ISAYA 31 - Embimbiliya - Bíblia Sagrada em Umbundu

¹ Ava va lokila ke Egito oku kuatisiwa, ngongo yavo! Va kolela otuvalu kuenda akãlu ovita omo a lua, va kolelavo vakuakuendela kotuvalu omo va pama ca lua, puãi ka va imbi ovaso ku U o kola wa Isareli, ndaño oku sanda Yehova.

² Eye haimo wa lunguka, kuenje o koka ohali, ka litiulamo lolondaka viaye, puãi o katukila onjo yolondingaĩvi loloñuatisi viava va lingainga evĩho.

³ Va Egito omanu, ha Suku ko. Kuenje otuvalu tuavo tuositu, havilelembiako. Eci Yehova olõla eka liaye, u o kuatisa o lipunduka, lu wa kuatisiwa o likasulapo, kuenje vosi va nyolẽhẽla kumuamue.

⁴ Momo ca popia lame Yehova ceci, hati, Ndeci ohosi pamue eyove liohosi li kumbila okulia kuayo, ka li yokokela onjuvungo pamue oku tilila onjuela yowiñi wovangombo u li tundila, haico Yehova Ukualohoka o loka oku yakela komunda ya Siono londundango yayo.

⁵ Ndeci olonjila vi vakula, haico Yehova Ukualohoka o lava Yerusalãi. O li vindikiya kuenje o li popela, O li ecela kuenje o li silamẽla.

⁶ Amãla va Isareli, tiukili ku ndeti wa lingili usuanji wa piãla.

⁷ Momo keteke liaco omanu vosi, omunu omunu, va inasi oviteka viavo viopalata levi viulu, evi ovaka ene o tongili haivio vio lingisi akandu.

⁸ U Asuria o kupuka losipata, puãi hasipata yomunuko, kuenje osipata yu lia puãi hasipata yoinunuko, kuenje o tila osipata. A kuenje vaye va linga apika.

⁹ Ewe liaye limũha locinjoko. Olosayendo viaye vi tila epandela loku luluma. Oco ca popia Yehova, ondalu yaye yi li vo Siono, ofolono yaye yi li vo Yerusalãi.