ISAYA 48 - Embimbiliya - Bíblia Sagrada em Umbundu

¹ Anjo ya Yakoba, yevelela. Ene wa tukuiwi londuko ya Isareli, kuenda wa tundi kocikoti ca Yuda; haene vu lisinga londuko ya Yehova, loku tukula Suku ya Isareli, puãi halociliko, pamue lesunga.

² Momo va litukula vati, Tuakuimbo li kola, kuenje va litanẽla la Suku ya Isareli, onduko yaye Yehova Ukualohoka.

³ Puãi eye wa popia hati, Ovina viale nda vi sapula tunde kosiãhũlu, via tunda vomẽla wange kuenje nda vi lombolola; ocipikipiki nda vi linga kuenje via lingiwa.

⁴ Omo nda kũlĩha okuti wukuombinde kuenje osingo yove ya linga ndolusipa lutale, kuenda upolo wove ndosipi,

⁵ oco nda ku vi sapuila tunde kosiãhũlu. Osimbu ka via lingiwile nda ku vi lomboluila, sanga o popia huti, Ociteka cange ca vi linga. Ociñumañuma cange ca songiwa, lociñumañuma cange cutale ovio via vi handeleka.

⁶ Cosi eci wa ci yeva, cilo wa ci mõla; kaliye he, ku ci imbila uvangi? Tunde cilo hu sapuila ovina viokaliye haivio alumbu kua la a kũlĩha.

⁷ Via sowiwa cilo, ka via sovuiwile kosiãhũlu, kua vi yevele, te etali; sanga o popia huti, Ota, nda vi kũlĩha ale.

⁸ Ocili kua la vi yeva, kua la vi kũlĩha. Tunde kosiãhũlu etũi liove ka lia situlukile. Momo nda ci kũlĩha okuti wukuosuanji wa lua, haive wukuakusina tunde kokucitiwa kuove.

⁹ Ndi likandangiya onyeño mekonda lionduko yange, ndi yi likandangiya muẽle mekonda liunu wange, oco siu ku nyõli.

¹⁰ Nda ku yelisa puãi handopalatako, nda ku seteka vofolono yohali.

¹¹ Ndi ci lilingila ame muẽle. Ci tava nga oku vĩhĩsa onduko yange? Ulamba wange siu weci kukuavo.

¹² Njevelele, a Yakoba, Njevelele, a Isareli wa kovongiwa lame! Ame muẽle, haime Tete, haime Kuasula.

¹³ Eka liange lia seveta ociseveto congongo, eka liange liondio lia yala ilu; Eci ndi vi kovonga vi votokela kumuamue.

¹⁴ Ene vosi, liongololi ho yevelela! Helie pokati kene wa sapula ovina evi? Yehova u sole, eye muẽle Kuro, o linga ocipango caye la Bavulono, okuokuo kuaye ku pokuisa va Kaldea.

¹⁵ Ame, ame muẽle nda ci popia, haime ndo kovonga, ndo nena, nda yelisa onjila yaye.

¹⁶ Kokeli ocipepi lame, yeveleli eci: Tunde kefetikilo sia popele uyombeki, tunde kefetikilo liaco haiko ñasi. Kaliye Ñala Yehova wa numa, haicovo Espiritu liaye.

¹⁷ Eci ca popia Yehova upopeli wove, haeye U o kola wa Isareli, ceci, hati, Ame ndi Yehova Suku yove, hu longisa eci cu ku kuatisa, hu songuila vonjila ya ku sungulukila.

¹⁸ Nda wa yevelile ovihandeleko viange! Nda ombembua yove nda ya lingile ndolui, kuenda esunga liove ndapuku okalunga;

¹⁹ ombuto yove nda ya lingile ndeseke, omãla vovimo liove ndeseke lia lua; onduko yove nda ka yi takata pamue oku nyolẽhẽla kovaso ange.

²⁰ Tundi vo Bavulono, tili vo Kaldea, ci sapuli londaka yovisungo, vilikiyi, sapuli, ci yevalisi toke kesulilo liongongo hoti, Yehova wa yovola ukuenje waye Yakoba.

²¹ Eci a va songuila vakango ka va yevele enyona; wa ci panga okuti ovava a va tundila vewe; wa tola ewe, kuenje ovava a tumũha.

²² Yehova wa linga hati, Ka ku li ombembua kuava va linga cĩvi.