ISAYA 46 - Embimbiliya - Bíblia Sagrada em Umbundu

¹ Bele o kekama, Nevo o petama, oviteka viavio via kapiwa kovinyama viupange. Ovina wambayati via linga ovilemo kovinyama via kava.

² Vi petama, vi kekamẽla kumuamue. Ovilemo viaco ka vi tẽla oku lipopela puãi ovio muẽle vi kuatiwa, vi enda kumandekua.

³ Njevelele, anjo ya Yakoba, kuenda ocisupe conjo ya Isareli, wa ambatiwi lame tunde kokucitiwa kuene, wa lingi ocitele cange tunde vimo lia nyõho,

⁴ kuenje toke kokukuka kuene haime. Ndu wambati toke kowele wene. Ame nda lulika, haime nikula; Ame ngambata haime mopela.

⁵ Ame vu sokisa lelie okuti tu lisoka? Vu setahãisa la nye okuti tu lisetãhala?

⁶ Ava va sukumũla ulu vonjeke, loku pesalisa opalata lombalãsa, kuenje va feta utẽli wulu oku tunga lavio osuku, ovo muẽle noke va petamẽla osuku yaco loku yi fendela.

⁷ Va yambatela pocitãi, va yi tumbika kocitumãlo cayo, kuenje haiko yi talama; ka yi tẽla oku tunda vocitumãlo cayo. Nda umue o yi vilikiya ka yi tẽla oku kumbulula, ndaño oku u popela kohali yaye.

⁸ Avakuakulinga cĩvi, civaluki, ci sokololi loku ci sinyanyeha.

⁹ Ivaluki ovina viosiãhũlu, momo ame ndi Suku, ka ku li vali ukuavo. Ame ndi Suku, ka ku li u wa lisoka lame.

¹⁰ Tunde kefetikilo ndukuakusapula evi viefulilo. Tunde kosiãhũlu ndukuakusapula ovina ka via lingiwile handi. Ndukuakupopia siti, Ocipango cange ci lingiwa, kuenda ndi lemulũla cosi nda panga.

¹¹ Ñovonga ongonga yokofeka kupãla kutundilo, kuenje eye o linga ocipango cange, Nda ci popia kuenje ndi ci linga; nda ci panga kuenje ndi ci tẽlisa.

¹² Njeveleli, ene wa tĩlĩsi ovitima viene, haene vu kasi ocipãla lesunga liange.

¹³ Okuyula kuange ku kasi ocipepi, ka ku kasi kupãla, kuenje eyovo liange ka li pañela. Ñapa eyovo liange vo Siono. Isareli ndu wĩha ulamba wange.