ISAYA 36 - Embimbiliya - Bíblia Sagrada em Umbundu

¹ Kunyamo wekuĩ lakuãla kondalu ya Soma Hesekiya, oco Senakeriva osoma ya Asuria, wa katukila olombonge viosi via Yuda, yu wa vi kuata.

² Kuenje Soma ya Asuria wa tuma Ravesiake oku tunda ko Lakisi ha endi lolohoka via lua ko Yerusalãi ku Soma Hesekiya. Kuenje wa talama kolekua yocisimo cokonano, velila liokocinyãlẽhẽlo colonanga.

³ Oco Eliakimi, omõla a Hilikiya, haeye kalei kasoma, kuenda Sievena usonẽhi, la Yowa, omõla a Asafe ukuaku sonẽha ovilinga viasoma, vo tundila.

⁴ Kuenje Ravesiake wa popia lavo hati, Kaliye popi la Hesekiya hoti, Ca pula Soma yinene, ndokuti Soma ya Asuria, ceci, hati, Ekolelo o kasi lalio lia soka ndati?

⁵ Wa sima okuti olondaka viaño ovio vimba ciwa onumbi haivio viu kuiha ongusu yoku yaka? Kaliye wa litumbika kulie omo wa ñualẽlãpo?

⁶ Tala! Wa liyeka ku Egito haeye ombueti yoluneva lua teka. Ombueti yaco yi toma eka liomunu wosi o kulamelako. Oco ci lingainga Fareo, osoma ye Egito, lava vosi vo kolela.

⁷ Puãi nda o popia lame huti, Tua kolela Yehova Suku yetu, ame siti, Heyeko una olonumbuko viaye kuenda itala viaye Hesekiya opapo, yu wa popia la Yuda la Yerusalãi hati, Fendeli kutala u?

⁸ Yekelapo cimue la cime cange Soma ya Asuria, kuenje ame hu ĩhã olohulukãi vivali viotuvalu nda ove o tẽla oku sanga ava vaendelako.

⁹ Oco o tẽla ndati oku tiuwiya ndaño umosi o sule pokati ka vakesongo va cime cange osimbu wa kolelela Egito akãlu ovita kuenda vakuakuendela kotuvalu?

¹⁰ Kuenda vali, ame nga nda katukila ofeka yilo oku yi nyõla osimbu sia pulile ku Yehova? Yehova eye muẽle wa popia lame hati, Katukila ofeka oyo, ka yi nyõle.

¹¹ Oco Eliakimi la Sievena la Yowa va popia la Ravesiake vati, Va popie lakuenje vove lelimi lia Suria momo tu li yevite; ku ka popie vali letu lelimi lia va Yuda osimbu omanu va kasi kilu liocimbaka va tu yeva.

¹² Puãi Ravesiake hati, Cime cange hẽ, wa Duma oku popia olondaka evi lene kuenda la cime cene? Ka numĩle hẽ kuava va tumãla kumue lene kocimbaka oku lia aniña avo loku nyua ovãsu avo?

¹³ Oco Ravesiake wa talama vilu, yu wa vilikiya londaka yinene velimi lia va Yuda hati, Yeveleli olondaka via Soma yinene haeye Soma ya Asuria.

¹⁴ Ca popia Soma ya Asuria ceci, hati, Hesekiya ka ko kembi momo ka tẽla oku u popela.

¹⁵ Ko ka tavi okuti Hesekiya o popia lene hati, Koleli Yehova, loku linga hati, Ocili, Yehova o tu popela;— momo imbo lilo ka li eciwa peka lia Soma ya Asuria.

¹⁶ Ko ka tavi ku Hesekiya, momo ca popia Soma ya Asuria ceci, hati, Linãlĩsi lame, kuenje tundi, enjui kokuange oco vu lia vosi, omunu kuyuva waye, omunu kuyuva waye; omunu kukuyu waye, omunu kukuyu waye, kuenje vosi vu nyuanyua, omunu kocisimo caye, omunu kocisimo caye,

¹⁷ toke njiya siu tuali kofeka ya soka ndofeka yene muẽle, ofeka yolomema lovinyu; ofeka yolombolo loviumbo viayuva.

¹⁸ Lunguki sanga Hesikiya o vu lueyisa hati, Yehova o tu popela. Mu li nga osuku yimue pokati kolofeka ya popela ofeka yayo peka lia Soma ya Asuria?

¹⁹ Olosuku via Hamati la Aripade vi kasi pi? Olosuku via Sefariwayi vi kasi pi? Via popela hẽ Samária peka liange?

²⁰ Olosuku vi pi pokati kolosuku viosi violofeka evi via popela ofeka yavio peka liange, okuti Yehova o popela Yerusalãi peka liange?

²¹ Puãi ovo võha ño, layimue ondaka vo kumbulula momo ocihandeleko ca Soma citi, Ko ko kumbululi.

²² Oco Eliakimi, omõla a Hilikiya, kalei kasoma, kuenda Sievena, ukuakusonẽha, kuenda Yowa omõla Asafe ukuakusonẽha ovilinga viasoma, veya ku Hesekiya, olonanga viavo va vi tola tola, yu vo sapuila olondaka via Ravesiake.