ISAYA 47 - Embimbiliya - Bíblia Sagrada em Umbundu

¹ Ofeko, amõla a Bavulono, loka, tumãla voneketela. Amõla a va Kaldea, ku kuete vali omangu, tumãla posi. Ku tukuiwa vali, vati, Wa leñela, pamue wa lenda.

² Tumãla pombambo, sula osema, liupa oluwavili, punda olonanga, ovolu a mõlẽhe, vuva volondui.

³ Epõlõla liove li sikuluĩwa, losõi yove yi muiwa. Fetuluinya, ndaño omunu siu supisapo.

⁴ Onjovoli yetu, onduko yaye Yehova Ukualohoka, eye U o kola wa Isareli.

⁵ Amõla a va Kaldea ukãi, tumãla loku ũha, kuende apa pali owelema, momo ku tukuiwa vali, vati, Inakulu yovoviali.

⁶ Nda temẽle lomanu vange, nda liñisa ocipiñalo cange; nda va eca peka liove kuenje kua va lingile ohenda; ndaño ava va kuka wa va fukĩlĩsa lomi yove.

⁷ Wa popia huti, Ame ndinakulu ka pui. Oco ovina evi kua vi sokoluile, kuenje kua ivalukile esulilo liavio.

⁸ Oco, okuaku sanjukila asanju oluali, yevelela. Ocili ukuakutumãla ciwa, loku sakalala lakamue, kuenje o popia popia lutima wove huti, Ame ame, ka ku li vali ukuavo, te ame. Si lingi ocikuluwiya. Si kulĩha oku fisa omãla. Oco yevelela ondaka eyi.

⁹ Ovina evi vivali vi ku sanga ocipikipiki, keteke liongongo, O fisa omãla kuenda o linga ocikuluwiya. Ndaño o kasi lovombanda a lua kuenda olomindi viove via lua, haimo olohali evi viu ku wila olumue.

¹⁰ Momo wa kolela evĩho liove, wa popia huti, Lomue o ndete. Olondunge viove kuenda ukũlĩhĩso wove via ku lueyisa. Wa popia lutima wove huti, Ame ame, ka ku li vali ukuavo, te ame.

¹¹ Puãi evĩho li ku wila, kuenje evĩho liaco oku ku liupa ndaño vakuakutãha vove ka va ci tẽla. Ohali layovo yi ku wila kuenje ku tẽla oku yi liteyuila. Okunyolẽha ku ku sanga ocipikipiki, kuenje ove ku kũlĩha ndomo o tẽla oku lipopela.

¹² Kolapo lolomindi viove kuenda ovombanda ove a lua wa talavaya lao tunde kutila wove. Mbi lopo kuli elavoko okuti o linga cimue. Mbi lopo o tẽla oku yokokisa ovanyãli vove.

¹³ Wa kava lalungulo a lua. Kaliye vakuakutãha loku tepa ilu, lava va tala tala olombungululu, kuenda vakuakuvanja kosãi yokaliye ha va ku sapuila ovina viya, va votoke ha va ku popela.

¹⁴ Tala, va soka ndovinene, ondalu yi va lia. Ka va tẽla oku lipopela kongusu yulienge wondalu. Ondalu eyi handaluko yoku yota pamue yoku suñinyila.

¹⁵ Haico ava wa talavaya lavo, haivo va nganyãla love tunde kutila wove. Va yomboloka, u lonjila yaye, u lonjila yaye, ka ku li u o ku popela.