ISAYA 43 - Embimbiliya - Bíblia Sagrada em Umbundu

¹ A Yakoba! A Isareli! Ca popia Yehova u wa ku lulika haeye wa ku sovola, ceci, hati, Ku ka yokoke, momo nda ku yovola; nda ku tukula londuko, wa linga wange.

² Eci o pita vovava ñala kumue love; leci o pita volondui ku vombi. Eci o pita vondalu ku pi, leci o pita vulienge ku kakuiwa.

³ Momo ame ndi Yehova Suku yove. U o kola wa Isareli eye upopeli wove. Nda eca Egito oku ku yovola. Nda ku pitisila Etiõpia kuenda Seva.

⁴ Omo ove wa soliwa ca piãla lame haive nda ku sumbila muẽle, kuenje hu sole cocili oco hu pitisila omanu, kuenje mitisila olofeka omuenyo wove.

⁵ Ku ka kuate usumba, momo ñasi kumue love. Njupa ombuto yove kutundilo wekumbi kuenje hu ongoluila kutakelo wekumbi.

⁶ Mopia la Norte siti, Va eca. Mopia la Sul siti, Ku ka va kuate. Neni omãla vange valume va kasi kupãla, kuenda omãla vange vakãi va kasi kasulilo ongongo.

⁷ Neni vosi va tukuiwa londuko yange, haivo nda va lulikila ulamba wange, haivo nda va sovola, loku va tunga.

⁸ Neni olomeke vi kasi lovaso, kuenda ovisitatuĩ vi kasi lovatuĩ!

⁹ Olofeka viosi vi ongolokele pamosi. Omanu vongoloke. Helie pokati kavo o tẽla oku ci sapula? Helie o tẽla oku tu lekisa ovina viale? Veye lolombangi viavo oco va yovoke, va yevelele ha va popi vati, Eci ocili.

¹⁰ Yehova hati, Vulombangi viange, vukuenje wange. Nda ku nõla okuti o ñulĩha kuenje o ñolẽla, loku limbuka okuti, Ame ame muẽle. Konyima yange ka kua la lulikiwa Suku yimue, ndaño kovaso yange ka ku kala.

¹¹ Ame, ame ndi Yehova ka ku li upopeli, te ame.

¹² Ame nda ci sapula, ame nda popela, kuenje ame nda ci lombolola eci ka pa kaile osuku yiñi pokati kene. Oco vulombangi viange. Oco ca popia Yehova.

¹³ Ame Suku, tunde nunde ame, ame muẽle, ka kuli umue o tẽla oku nyẽha eci ci kasi peka liange. Eci nunga elie o ci tungulula?

¹⁴ Ca popia Yehova, Onjovoli yene, haeye U o kola wa Isareli, ceci, hati, Mekonda liene numa ko Bavulono, neya ovikundiko viosi viumandekua wene, kuenje okuyolela kua va Kaldea ku pongoloka okulitetela.

¹⁵ Ame ndi Yehova, ame ndu wene o kola, haime ndusovoli wa Isareli, haime Soma yene.

¹⁶ Yehova,— u o tola elila vokalunga, kuenda o pitisa onjila valondo;

¹⁷ haeye o pongiya ekãlu lokavalu, kuenda olohoka viasualali. Va pekela ka va tẽla vali oku pasuka; va nyolĩwa pe va imiwa ndocinyaña,— eye muẽle wa popia hati,

¹⁸ Ko ka ivaluki ovina viale, ndaño oku sokolola ovina viosiahũlu.

¹⁹ Momo ñasi loku linga cimue cokaliye, ndopo ci mõlẽha: ko ci limbuka? Ñapa elila vekalasoko kuenda olondui vekango.

²⁰ Ovinyama viovusenge vi sumbila ndaño olombulu kuenda olombo; omo ngeca ovava vekalasoko kuenda olondui vekango, oku nyuisa omanu vange va nõlĩwa,

²¹ haivo omanu nda va lisovuila oco va sivaye.

²² Haimo, a Yakoba, kua ñovongele; a Isareli, nda ku kuma.

²³ Kua nenẽlẽle olomeme viove viovilumba vioku yoka; kuenje kua sumbilile lovilumba viove. Sia ku vumbisile lovilumba, ndaño oku ku kavisa linsensu.

²⁴ Kua ndandelele omuenge lolombongo viove, kua ñutisile ulela wovilumba viove. Puãi wa nuika akandu ove, kuenje wa ñavisa lolohole viove.

²⁵ Ame, ame muele, hu ecela oku lueya kuove mekonda lionduko yange. Si ivaluka vali akandu ove.

²⁶ Njivaluke, tu livangule pamuamue. Sapula ondaka yove okuti o yovoka.

²⁷ Kukululu yove wa linga ekandu, kuenda alongisi vove va ndingila ahuku.

²⁸ Oco nda liñisa ovasongui vocitumãlo ci kola, nda ecele Yakoba okuti o nyolẽha pe, kuenda Isareli okuti o pembuiwa.