ISAYA 32 - Embimbiliya - Bíblia Sagrada em Umbundu

¹ Tala, eci osoma yi viala lesunga, lolombiali vi viala lesunguluko,

² va soka ndocivundilo coku tila ofela pamue ndocipundo coku tila ombela. Va soka ndolondui viovava vekango, pamue ndulembo wewe linene vofeka yekavo.

³ Oco ovaso ava va lete ka a patiko, kuenda atũi ava va yevite a yevelela.

⁴ Utima wukuanjanga u limbuka olondunge, kuenda alimi ava va kokoma a tava oku popia ciwa ciwa.

⁵ Eveke ka li tukuiwa vali ombuale, ndaño ondiandia ka yi tukuiwa ukuacili.

⁶ Momo eveke li popia uveke, kuenda utima waye u tumba ahala evĩho ha tomba tomba Suku, loku imbila Yehova uvangi wuhembi, loku limĩla ava va kasi lonjala, loku pumbisa ovava ava va kasi lenyona.

⁷ Uloño wondiandia uvĩ, o tumba tumba ahãla uvi oku nyõla olosuke lolondaka viuhembi, ndaño epingilo liosuke liesunga.

⁸ Puãi omunu wa sunguluka o tumba ahãla a sunguluka kuenje o linga onyima yeci ca sunguluka.

⁹ Ene akãi vakuepõi, votoki, yeveleli ondaka yange. Ene amãla vakãi haene wakuacekelela, vonguili atũi kondaka yange.

¹⁰ Ene akãi vakuacekelela, kovaso yunyamo koloneke vimue vu luluma momo oku kela ovinyu ku imũha, loku yunga apako ka ku iya.

¹¹ Ene akãi vakuepõi, lulumi; sakalali ene wakuacekelela; luli, kali epõlõla, wali ño ikẽlei volombunda viene.

¹² Litutuili volonete ovapia a posoka kuenda uyuva wa ima.

¹³ Litutuili osi yomanu vange yi kasi loku yunda olosongo lolosanyanya. Litutuili olonjo viosi viesanju vimbo liesanju.

¹⁴ Momo eyemba li siwa, kuenda imbo liowiñi li linga elunda. Omunda kuenda elavelo vi linga ño-o aleva a sanjuisa ovimbulu viusenge, pamue vi linga ulilo woviunda;

¹⁵ toke Espiritu o tunda kilu o tu sukumũhĩla, kuenje ekalasoko li linga epia liwa, lepia liwa li linga esisi.

¹⁶ Oco esunguluko li tunga vekalasoko kuenje esunga li tumãla vepia liwa.

¹⁷ Epako liesunga ombembua. Lonima yesunguluko utima wa tula kuenda ekolelo ka li pui.

¹⁸ Omanu vange va kala volonjo viombembua, kuenda vovitungilo via koka, lo vovitumãlo viepuyuko.

¹⁹ Esisi liosi li timbuiwa kuenje imbo li nyolẽha pe.

²⁰ Ene wa kũlĩli kolondui viosi wa sumũlũhi, haico ene weci ongombe locimbulu ha vi endi kuosi via panga.