ISAYA 37 - Embimbiliya - Bíblia Sagrada em Umbundu

¹ Eci Soma Hesekiya a ci yeva oco wa tola olonanga viaye, wa wala ocikẽlẽi, kuenje wa iñila vonjo ya Yehova.

² Wa tuma Eliakimi, kalei kasoma, la Sievena usonẽhi, kuenda akulu vovitunda va wala ikẽlẽi, kuprofeto Isaya omõla a Amose.

³ Va popia laye vati, Ca popia Hesekiya ceci, hati. Etali eteke liohali hailio eteke lieyambulo loku kutisua osõi; omãla veya koku citiwa kuenje ka ku li ongusu yoku va cita.

⁴ Mbi Yehova Suku yove wa yeva olondaka via Ravesiake una cime caye, Soma ya Asuria, a tuma oku fuanguila Suku yomuenyo, kuenda vali mbi Yehova Suku yove o yambuila olondaka viaco a yeva; oco likutililila ocisupe ca sialapo.

⁵ Eci akuenje va Soma Hesekiya veya ku Isaya,

⁶ Isaya wa popia lavo hati, Popi la cime cene, hoti, Ca popia Yehova ceci, hati, Ku ka kuatele ohele olondaka wa yeva, evi akuenje va Soma ya Asuria va nomba lavio.

⁷ Ota, ndu sakalaisa vutima poku u yevisa oloveti kuenje o tiukila kofeka yaye muẽle. Vofeka yaye muẽle omo ndu wipaisa losipata.

⁸ Oco Ravesiake wa tiukila, kuenje wa sanga Soma ya Asuria o kasi loku yaka la Livina, momo wa yeva ale okuti Soma wa tunda ale ko Lakisi.

⁹ Ca kala okuti Soma wa yeva ndomo Tirihaka osoma ya Etiópia o katukila. Oco eci a ci yeva wa tuma olomunga ku Hesekiya hati,

¹⁰ Popi la Hesekiya, Soma ya Yuda, hoti, Suku yove una wa kolela ka ka ku kembe hati, Yerusalãi ka li eciwa peka lia Soma ya Asuria.

¹¹ Tala! Wa yeva ale ndeci olosoma via Asuria via linga lolofeka viosi okuti via vi nyõla pe. Ove hẽ, ove o popelua?

¹² Olosuku viavo nga via popela olofeka olosekulu viange via nyõla? Olosuku viavo nga via popela Gosane la Harane kuenda Recefe la Telesare muna mua kaile omãla ve Edene?

¹³ Soma ya Hamati o kasi pi, kuenda Soma ya Arpade kuenda osoma yimbo lia va Sefariwayi, ya Hena leyi ya Iwa?

¹⁴ Hesekiya wa tambula ukanda waco povaka olomunga. Hesekiya wo tanga, kuenje wa lamana konjo ya Yehova loku u nyanyumuĩla kovaso a Yehova.

¹⁵ Hesekiya wa likutilila ku Yehova, hati,

¹⁶ A Yehova Ukualohoka, Suku ya Isareli, o kasi kilu lia va Keruvi; ove lika wove u Suku yovoviali osi o kilu lieve; ove wa lulika ilu losi.

¹⁷ A Yehova, vonguila etui liove hu yevi. A Yehova, patulula ovaso ove, hu mõli, yeva olondaka viosi via Senakeriva vina a tuma oku fuanguila Suku yomuenyo.

¹⁸ Ocili, a Yehova, olosoma via Asuria via nyõla olofeka viosi kuenda osi yavio,

¹⁹ via imba olosuku viavio vondalu momo halosukuko, puãi via tungiwa lovaka omanu, via tungiwa loviti pamue ovawe, oco via nyolĩwa.

²⁰ Kaliye a Yehova, a Suku yetu, tu popele peka liaye oco ovoviali osi okilu lieve a limbuke okuti ove, ove lika, u Suku.

