ISAYA 33 - Embimbiliya - Bíblia Sagrada em Umbundu

¹ Acinyoi! Ngongo yove! Ove muẽle, lalimue eteke wa pundiwa. Acisuanji! Ngongo yove! Lalimue eteke wa lingiwila usuanji. Tuli wa liweka oku punda ove muẽle o pundiwa. Tuli wa liweka oku linga usuanji ove muẽle o lingilua usuanji.

² A Yehova, tu linge ohenda, ove tua ku imbila ovaso. Linga okuokuo kuetu olomẽle viosi, lingavo epopelo lietu kohali.

³ Eci omanu va yeva onjuela yove oco va tila, leci olofeka vi limbuka okuvotoka kuove, oco vi sandoka.

⁴ Ca pundiwa ci pupuluiwa ndeci ocimbonde ci pupolola. Omanu va ci wila ndeci olohuma vi wila wila.

⁵ Yehova wa kemãla momo wa tunga kilu; o yukisa Siono esunguluko kuenda esunga.

⁶ Koloneke viene eye u kalisi lolohõlo, eyovo li lua kuenda olondunge lukulĩhĩso. Oku sumbila Yehova oko ukuasi wove.

⁷ Tala, ovitunda vi vumba utala vi lilila posamua, lolomunga vioku livondela ombembua vi lila ca piãla.

⁸ Alila a wunda, olongende via liweka. Ovisila via nyolẽha. Olombangi vi pembuiwa. Ka kuli vali oku sumbila omunu.

⁹ Osi yi sumua kuenje yi vonga. Levanone yi sakalaisua kuenje yuwuka. Siarone ya linga ekalasoko. Basiyane kuenda Karimele, amẽla avo a loluka.

¹⁰ Yehova wa linga hati, Kaliye mbotoka, kaliye ñatuka, kaliye nãlãma vilu.

¹¹ Vu mina ovisaikiti, vu cita ovinene, okufuima kuene kua linga ondalu yu lia.

¹² Kuenje olofeka vi pia vi linga ndohela, pamue ndolosongo via tetiwa vi pila vondalu.

¹³ Ene vu kasi ocipãla, yeveleli eci nda linga; lene vu kasi ocipepi, tavi kunene wange.

¹⁴ Vakuakandu vo Siono va kasi lusumba, lava ka va tavele ku Suku va luluma. Helie pokati ketu o tẽla oku kala londalu yelisi? Helie pokati ketu o tẽla oku tumãla lokupia ka ku pui?

¹⁵ U endaenda lesunga kuenda o popia popia eci ca sunguluka, haeye o pembula onganyu yundiandia, kuenje o tutumula ovaka aye sanga a lamba kovitukiko, loku sitika ovatũi okuti ka yevi ondaka yoku pesela osonde, kuenda o patako okuti ka mõli cĩvi,—

¹⁶ eye o tunga kolomunda. Ombonge yaye yi kala vovikolo viovawe; okulia kuaye ku wihĩwa lovava aye o kasilili.

¹⁷ Ovaso ove a muĩla Soma vulamba waye, a mõla ofeka ya sanjavaila kupãla.

¹⁸ Vutima wove o sokolola vana va ku talisile ohali, huti, Una wa tendaele o kasi pi? Una wa pesalaisaile ulambu o kasi pi? Una wa tendaele olombonge o kasi pi?

¹⁹ Ku mõli vali omanu va ku kangisa. Ku mõli vali omanu va popia elimi liñi ku li yevite; haivo vakuopopi ko yevala.

²⁰ Vanja ko Siono imbo liolohongele vietu vioku felevela. Ovaso ove a mõla Yerusalãi oyo ocitungilo combembua, haiyo ombalaka ka yi sondoloka, apanji ayo ka a tukõwãiwa, povikolo viayo laumue u soyoka.

²¹ Puãi oko Yehova Ukuolamba o tu lingila olondui vinene kuenda ololekua omu ka mu piti owato woku tapula, ndaño onaviyu ya kemãla ka yi piti.

²² Momo Yehova eye onganji yetu haeye ombiali yetu. Yehova eye Soma yetu, eye o tu popela.

²³ Ovikolo viove via yonga, ka vi tẽla oku kolisa ongunji yaco, ndaño oku nyanyumũlã onanga yaco. Oco ovikuata via lua vi pundiwa kuenje va vi liamũila, ndaño ovilema vi komako.

²⁴ Layimue onungi yi popia yiti, Ndi vela. Kuenje omanu va tungamo va ecelua olohole viavo.