ISAYA 41 - Embimbiliya - Bíblia Sagrada em Umbundu

¹ Alofeka viokokalunga, uhĩli kovaso ange. Omanu va kuate olohõlo viokaliye, vameko, va lombolole cavo; tu likongeli ha tu yali ekanga.

² Helie wa katula umue wa tunda kutundilo, haeye wa yula cosi a katukila? Una wo katula wo wĩha olofeka okuti o kosa olosoma lolomãi viaye, kuenje o vi lingisa ndoneketela losipata yaye, pamue ndovinene via pungua lofela lohonji yaye.

³ O va lupuisa kuenje o pita ño lulelu, ndaño vonjila ka la liatelamo lolomãi viaye.

⁴ Helie wa ci panga loku ci linga, yu wa kovonga ovitumbulukila tunde kefetikilo? Ame ndi Yehova, ame Tete, haime Kuasula. Ame muẽle Suku, ame nda ci linga.

⁵ Olofeka viokokalunga via ci mõla kuenje via yokoka, asulilo okilu lieve a luluma, kuenje amako, yu eya.

⁶ Vosi va likuatisa, omunu lu a lisungue laye, omunu lu a lisungue laye; kuenje omunu o popia lukuavo hati, Kolisako.

⁷ Oco omesele yi hãlĩsa u o talavaya lulu, kuenje u o lemũlũla lomatelo o hãlĩsa u o tẽla lonjundo; oku tukula etokekiso, o linga hati, Liwa, kuenje o ci valela lolombambo okuti ka ci señenya.

⁸ Puãi a Isareli, ove vukuenje wange. A Yakoba, ove muẽle nda ku nõla, haive umbuto yekamba liange Avirahama,

⁹ haive nda ku upa kasulilo okilu lieve, nda ku kovonga volohondongolo viaco, kuenje nda popia love siti, Vukuenje wange, nda ku nõla, sia ku nyehuĩle.

¹⁰ Ku ka kuate ohele, momo ñasi love. Ku ka yokoke, momo ndi Suku yove! Ame hu kolisa, hu kuatisa; hu kuata leka liange liondio hailio liesunga.

¹¹ Tala, vosi va ku temẽla va kutisua osõi loku munĩhisua. Va tamalãla love va takata, kuenje va nyolẽha.

¹² O vanjiliya ava va tamalala love puãi ku va sangi. Ava va ku yakisa va takata olumue.

¹³ Momo ame Yehova, Suku yove, hu kuata peka liondio. Ame muẽle mopia love siti, Ku ka kuate usumba, hu kuatisa.

¹⁴ Apuka! a Yakoba! Ambuto ya Isareli! Ku ka kuate usumba! Yehova wa linga hati, Hu kuatisa, U o kola wa Isareli eye Onjovoli yove.

¹⁵ Hu lingisa ndomakina yokaliye yoku sasa, haiyo yi kuete ovayo a tua, kuenje o sasa olomunda loku vi keleketa, kuenje ovikandulukua o vi lingisa ndovisaikiti.

¹⁶ O vi tumũla kuenje ofela yi vi ambata, locipepe ci vi sandola, Ove puãi o sanjukila Yehova, kuenje o sambiliya U o kola wa Isareli

¹⁷ Eci olohukui lolosuke vi sanda ovava kuenje ka kuli, leci polosingo viavio pa kukuta lenyona, oco ame ndi Yehova, ndi va kumbulula, ame ndi Suku ya va Isareli, si va yanduluka.

¹⁸ Situlula olondui vovikandulukua violupẽle kuenda olono volomaka. Ekango ndi li linga ociva, kuenda ongongo ya kukuta yi linga olono viovava.

¹⁹ Vekango nuikamo ovinendele lovisonge, kuenda usombo loliveira; visesenyãla nuikamo ofaya, kuenda o pinheiro, kuenda buxo, kumuamue.

²⁰ Ndi ci linga okuti omanu va mola loku kũlĩha loku sokolola, loku limbukila kumuamue, okuti eka lia Yehova lia ci linga,, kuenda okuti U o kola wa Isareli wa ci sovola.

²¹ Yehova wa linga hati, Sapuli ondaka yene. Soma ya Yakoba wa popia hati. Tuali uvangi wene wa velapo.

²² Va tu vi sapuile. Va tu sapuilevo ovina viya. Tu sapuili ovina via pita konyima ndeci via kala okuti tu vi sokolola ha tu limbuka esulilo liavio; pamue va tu lekise ovina viya.

²³ Tu sapuili ovina viya ha tu limbuka ocili okuti vulosuku. Oco muẽle lingi cimue, ci kale ciwa, ci kale cĩvi, oco tu yuke usumba loku yokoka.

²⁴ Ya, hocimueko, ko lingi cimue. U o vu nõla o pembuiwa.

²⁵ Nda katula umue wa tunda ko Norte. Wa tunda kutundilo wekumbi kuenje o ka tukula onduko yange. O kosa olosoma ndonata ndeci ukualombia a kosa otuma.

²⁶ Helie wa ci sapula tunde kefetikilo okuti tu ci kũlĩha? Helie wa ci sapula osimbu ka ca lingiwile okuti tu popia tuti, Esunga? Ka kua kaile umue wa ci sapula. Ka kua kaile umue wa imba oluiya luaco. Ka kua kaile umue wa yeva olondaka viene.

²⁷ Ame tete nda ci sapula ku Siono. Haime nda tuma omunga ya sapula ondaka yiwa vo Yerusalãi.

²⁸ Puãi pokati koviteka viene ka pali uprofeto o kumbulula nda nda pula cimue. Eci ndi vi vanja ka vi silivila,

²⁹ viosi esanda, lovopange avio hacimueko. Oviñumañuma viavio viutale ofela kuenda esanda.