ISAYA 34 - Embimbiliya - Bíblia Sagrada em Umbundu

¹ Ene, alofeka, kokeli ho yevi. Ene, amanu, yeveleli. Ilu lieve li yeve, kuenda evi vie yukamo. Oluali lu yevelele kumosi levi vi tundamo.

² Momo Yehova wa temẽla olofeka viosi, kuenje wa funguila olohoka viavo viosi, wa va tetela onimbu yokuti va ipaiwa.

³ Vavo va pondiwa va inasiwa, kuenje elemba liovivimbi viavo li katuka, losonde yavo kolomunda yi pita ndolondui.

⁴ Olohoka viokilu vi sesemẽha, lilu li iñiwa ndociña. Olohoka vialio vi loka ndeci amẽla a loka kuyuva, pamue ndeci amẽla a loka kukuyu.

⁵ Momo osipata yange ya lepikiwila vovailu haiyo ya tua lonyeño. Tala, yi loka ha yi nyõli Edome lomanu vayo va pisiwa ale.

⁶ Osipata ya Yehova ye yuka osonde, haiyo ya lẽla lovilenga, ye yuka osonde yotumeme leyi yovitupi violohombo; ye yuka ovilenga violongẽla viovitupi violomeme. Momo Yehova o lumba ocilumba vo Basara haeye ipãla viakahandangala vofeka ye Edome.

⁷ Olonyani vi kupuiwila kumue lavio, lolonãle vi kupuiwila kumue lolonui. Ofeka yavo yi yuka osonde, losi yavo yi neta lovilenga.

⁸ Momo Yehova o kasi leteke liefetuluinyo, kuenda unyamo woku fetuluinyila ũvi wa lingiwila Siono.

⁹ Olondui vi Edome vi pongoloka bitumen kuenda ongongo yayo yi pongoloka enxofre; losi yayo yi pongoloka bitumen yi taima.

¹⁰ Ka yimiwa luteke lutanya; owisi waco u londa londa ño-o hũ oloneke viosi. Tunde kocitumbulukila eci toke kocitumbulukila cikuavo yi kala ekalasoko, tunde opo lomue o pitamo vali.

¹¹ Puãi ongonga locisaka ovio vi yi fuka, okacukucuku kuenda ocikuamanga ovio vi tungamo. Yehova o nyanyumuĩla ukolo wetatamiso kuenje o lowisila olombuale viayo opulumu yekundu.

¹² Onduko yayo va yi luka, vati, Kamuliuviali, lolombiali viayo viosi vimũha.

¹³ Vovikolo viayo mu tundila olosongo. Ocambanda kuenda olonjuanjua vi tundila volombonge viayo, yi linga avungu olombulu kuenda ocililo colombo.

¹⁴ Olonjui vi liñualẽhẽla lovimbungu, lohoha yi lilila yikuavo, ndaño ongendoteke oko yi kala, kuenje cu lingila ocipuyukilo.

¹⁵ Oko okacukucuku ka linga ocanju cako loku imbilako asaila, loku a seka loku vutama otumala tuako. Oko lakovo ku liongoluila oviselele, viosi vienda ulume lukãi.

¹⁶ Vanjiliyi velivulu lia Yehova loku tangamo. Pokati kevi viosi lacimue cimosi ci kambapo; lacimue ci kamba ukuavo. Momo omẽla wa Yehova wa ci handeleka, kuenje Espiritu liaye lia vi ongolola.

¹⁷ Eye wa vimbila ocela, kuenje eka liaye lia vi tepisila olofeka lukolo woku seteka. Kuenje ovio muẽle vi tungamo otembo ka yi pui, vi kalamo tunde kocitumbulukila toke kocitumbulukila.