²¹ Oco Isaya, omõla a Amose, wa tuma ku Hesekiya hati, Ca popia Yehova Suku ya Isareli ceci, hati, Omo wa likutililila kokuange Senakeriva, osoma ya Asuria,

²² oco ondaka Yehova o popela yeyi, hati, Omõla a Siono ukãi wa ku sepula kuenje wa ku yola epembe; omõla a Yerusalãi ukãi wa ku pukila utue.

²³ Ove wa sawula elie? Wa yola elie epembe? Wa kalukila elie loku u tunguila ovaso? Wa ci lingila U o kola wa Isareli.

²⁴ Wa sawula Yehova, kuenje wa popia huti, Nda londa kilu liolomunda lakãlu ange a lua. Nda pitila vokati ka Levanone; nda timbula ovinendele viaco viosi kuenda akoma aco a fina. Nda pitila toke konumbuko yaco ya sulako, ndaño vovisitu viaco.

²⁵ Nda fẽla ovisimo, kuenje nda nyua ovava. Nda kukutisa olondui viosi vie Egito lolomãi viange.

²⁶ Kua yevele ndomo nda ci sokolola ale osimbu? Eci ñasi loku linga cilo nda ci sokiya kosiahũlu cokuti ove o nyõla ovaimbo olombonge okuti a linga ovilundulundu.

²⁷ Omanu vaco, omo vakualohõlo vitito, va yokoka kuenda va tokotelua, va linga ndovikũla viovepia pamue ndowangu u talala, pamue ndowangu wokovailu olonjo una u kakuiwa lofela yi tunda kutakelo.

²⁸ Nda kũlĩha oku tumãla kuove, loku tunda kuove, loku iñila kuove. Nda kũlĩhavo onyeño wa ñuatela.

²⁹ Kuenje omo wa ñuatela onyeño yalua kuenje okulituna kuove kua njevala oco ñapa onjolo yange venyũlu liove lolelia yange vomẽla wove kuenje hu tiuwiya vonjila weyilila.

³⁰ Kuenje ci ku lingila ondimbukiso ceci, Elimeli vu lia evi via litundila, enyamuãli vu lia ombuto yalitundile aco; unyamo watatu oco vu kũla, vu lombola, vu tuika ayuva, loku lia epako liaco.

³¹ Kuenje ocisupe ca puluka conjo ya Yuda ci kuatela olombombo posi kuenje cimĩla epako kilu.

³² Momo vo Yerusalãi mu tunda ocisupe, lovomunda ya Siono mu tunda ava va puluka. Ombili ya Yehova Ukualohoka yi ci linga.

³³ Oco, ca popia Yehova oku tukula Soma ya Asuria ceci, hati, Ka iñila vimbo lilo, ndaño oku imbamo usongo, pamue oku amako lociyepelo, ndaño oku lilongekela ondunda.

³⁴ Onjila eyilila haiyo a tiukila layo, kuenje ka iñila vimbo eli. Oco ca popia Yehova.

³⁵ Momo ame silamẽla imbo eli okuti ndi li lipopelela muẽle loku li popelela ukuenje wange Daviti.

³⁶ Oco ungelo wa Yehova wa katuka, wa nyõla ocita lakũi ecelãlã kolohũlukãi kolohũlũkãi vitãlo komanu vocilombo ca va Asuria. Eci omanu va pasuka omẽle ociteketeke tala, va sanga okuti vosi ava va linga ovivimbi.

³⁷ Oco Senakeriva, Soma ya Asuria, wa tunda, wa tiukila kuenje wa tumãla ko Ninivei.

³⁸ Osimbu a kala loku fendela vonjo ya Niseroka, suku yaye, oco, omãla vaye Adirameleke la Siarecere vo wipa losipata, kuenje va tilila kofeka ya Ararate. Omõlaye Esarihadono wa piñala komangu yaye yusoma.