ISAYA 44 - Embimbiliya - Bíblia Sagrada em Umbundu

¹ Puãi cilo okuenje wange, a Yakoba, a Isareli, u nda nõla, yevelela.

² Yehova, u wa ku lulika, haeye usovoli wove tunde vimo lia nyõho, haeye oñuatisi yove, eye muẽle wa popia hati, Okuenje wange, a Yakoba, a Nolĩwe yange, a Isareli wa soliwa, ku ka kuate usumba.

³ Njitila ovava kongongo ya kukuta; mitisa olondui vekango. Sukumuĩla Espiritu liange kombuto yove kuenda esumũlũho liange komãla vove.

⁴ Va yova ndowangu u kuete ovava pamue ndeyenje liokolondui.

⁵ Umue o linga hati, Ame ndukua Yehova, ukuavo o linga hati, Ame nda liluka Yakoba, ukuavo o sonẽha peka liaye hati, Ndukua Yehova kuenje o litukula londuko ya Isareli.

⁶ Ca popia Yehova Soma ya Isareli, haeye onjovoli yaye, haeye Yehova Ukualohoka, ceci, hati, Ame Tete haime Kuasula; ka ku li Suku yikuavo, te ame.

⁷ Helie wa lisoka lame? A votoke, a ci sapule loku ci ndomboluila. Tunde kosiahũlu helie wa imbaimba owanji wovina vi laika oku iya? Va tu sapuile ovina viya kovaso.

⁸ Ku ka kale lohele, ku ka kuate usumba. Sia ku ci sapuilile hẽ tunde kosiãhũlu loku ci lombolola? Ene muẽle vulombangi viange! Kuli nga Suku yikuavo, okuti ame hameko lika? Ka ku li Esenje likuavo, ame sia kulihile limue.

⁹ Vosi va songa oviteka vakuesanda; ovina va vi sanjukila ka vi silivila; olombangi viavio ka vi lete; ka vi kuete olondunge oco va munihĩsua.

¹⁰ Wosi o luvikiya ociteka kuenje o ci tukula hati, Suku, wa likembisa, omo wa tunga ño eci ka ci silivila.

¹¹ Vosi vakuopange waco va kutisua osõi. Vakuaku talavaya upange waco vosi omanu ño. Vosi yavo va likongele pamosi, va talame vilu, oco va yokokisua, kuenje va kutisilua pamosi osõi.

¹² Ocivinda ci tẽla ociteka, ci ci kapa vakãla, ci ci vunga lonjundo, ci ci tẽla lokuokuo kuaye kua pama. Naito naito onjala lenyona viya kuenje ongusu yaye yi tepuluka, letimba liaye li yonja.

¹³ O carpinteiro yi nãla ukolo yi ci taya lomemba, yi ci songa lolopalana kuenje yi ci seteka loloseteko, yi ci setahãisa lomunu, ndomunu wa posoka, ha ci kala vonjo.

¹⁴ Umue o timbula ovinendele, pamue o nõla ombuangalunda pamue ohumbi, pamue o nyañula uti umue ukuavo wovusenge, haiwo wa kũlĩwa la Suku kuenje ombela yo tekula

¹⁵ okuti u linga olõhũi viomunu. Eye o tiaña ho yoti, u siakãla ha yoki ombolo, noke o panga osuku ha yi fendela, o songa ociñumañuma ha ci kekamẽla.

¹⁶ O siakãla ocinimbu caco, o yoka laco ositu ha li he kuta; oco muẽle o yota, kuenje hati, Ndanduluka, nda mõla ondalu.

¹⁷ Ocisupe caco o ci linga osuku, ndaño ociñumañuma caye, o ci kekamẽla, kuenje o ci fendela, o likutililako hati, Mopele, momo ove vusuku yange.

¹⁸ Lacimue va kulĩha; ka va sokolola; ovaso avo a maniwa oco ka va lete, haico ovitima viavo oco ka va yevite.

¹⁹ Lomue wa ci sokolola ha kuata ukulĩhĩso pamue olondunge vioku linga hati, Ocinimbu caco nda ci siakãla, yu nda yoka ombolo lakãla aco, nda yokavo ositu, kuenje nda yi lila. Ocisupe caco hẽ nunga laco cumbondo? Anga, fendela enonga?

²⁰ O lialia etiko; umbinde wutima waye wo yapuisa, kuenje ka tẽla oku popela omuenyo waye ndaño oku popia hati, Peka liange liondio hẽ sia kuatele cimue cuhembi?

²¹ Ivaluka ovina evi, a Yakoba, a Isareli, momo vukuenje wange. Nda ku sovola, vukuenje wange; a Isareli, ku ivaliwa lame.

²² Okulueya kuove nda ku takatisa ndelende, kuenda akandu ove ndombundu. Tiuka vali kokuange omo nda ku yovola.

²³ Ailu, imba ocisungo, momo Yehova wa ci linga; angongo, kaluka! Alomunda, kaluki oku imba ocisungo; asisi kuenda oviti viosi vi kasimo, imbi; momo Yehova wa yovola Yakoba, kuenje o kemãla vo Isareli.

²⁴ Yehova upopeli wove, u wa ku sovola tunde vimo lia nyõho, eci a popia, ceci, hati, Ame ndi Yehova, haime nda sovola ovina viosi. Lika wange nda yala ilu loku tandisa ongongo. Helie wa ñuatisako?

²⁵ Ame muẽle natamaisa atutu olohembi, loku sepula vakuakutãha, haime niuwiya vakualondunge okuti olondunge viavo vi linga uveke.

²⁶ Puãi ñolĩsa ondaka yukuenje wange, kuenje nẽlĩsa elungulo liolomunga viange. Nukula Yerusalãi siti, O kala lomanu, kuenda ovaimbo a Yuda, siti, A tungiwa vali, ame muẽle numbulula alunda aco.

²⁷ Haime mopia lokalunga siti, Kukuta. Nakatisa olondui viove.

²⁸ Ame muẽle nukula Kuro siti. Eye ungombo wange, o lemulula ocipango cange cosi. Nukula Yerusalãi siti, Yi tungiwa. Mopia lonembele siti, Ociseveto cove ci sevetiwa.