ISAYA 49 - Embimbiliya - Bíblia Sagrada em Umbundu

¹ Alofeka viokokalunga, njeveleli, amanu vu kasi ocipãla, tavi. Yehova wa ñovonga tunde kokucitiwa kuange, tunde vimo lia mãi wa nukula londuko yange.

² Omẽla wange wo linga ndosipata ya tua, wa mbundisa vulembo weka liaye; wa ndinga usongo wa kungiwa; wa soleka ciwa vohombe yaye yovisongo.

³ Yu wa popia lame hati, A Isareli, vukuenje wange, hu likemãlĩsila.

⁴ Puãi nda linga siti, Nda likavisa ño oku talavaya, nda pesela ño ongusu yange, lacimue nda kuata. Haimo lumue esunga liange li kasi la Yehova, kuenda onima yange la Suku yange.

⁵ Kaliye Yehova, u wa sovola tunde vimo lia mãi okuti ndinga ukuenje waye woku tiuwiya Yakoba kokuaye, kuenda okuti Isareli ongolokela kokuaye, momo nda sumbiwa la Yehova, kuenda Suku yange wa linga ongusu yange,

⁶ eye wa linga hati, Oku linga ukuenje wange okuti o katula apata a Yakoba loku tiula ocisupe ca Isareli, oco ca leluka. Hu lingisavo ocinyi cavakualofeka oco eyovo liange li kale toke kasulilo ongongo.

⁷ Yehova, Onjovoli ya Isareli, haeye U waye o kola, wa popia lu wa pembuiwa, haeye wa nyehuĩwa lolofeka, haeye ukuenje wolombiali, hati, Olosoma vi ci mõla kuenje vi votoka. Ndaño olombuale vi ku fendela mekonda lia Yehova wa kolelua, haeye U o kola wa Isareli una wa ku nõla.

⁸ Ca popia Yehova ceci, hati, Nda ku kumbulula kotembo yiwa, keteke lieyovo nda ku ohela. Nda ku lava. Nda ku lingisa ocisila ceyovo komanu, okuti o tumbulula ofeka, kuenje o tepisila omanu ovipiñalo via linga alunda;

⁹ hu popi lolomandekua huti, Tundi; kuenda lava va kasi vowelema huti, Limõlẽhĩsi. Va lila lila volonjila, kuenda kolomunda violupele va sanga ulisilo wavo.

¹⁰ Ka va kuata onjala pamue enyona, owuya pamue utanya ka u va kakula, momo u o va kuetele ohenda eye o va songuila haeye o va tuala kolono viovava.

¹¹ Olomunda viange viosi ndi vi lingisa onjila, kuenda alila ange ndi a tapikisa.

¹² Va tunda kupãla, yu veya, vamue va tunda ko Norte, vamue kutakelo wekumbi, vamue kofeka ya Sini.

¹³ Ailu, imba lonjolela; angongo, sanjuka; alomunda, kaluki loku imba ovisungo. Momo Yehova wa lemba omanu vaye, ava vaye va tala ohali o va linga ohenda.

¹⁴ Puãi Siono hati, Yehova wa njanduluka, Ñala wa njivala.

¹⁵ Ukãi nga, ivala omõlãye o nyama okuti ka lingi ohenda omõla wovimo liaye? Oco muẽle, ci tava okuti ava va ivala, ame, puãi siu ku ivala.

¹⁶ Ociluvialuvia cove nda ci luvikiya povaka ange, ovimbaka viove vi kasi ño hũ kovaso ange.

¹⁷ Ava va ku tunga va yayulako, kuenje vakuaku ku nyõla la vakuaku ku punda va ku tunda va enda.

¹⁸ Petula ovaso ove, vanja kuosi, kuenje tala, vosi va liongoluila kumosi, veya kokuove. Ocili, ndeci ñasi lomuenyo, o liposuisa lavo, o va wala ndeci ondombua yi limiangulula. Oco ca popia Yehova.

¹⁹ Alunda ove kuenda akalasoko lofeka yove ya nyolẽha cilo vi linga vitito, okuti omanu vove ka va suimo. Ava va ku lia va kala ocipãla love.

²⁰ Omãla vove va citiwa kotembo yohali yove va popia love vati, Kulo kutito. Nyĩhe ocitumãlo oco nungemo.

²¹ Oco o popia lutima wove huti, Helie wa va nyitila? Ame nda fisa omãla vange, haime ndisiũle, haime ndicingendeleyi coku tungayala. Ava, helie wa va tekula? Ocili nda siwa lika liange; ava va kala pi?

²² Ca popia Ñala Yehova ceci, hati, Tala, mayuila eka liange ku vakualofeka, nulikila omanu epandela liange; kuenje veya lomãla vove valume volonete viavo, lomãla vove vakãi va vambata povitãi viavo.

²³ Olosoma vi linga ovilelamãla viove kuenda vainakulu vavo va linga ovanyamisi vove. Va ku fendela lovipala viavo posi, va lesa oneketela yopolomãi viove. Oco o kũlĩha okuti ame ndi Yehova, kuenje ava va njimbila ovaso ka va kutiwa osõi.

²⁴ Ocindululu hẽ ci nyẽhĩwa eci a kuata? Ava va kuatiwa longangala hẽ va popeliwa?

²⁵ Ca popia Yehova ceci, hati, Ndaño ava va kuatiwa locindululu va popeliwa, lava va linga olohuate viongangala va kutuluiwa, momo ame ndi tamãlãla lu o tamãlãla love kuenje mopela omãla vove.

²⁶ Ava va ku talisa ohali, ndi va takĩlĩsa ositu yavo muẽle, va kolua osonde yavo muẽle ndovinyu vi sõsa. Oco vakuatimba vosi va kũlĩha okuti ame ndi Yehova nda linga Upopeli wove, haime ndinjovoli yove, Ukuangusu ya Yakoba.