ISAYA 38 - Embimbiliya - Bíblia Sagrada em Umbundu

¹ Voloneke viaco Hesekiya wa vela kuenje wa sokele oku fa. Uprofeto Isaya, omõla a Amose, weya kokuaye, wa popia laye hati, Ca popia Yehova, ceci, hati, Sokiya onjo yove momo o fa, ku puluka.

² Oco Hesekiya wa pongolokela kocimano kuenje wa likutilila ku Yehova,

³ hati, A Yehova, nda likutilila kokuove. Ivaluka ndeci nda endela kovaso ove locili kuenda lutima wa sunguluka loku lingila eci ciwa kovaso ove. Kuenje Hesekiya wa lila ca lua.

⁴ Oco ondaka ya Yehova yeya ku Isaya, yiti,

⁵ Kuende, ka popie la Hesekiya, huti, Ca popia Yehova Suku ya so Daviti, ceci, hati, Nda yeva ohutililo yove; nda mõla asuelẽla ove; ota, koloneke viove mbokiyako ekuĩ lianyamo kanyamo atãlo.

⁶ Hu popela ove muẽle limbo lilo peka lia Soma ya Asuria, ame muẽle silamẽla imbo eli.

⁷ Ondimbukiso yi tunda ku Yehova yokuti o linga eci a popia; yeyi:

⁸ Eci ulembo wa amako ale kololosio yulembo ya Ahasi oco ndu tiuwisa ekũi kovilala. Kuenje ulembo wa tiukila konyima yoko wa pitile ale kololosio yulembo ekuĩ kovilala.

⁹ Ocisonẽhua ca Hesekiya Soma ya Yuda eci a sonẽha kovaso yokuvela kuaye lokukaya kuaye.

¹⁰ Nda lingile siti, Nyiñilĩla volombundi vionjembo osimbu anyamo ange a linga ndekumbi pongunji; nda pumba ocisupe canyamo ange.

¹¹ Nda lingile siti, Si mõli Yehova vofeka yava va kasi lomuenyo; si mõli vali omanu, ndaño olonungi viokilu lieve.

¹² Onjo yange ya sondoluiwa, ya njupiwa ndombalaka yungombo. Omuenyo wange wa iñiwa ndeci ci lingainga ukuakupota; wa tetiwa kocitutilo. Tunde omẽle toke oñolosi ñasi lolongembia.

¹³ Uteke wosi ndi leña leña toke omẽle. O teya akepa ange osi ndohosi. Tunde omẽle toke oñolosi ñasi lolongembia.

¹⁴ Ndukuakulila ndomiapia pamue ndepanda. Ndi leña leña ndopomba. Ovaso ange a vuvala loku vanja vanja kilu. A Yehova, ñasi lohali, ñolise.

¹⁵ Mopia nye? Eye muẽle wa popia lame, eye muẽle wa ci linga. Omo vutima mu vala ca lua oco oku pekela vali otulo si ci tela.

¹⁶ A Yehova, lovina ndovio omanu va kuata omuenyo. Pokati kovina evi viosi utima wange u kuata omuenyo. Oco ñayise, nyihe vali omuenyo.

¹⁷ Ohali ya lua nda kala layo ya ñuatisa. Omo wa takumuila akandu ange konyima yove, kuenje wa tiula omuenyo wange keyambo.

¹⁸ Momo Njembo ka ku pandula, Kufa ka ku kemainya. Ava va enda vonjembo ka va tẽla oku lavoka ocisola cove.

¹⁹ U o kasi lomuenyo, ocili muẽle, u o kasi lomuenyo, eye o ku pandula ndeci ame ñasi loku linga etaili. Onjali yi longisa omãla ocisola cove.

²⁰ Yehova eye o mopela, kuenje tu imbila ovisungo kumue lovisikilo viovikolo. Tu vi imbila vonjo ya Yehova oloneke viosi viomuenyo wetu.

²¹ Momo Isaya wa popele hati, Va nyañule ekende liakuyu loku li kapa pocipumbu caye okuti o kaya.

²² Hesekiya lahevo wa popele hati, Ondimbukiso yokuti ngenda konjo ya Yehova oyo ye?