ISAYA 39 - Embimbiliya - Bíblia Sagrada em Umbundu

¹ Koloneke viaco Merodaki-Valadani, omõla a Valadani, Soma yoko Bavulono, wa tuma ku Hesekiya olomunga via ambata ovikanda lombanjaile, omo a yeva okuti Hesekiya wa velele kuenje wa kaya.

² Hesekiya wa vi sanjukila, kuenje wa vi lekisa etambo omu mua selekiwa ovipako viaye viopalata, lulu, lolosimbolua kuenda ulela wa tila. Wa vi lekisa onjo yosi omu mua kala ovimãlẽho viaye kuenda ovikuata viaye viosi. Vonjo yaye pamue vuviali waye ka mua kaile cimue okuti Hesekiya ka ci lekisile.

³ Oco uprofeto Isaya eya ku Soma, wa popia laye hati, Omanu ava vati nye? Eci veya kokuove va tundilila pi? Kuenje Hesekiya hati, Va tunda kofeka yocipãla, ko Bavulono.

⁴ Oco a popia vali hati, Nye va muĩla vonjo yove? Hesekiya wa kumbulula hati, Va mõla cosi ci li vonjo yange. Volonjo viange vioku seleka ka mũli cimue sia va lekisile.

⁵ Oco Isaya wa popia la Hesekiya hati, Yevelela ondaka ya Yehova Ukualohoka, hati,

⁶ Tala, kuiya eteke okuti cosi ci kasi vonjo yove, kuenda cosi ca soleka olosekulu viove toke etali lilo, ci tualiwa ko Bavulono, lacimue ci siala. Oco ca popia Yehova.

⁷ Kuenje vamue pokati komãla vove alume, vakuetimba liove, wa cita ove muẽle, vambatiwa ha va lingi anuku velombe liosoma yoko Bavulono.

⁸ Oco Hesekiya wa popia la Isaya hati, Ondaka ya popela Yehova komẽla wove ya posoka. Momo wa sima, hati, Koloneke viange ku kala ombembua kuenda oku talala.