ISAYA 42 - Embimbiliya - Bíblia Sagrada em Umbundu

¹ Tala ukuenje wange u ndu vetatela, onoliwe yange, utima wange wo sanjukila. Ndo wĩha Espiritu liange, eye o longisa olofeka esunga.

² Ka vilikiya; ka kaluka; ondaka yaye ka yi yevala voluwa.

³ Olunẽva lua sasũiwa eye ka lu teya, ocinyaña ci taima eye ka cimi; o longisa esunga kuenda ocili.

⁴ Ka tokoka, ka konyõha, te wa tumãlisa esunga kilu lieve; kuenje olofeka viokokalunga vi livela oku yeva ondaka yaye.

⁵ Yehova Suku, U wa lulika ilu, kuenje wa li yala, haeye wa sovola ongongo levi vi tundilamo; haeye wa fuimĩla omanu va tungamo, loku eca omuenyo kuava va endelamo; eye wa popia, hati,

⁶ Ame ndi Yehova, nda ku kovongela esunga. Nda ku kuata peka, nda ku silamẽla. Nda ku kapa ndocisila komanu kuenje o linga ocinyi colofeka,

⁷ oku patulula ovaso ka a lete, loku upa vokayike olomandekua, kuenda vokaliavoso ava va tumãla vowelema.

⁸ Ame Yehova, oyo onduko yange. Ulamba wange siu weci kumue wiñi, ndaño esivayo liange si li eci koviñumañuma.

⁹ Vanja, ovina viale via lingiwa, kuenje ndi sapula ovina viokaliye; osimbu ka via tundile ndu vi sapuila.

¹⁰ Imbili Yehova ocisungo cokaliye, imbili esivayo liaye tunde kovivanja viokilu lieve. Okalunga kõle lovina viosi vi kasimo, ndaño olofeka viokokalunga lava va tungamo.

¹¹ Ocisesenyãla kuenda ovaimbo aco vi kaluke, hao ovaimbo mua tunga Kedare. Va Sela va imbe lonjolela, va kalukile kilu liolomunda.

¹² Va ece ulamba ku Yehova, va sapuile esivayo liaye volofeka viokokalunga.

¹³ Yehova o tunda ndesualali, o yuka onyeño ndu enda kovita, o vilikiya, haeye o kaluka, o lipamisila ovanyãli vaye.

¹⁴ Osimbu yalua ndonjukile, ndohĩle, nda likandangiyile; kaliye mbilikiya ndukãi o kasi lolongembia, sakoka loku laka.

¹⁵ Nyõla olomunda kuenda ovikandulukua, ñukutisa ovikũla viavio. Olondui ndi vi lingisa ovifuka, loviva ndi vi kukutisa.

¹⁶ Songuila olomeke velila ka via kũlĩhĩle, nda vi songuila volonjila ka vi vi. Owelema u kasi kovaso avo ndu lingisa ocinyi, locivulukua ndi ci tapikisa. Evi ovio ovina ndinga, si vi yanduluka.

¹⁷ Ava va kolela oviteka via songiwa va tiuwiwa, kuenje va kutiwa osõi, ndaño ava va popia loviñumañuma viutale vati, Ene vulosuku vietu.

¹⁸ Avisitatuĩ, yeveleli; alomeke, vanji oco vu mole!

¹⁹ Helie omeke nda hokuenje wangeko? Helie ocisitatuĩ nda hamunga yangeko? Helie omeke nda hacilitumbike cangeko? Helie omeke nda hokuenje wa Yehovako?

²⁰ O lete ovina via lua puãi ka vi limbuka; ovatuĩ aye a situluka, puãi ka yevite.

²¹ Ca sanjuisa Yehova oku situlula ondaka yaye loku yi kemãlĩsila esunga liaye.

²² Puãi omanu ava va liañiwa loku pundiwa, va kuatiwila vakueve, va yikiwa votuyike; va kuatiwa ndolomandekua kuenje ka kuli ava va va popela. Va linga olohuate kuenje lomue o leñako hati, Va eca.

²³ Helie pokati kene o ci vonguila etũi? Helie o yevelela okuti o yeva evi viya?

²⁴ Helie wa eca Yakoba kukuakukuata? Helie wa eca Isareli kovingumba? Ha Yehovako una tuo lingila akandu? Haeye volonjila viaye ka va tavele oku endelamo, kuenda ka va pokuile kovihandeleko viaye.

²⁵ Oco wo katuila onyeño yaye kuenda ongusu yocilunga, yo kakula, puãi ka co lombolokele; yo yoka, haimo ka ci kapele kutima.