ISAYA 45 - Embimbiliya - Bíblia Sagrada em Umbundu

¹ Yehova wa popia lombuavekua yaye Kuro. Kuro eye una ndo kuata peka liondio okuti o yula olofeka loku itula olombunda violosoma okuti apito o yuluilua lolombundi ka vi yiliwa, Yehova wa popia laye, hati,

² Hu pitila kovaso; napikisa olomunda, neya apito osipi; neta olomimbiliko viutale.

³ Hu ĩha ovokuasi, a solekiwa lipako via solekiwa uyombeki oco o limbuke okuti ame ndi Yehova, Suku ya Isareli. Ame muẽle nda ku tukula londuko yove.

⁴ Mekonda liukuenje wange Yakoba, kuenda Isareli onõlĩwe yange, nda ku tukula londuko yove, nda ku luka ndaño kua ñulĩhĩle.

⁵ Ame ndi Yehova, ka ku li vali ukuavo, ka ku li Suku yikuavo, te ame; ndaño kua ñulĩhĩle haimo hu mãlẽhĩsa,

⁶ okuti omanu va kũlĩha tunde kutundilo wekumbi, kuenda tunde kutakelo wekumbi okuti ka ku li ukuavo, te ame ndi Yehova, ka ku li vali ukuavo.

⁷ Ndi sovola ocinyi, ndulika owelema, manga ombembua, sovola ũvi. Ame ndi Yehova, ndukuakulinga ovina evi viosi.

⁸ Availu, lokisi eyulo liesunga. Alende a lole esunga; ongongo yi yuluke ha yi yovi eyovo, esunga li kule lombili. Ame ndi Yehova nda ci panga.

⁹ U o litamãlãla lutungi waye, ngongo yaye! Ombia nga yi tamalala lutungi! Otuma he tu popia lu o tu vunga, tuti, O linga nye? pamue eci ci tungiwa hẽ, ci sapuila utungi, citi, Ku kuete ovaka?

¹⁰ U o popia la isiaye hati, Wa cita nye? ngongo yaye! ndaño u o popia lukãi hati, O muĩla nye olongembia?

¹¹ Ca popia Yehova U o kola wa Isareli, haeye utungi waye, ceci, hati, O mulila nga omãla vange? O handelekela nga upange wovaka ange?

¹² Ame muẽle nda lulika ongongo, haime nda sowilamo omanu. Ovaka ange muẽle a yala ovailu, haime nda tuma olohoka viao viosi.

¹³ Ame ndo katula lesunga haime ndo yelisila olonjila viaye viosi; eye o tunga imbo liange, haeye o kutulula olomandekua viange, puãi, ka ci lingila ofeto pamue onima. Oco ca popia Yehova Ukualohoka.

¹⁴ Ca popia Yehova ceci, hati, Ukuasi we Egito wiya kokuove, kuenje u linga wove; ndaño ufũlo wa va Etiõpia lowu wa va Savea, omanu vaco va lepa. Va ku kuama, va kutiwa lalienge kuenje veya, va ku fendela. Va livondela kokuove, vati, Suku o kasi love lika wove. Ka kuli vali osuku yikuavo te eye.

¹⁵ Ocili, Suku yove o lisalamisa, Suku ya Isareli eye Upopeli.

¹⁶ Vosi yavo va kutisua osõi haivo va munĩhĩsua. Vakuakutunga oviteka va tilila pamosi.

¹⁷ Puãi Isareli o popeliwa la Yehova, lepopelo liaco li enda ño-o hũ, ka li pui. Ku kutisua osõi, ku munĩhĩsua olotembo vi enda ño-o hũ.

¹⁸ Yehova, u wa sovola ilu, eye muẽle Suku, haeye wa lulika ongongo kuenje wa yi panga. Eye wa yi tumalĩsa. Ka yi sowilile ekalasoko, te yoku tungamo,— eye muẽle wa popia, hati, Ame ndi Yehova, ka ku li wiñi.

¹⁹ Sia popele uyombeki, pamue vofeka yowelema. Sia popele lombuto ya Yakoba siti, Sandiliyi vesanda. Ame ndi Yehova, mopia ocili, sapula ovina viesunga.

²⁰ Ene wa puluki kolofeka, likongeli, enjui, kokeli. Ava va ambayata ño oviteka via songiwa, haivo va likutilila kosuku ka yi tẽla oku popela, ka va kuete olondunge.

²¹ Sapuli ondaka yene, yi lombololi, oco muẽle, va ci vangule pokati. Helie wa ci sapuile ale osimbu? Helie wa ci lomboluile ale kosiahũlu? Sia ci lingile hẽ, ame ndi Yehova? Kuenje ka ku li Suku yikuavo, te ame, Ame ndi Suku yesunga, haime ndupopeli; ka ku li yikuavo, te ame.

²² Asukiyo oluali, njimbi ovaso ho popeliwa. Momo ame ndi Suku, ka ku li yikuavo.

²³ Nda ci lisila ame muẽle. Vomẽla wange mua tunda ondaka yocili kuenje ka yi tiukilamo, yiti, Olongolo viosi vi ñekamẽla lalimi osi a lisila londuko yange.

²⁴ Omanu va popia vati, Olohõlo lesunga vi kasi ku Yehova lika. Vosi vo temelele veya kokuaye kuenje va kutisua osõi.

²⁵ Puãi vakuambuto ya Isareli vosi va yula la Yehova, kuenje vo sambiliya.