ISAYA 40 - Embimbiliya - Bíblia Sagrada em Umbundu

¹ Lembi, lembi omanu vange, oco ca popia Suku yove.

² Vanguli la Yerusalãi lolondaka viomboka. U sapuila okuti ovita viaye via pua, lakandu aye a eceliwa. U sapuilavo okuti peka lia Yehova wa yambuiwila luvali akandu aye osi.

³ Yeveleli ondaka yu o vilikiya hati, Peleli Yehova onjila vekalasoko; suñamisi vekango elila lia Suku yetu.

⁴ Ovimbota vi vembikiwa; ovivulu viosi kuenda olomunda vi sokelela; apa pa kulukile pa tapika, kuenda akungu a linga etapi.

⁵ Ulamba wa Yehova u tukuluka kuenje omanu vosi vo muĩla kumuamue, omo omẽla wa Yehova wa popia.

⁶ Yeveleli ondaka yu o popia hati, Vilikiya. Umue hati, Mbilikiya nye? Hati, Vakuetimba vosi va linga ndowangu, ulamba wavo wosi ndolonẽlẽho viusenge.

⁷ Owangu uvuka, onẽlẽho yi pilua, eci ofela ya Yehova yi sikako; ocili omanu owangu.

⁸ Owangu uvuka; onẽlẽho yi pilua; puãi ondaka ya Suku yetu yi tumãla ño-o hũ.

⁹ A Siono, amunga yondaka yiwa, londa komunda yisõvi. Kaluka ondaka yove. A Yerusalãi, amunga yondaka yiwa, kaluka ondaka yove. Ku ka kuate ohele. Sapuila ovaimbo a Yuda huti, Suku yene yu!

¹⁰ Tali, Yehova Suku iya lunene. Okuokuo kuaye ku u vialelako. Tali, onima yaye iya layo, lofeto yaye yeyi kovaso aye.

¹¹ O lisa ocunda caye ndungombo, ongolola otumeme vovoko aye, o tu ambatela ponete. O songuila levando evi vi kasi lomãla.

¹² Helie wa yonga okalunga peka liaye? Helie wa seteka ilu lepaluma? Helie wa yonga oneketela yokilu lieve vociyongelo? Helie wa pesalisa olomunda vombalãsa pamue ovivulu vocipesalo?

¹³ Helie wa longisa Yehova olondunge viovutima? Helie wa linga ondunguli yaye yoku u lungula?

¹⁴ Wa pinga kulie okuti o wimba onumbi? Helie wo longisa? Helie wo longisa oku endela vonjila yesunga? Helie wo longa ukũlĩhĩso? Helie wo lekisa onjila yolondunge?

¹⁵ Tala olofeka via soka ndetosi liovava vociyenjo, kuenje via tendiwa ndoneketela vombalãsa; o yelula ovifuka viosi ndokaneketela.

¹⁶ Ndaño Levanone ka yeci olõhũi vi tẽla oku u siakãlẽla, lovinyama viaco ka via tẽlẽle kocilumba coku u yokela.

¹⁷ Olofeka viosi kokuaye hacimueko. Wa vi vanja hati, Ka vi silivila, akalasoko ño

¹⁸ Oco vu setahaisa Suku lelie? Vu u sokisa le? Vu u sokisa nga lociteka?

¹⁹ Ociteka ci tungiwa lomunu, locivinda ci ci laña lulu, kuenje ci ci tungila alienge opalata.

²⁰ U o yongola oku litungila ociteka cuti o nola uti ko voli, noke o kovonga ukuopange waco ho tungila ociteka ka ci lisengi.

²¹ Ka wa ci kulĩhĩli? Ka wa ci yeveli? Ka co sapuiwili tunde kefetikilo? Ka wa ci limbukili tunde poku sevetiwa kuoluali?

²² Eye, eye una o tumãla kilu liombunje yoluali, kuenje olonungi vialuo vi molẽha ndapange? O yala ilu ndongumbo, o li nyanyumũla ndombalaka oku kalamo.

²³ O ketisa olosoma; lolonganji viokilu lieve o vi lingisa viesanda.

²⁴ Vi pekiwa okasimbu kaño pamue oku wayiwa, lolombombo viavio ka via tuamẽlẽle ocili posi; oco o vi sikila ofela yaye kuenje vi uwuka. Ocipepe ci vi ambata ndovinene.

²⁵ U o kola wa popia hati, Vu sokisa lelie okuti ndi lisoka laye?

²⁶ Petuili ovaso kilu, vanji; helie wa vi lulika? U o vi tundisa lumosi lumosi vohoka yavio poku vi tukula olonduko,— eye wa vi lulika. Kuenje omo unene waye wa piãla longusu yaye ya lua cimue oco lalumue lu kambapo.

²⁷ A Yakoba, nye wa ci popela? A Isareli, wa linga ndati, huti, Yehova ka lete ndomo ci pita pita lame, Suku yange ka netuluila lesunga?

²⁸ Kua ci kũlĩhĩle? Kua ci yevele? Yehova eye Suku ka pui haeye Usovoli wilu lieve liosi. Eye ka lendi ndaño oku kava, olondunge viaye ka vi kulãihãiwa.

²⁹ O kolisa ava va lenda, o vokiya olohõlo ku ka vi kuete.

³⁰ Ndaño akuenje va lenda loku kava, kuenda amalẽhe va fa ipepe;

³¹ puãi ava va imba Yehova ovaso va sakumuha; va palãla lavava ndolongonga, va lupuka kuenje ka va kavi, va enda kuenje ka va vela epuila.