ISAYA 30 - Embimbiliya - Bíblia Sagrada em Umbundu

¹ Yehova wa linga hati, Omãla va sina, ngongo yavo! Va tẽlisa ehãla, puãi haliangeko; va likuminya ohuminyo puãi halespiritu liangeko, oco kakandu va vokiyako ekandu.

² Va katuka oku enda ke Egito puãi ka va pulile hã ha va yevi vomela wange. Va tilila vombonge ya Fareo, ha va vundi vulembo we Egito.

³ Oco ombonge ya Fareo yi ku kutisa osõi kuenje okuvunda vulembo we Egito ku ku pembuisa.

⁴ Momo ndaño vakesongo vaye va kasi ko Coana, kuenda olomunga viaye via pitila ko Hanesi,

⁵ haimo vosi va kutisiwila osõi omanu ka va tẽla oku va lingila cimue, haivo ka va va kuatisa pamue oku va lingila cimue, te oku va kokela osõi lesepu.

⁶ Ocitumasuku ca tumiwila ovinyama vio ko Sul. Va pita vofeka yohali kuenda yongongo, omu mu kuete olohosi, omange kuenda ondumbu. Mu kuetevo ombuta kuenda ondala. Ukuasi wavo va wambatela koloñoño viomãla vovimbulu, kuenda ovikuata viavo koloñoño violongamelo, ha va vi tuala komanu ka va va lingila cimue.

⁷ Momo Egito u kuatisa esanda kuenje ka ci silivila; oco ndo tukuila siti, Eye Rahava, ukuakutumãla ño.

⁸ Kaliye, kuende, ka ci sonẽhe kevaya kovaso avo; ci sonẽha velivulu okuti oloneke viokovaso ci linga uvangi ko pui.

⁹ Momo omanu ava va sina, haivo omãla vuhembi, omãla ka va tava kokulonga kua Yehova.

¹⁰ Va popia lavakuavitumasuku vati, Ko ka mõli vali ovinjoinjoi. Va popia lovaprofeto vati, Ko ka imbi vali owanji wovina viesunga. Popi letu usosẽle, longi elimbi,

¹¹ tundi vonjila, yapuki vonjila yaco, ku ka tu yevise vali U o kola wa Isareli.

¹² Oco, ca popia U o kola wa Isareli ceci, hati, Omo wa timĩ ondaka eyi kuenje vu kolela ekangiso lumbinde, loku liyeka kokuavio,

¹³ oco ekandu eli liu lingili ndokuvuluka kuocimbaka cisõvi haico ca yondovala, ci yongola oku ulumũha, lokuulumũha kuaco ku iya ocipikipiki.

¹⁴ Okunyõlẽha kuaco ku soka ndokunyõlẽha kuombia yinene yotuma okuti ya nyanyoha pe, lapa ya fila ka pa sangiwa okaciyo koku yukila ondalu piko, pamue koku sua ovava vocisimo.

¹⁵ Momo, ca popia Ñala Yehova, U o kola wa Isareli, ceci, hati, Vu popelua poku tiuka kuenda oku puyuka; ongusu yene yi tunda koku tulumũha kuenda oku kolela. Haimo ka wa taveli,

¹⁶ puãi wa lingi hoti, Hacoko, momo tu tila lotuvalu; oco vu tila; kuenje vu linga hoti, Tu endela kotuvalu tuolupesi; oco ava vo landuli va lupuka.

¹⁷ Ohulukãi yomanu yi tila esaluiso liomunu umosi, ene vu tila esaluiso liomanu vatãlo, toke vu siala nduti wepandela kilu liomunda, pamue ndepandela kondundango.

¹⁸ Oco Yehova o talamẽla oku u kuatisi; oco o katuka oku u lingi ohenda. Momo Yehova eye Suku yesunga; ava vo wimbila ovaso va sumũlũha.

¹⁹ Momo ene amanu wa tungi vo Siono ko Yerusalãi, ko lili vali. Eye u lingi ohenda eci vu vilikiya. Eci a yeva okuvilikiya kuene o u kumbululi.

²⁰ Momo ndaño Ñala o wĩhi ombolo yusuke kuenda ovava ohali haimo alongisi vene ka va salama vali, puãi ovaso ene a mõla alongisi vene.

²¹ Kuenje eci vu tiamẽla kondio pamue kepĩli oco ovatui ene a yeva ondaka yi tundilila konyima yene, yiti, Enjui, eyi oyo onjila, endelimo.

²² Oco winasi oviñumañuma viene via songiwa haivio via lañiwa lopalata, winasivo oviñumañuma viene via itilua havio via lañiwa lulu. Vu vi inasi ndovina via liña. Vu popia lavio hoti, Kuendi.

²³ Eye o lokisa ombela kombuto wa wayi posi, eca olomema viovaima a tunda posi. Olomema viaco vi lova, vi tekula ciwa omanu. Keteke liaco oviunda viene vi lila vovililo vinene,

²⁴ kuenda olongombe lomãla vovimbulu vi lima lima vovapia, vi lia lia ekela li kuete omongua, olomema viaco via yelelua lopa kuenda vi pekuiwa locipekulo.

²⁵ Kolomunda viosi visõvi kuenda kolondundango viosi visõvi ku kate olondui viovava, keteke liokukundula kua lua eci olombonge vi ulumũha.

²⁶ Kuenje owi wosãi u linga ndutanya kuenda utanya u vokiyiwa olonjanja epanduvali ndutanya woloneke epanduvali. Oco ci kala eteke Yehova a kuta epute liomanu vaye, loku sakula olombole a va tota eye muẽle.

²⁷ Tala, onduko ya Yehova yi tunda kupãla, ya tokota lonyeño, yiya vevonge liowisi, omẽla waye we yuka onyeño; elimi liaye ondalu yelisi;

²⁸ okufuima kuaye kua soka ndolui lua supoka lu pitila vosingo, ha sisi olofeka lusalo woku nyõla, loku kapa katama omanu ololelia vi lueyisa.

²⁹ Vu kala locisungo ndeci va imbaimba vuteke wofesta yi kola. Vu kala lesanju liovutima ndu enda loku sika kuolombendo oku enda komunda ya Yehova, ke Ewe lia Isareli.

³⁰ Kuenje Yehova o yevalisa ondaka yaye yulamba, o lekisa oku loka kuokuokuo kuaye. Cosi o ci linga pokati konyeño ya kãla lulienge wondalu yelisi kuenda etande liombela yociwe.

³¹ Va Asuria va yokokela ondaka ya Yehova eci a va veta lombueti yaye.

³² Kuenje okuveta kuosi kuombueti ya Ñala yina yeyambulo kuendela pamosi lokusika kuoloñoma lotulialia, osimbu o yaka lavo loku nyuña nyuña okuokuo.

³³ Utala wa pongiyiwa ale osimbu, wa pongiyiwila osoma, wa longa haiwo wa sanjavala. Ondalu yaco yinene lolohui via lua. Okufuima kua Yehova, kuna kua linga ndolui luofuofuo, oku ku yi siakãla.