ISAYA 35 - Embimbiliya - Bíblia Sagrada em Umbundu

¹ Ekalasoko lofeka ya kukuta vi sanjuka, ekango li yolela, kuenje li telẽha ndelosa;

² mu siata olonẽlẽho, kuenje li yolela lesanju kuenda ovisungo. Ulamba wa Levanone weciwa kokualio, kuenda eposo lia Karimele leli lia Sarone. Va mõla uwale wa Yehova, kuenda ulamba wa Suku yetu.

³ Kolisi ovaka ka a kuete ongusu. Pamisi olongolo via pokongua.

⁴ Popi la vakuanguele hoti, Kolisiko, ko ka kuati usumba! Tali, Suku yene iya lefetuluinyo kuenda onima ya Suku; ocili iya, o vu popela.

⁵ Oco ovaso olomeke a patuluka kuenda ovatuĩ ovisitatuĩ a situluka.

⁶ Oco ocilema ci somboka ndosonge, kuenda elimi liocitende limba ocisungo. Momo vekalasoko mu tunda ovava kuenda vekango olondui;

⁷ kuenje eseke lia sanya li linga ociva, longongo ya kukuta yi linga olono viovava; evungu liolombulu li pongoloka, li linga ocisave kuenda owangu u pongoloka, u linga oloneva lasisa.

⁸ Kuenje pa kala elila, lelila liaco li tukuiwa liti, Elila li kola. Vakuevĩho ka va endelamo. Vakuesanda ka va lueyisa u endelamo.

⁹ Ka mu kala ohosi kuenda ocinyama ca tema ka cendelamo; ka vi sangiwamo; puãi ava va yovoka ovo va endelamo.

¹⁰ Ava va yowiwa la Yehova va tiuka, veya ko Siono loku imba ovisungo. Kovitue viavo ku kala esanju ka li pui. Va kuata esanju lonjolela, kuenje esumuo loku leñaleña vi va tunda.