo yavo! Haivo va tembaika toke kuteke kuenje ovinyu vi va tokotisa.

¹² Ohalupa lokacẽke kuenda ongualata lolumbendo, kuenda ovinyu vi kasi kolofesta viavo. Puãi ka va tendi upange wa Yehova, kuenda ovilinga viovaka aye ka va vi sokolola.

¹³ Oco omanu vange va enda umandekua omo va kamba ukũlĩhiso. Olombuale viavo vi lambuka, lowiñi wavo u fa lenyona.

¹⁴ Oco Njembo wa luisa onjongole yaye, wasama enene omẽla waye, kuenje ava vanene vo Yerusalãi lava va sule, vosi yavo va wilamo, okuti owiñi waye wosi, kuenda u wosi wo sanjukila.

¹⁵ Okulituna kuomanu kupiwa. Opianu va ketisua kuenda ovaso ava va lisole a kutisua osõi.

¹⁶ Puãi Yehova Ukualohoka o kemãla lesunguluko, kuenje Suku o kola o lilekisa okuti ocili o kola vesunga.

¹⁷ Oco omãla volomeme va lila ndovocililo cavo, kuenda omãla volohombo va lila valunda ovindululu.

¹⁸ Ava va koka evĩho likolo viuhembi, ngo ngo yavo! Ndaño ava va koka ekandu ndava va koka etimba lukolo,

¹⁹ vati, A yayuleko, a linge lonjanga upange waye oco tu u tale. Ocipango cu o kola wa Isareli ci kokele oco tu ci limbuke.

²⁰ Ava va tukula cĩvi vati, Ciwa, lava va tukula ciwa vati, Cĩvi, ngongo yavo! Ocinyi va ci lingisa owelema, kuenda owelema vo lingisa ocinyi. Ci sõsa va ci lingisa ci lula, kuenda ci lula va ci lingisa ci sõsa.

²¹ Ava va lisimĩla vati, Tua nyanga haivo vati, Tuakualondunge,— ngongo yavo!

²² Ava va lipandela oku nyua ovinyu, haivo olonõi vioku tenga eci ci koluisa, ngongo yavo!

²³ Ndaño ava va yovuisa ondingaĩvi lovitukiko, loku pumbisa ukuesunga olonimbu viesunga, lavovo, ngongo yavo!

²⁴ Oco ndeci ulienge wondalu u lia ofukutu pamue owangu u linga etiko vulienge, haico olumbombo luavo lu vola, kuenda onẽlẽho yavo yi linga oneketela. Momo va likala okulonga kua Yehova Ukualohoka, haivo va pembula ondaka yu o kola wa Isareli.

²⁵ Oco onyeño ya Yehova ya wengukila omanu vaye, kuenje wa voluĩla eka liaye loku va veta, kuenje olomunda via luluma. Ovivimbi viavo via kala valuwa ndovinene. Haimo onyeño yaye ka ya imũhĩle, kuenje eka liaye lopo liõlõha.

²⁶ O tulikila epandela ofeka yi kasi kupãla, o va sikila ovilua tunde kasulilo oluali kuenje va yayulako, veya lombili.

²⁷ Pokati kavo lomue o kava ndaño oku lilondoka, lomue o suñila ndaño oku pekela. Ovivia viovolombunda ka vi yongi, ndaño olonjita violohaku viavo ka vi tepa.

²⁸ Ovisongo viavo via tua, olohonji viavo viosi via lumbilua, akonjo otuvalu tuavo a soka ndovawe, alola avo a linga ndocipepe;

²⁹ okukoma kuavo kua soka ndokukoma kuomange yohosi, va koma muẽle ndayove olohosi. Võla kuenje va kuata ohute, va yambata kuenje u o popela ka ku li.

³⁰ Eteke liaco va yi komẽla ndokuõla kuokalunga. Umue nda o vanja kofeka yaco o mõla owelema kuenda ohali, kuenje ocinyi ci tekãvĩsua lalende aco.