ISAYA 3 - Embimbiliya - Bíblia Sagrada em Umbundu

¹ Momo tali, Ñala, Yehova Ukualohoka, upa ko Yerusalãi kuenda ko Yuda ekoliso kuenda ombueti, ekoliso liosi liokulia, kuenda ekoliso liosi liovava;

² onõi kuenda ukuavita; onganji kuenda uprofeto; ukuakutãha kuenda osekulu:

³ kesongo liakuĩ atãlo kuenda u wa kemãla, ukuenje welombe kuenda omesele, kuenda ocimbanda ca loñolõha.

⁴ Ngeca otuakuenje ha tu lingi olosoma viavo, loloñaña ha vi va viala.

⁵ Omanu va talisua ohali omunu lukuavo, omunu lukuavo, omunu omunu lu a lisungue laye. Omõla o likatukila losekulu, kuenda omunu waño lombuale.

⁶ Eci omunu o kuatela huvaye vonjo ya isiavo ha popi laye, hati, Ove o kuete uwalo, linga ombiali yetu kuenje ekundu eli li kala peka liove,

⁷ oco eteke liaco o liyula hati, Si lingi usakuisi. Vonjo yange ka mũ lĩ ombolo pamue uwalo. Ko ka ñapi ombiali yomanu.

⁸ Omo upopi wavo kuenda ovilinga viavo via likala Yehova, via vayela ulamba waye u kola, oco Yerusalãi ya nyolẽha kuenda Yuda ya kupuka.

⁹ Upopi wovimẽla viavo muẽle u va pisa. Va lekisa akandu avo ndo Sodomo, ka va a limbikile. Ngongo yavo momo va lilinga ovo muẽle cĩvi.

¹⁰ Sapuila vakuesunga okuti ci kala ciwa lavo, omo va lia epako liovilinga viavo muẽle.

¹¹ Ukuevĩho ngongo yaye, cĩvi oco caye, momo eci ca linga ovaka aye haico cu lingilua.

¹² Omanu vange we! Omãla va va talisa ohali, akãi va va viala. Amanu vange we! Ava vo songuili ovo vo lueyisi, kuenje va nyõla olonjila viene.

¹³ Yehova wa votoka oku yaka kuenje o taĩlĩlĩ oku tetuluila omanu.

¹⁴ Yehova wa yalela ekanga olosekulu viomanu vaye kuenda olosoma viavo, hati, Ene wa li ocumbo cayuva; ovikuata violosuke vi kasi volonjo viene.

¹⁵ Wa keleketeli nye omanu vange loku sasõla ovipala violosuke? Oco ca popia Ñala Yehova Ukualohoka.

¹⁶ Yehova wa popia vali hati, Omo omãla va Siono akãi va lisole kuenje va enda loku ngangavaisa olosingo loku kanga vovaso, lomo va endaenda loku tingita, loku linga njẽle njẽle lolomãi viavo,

¹⁷ oco Ñala o ci veta vovitue viomãla va Siono akãi, ha vi kala lolombande viapute. Yehova o situlula osõi yavo.

¹⁸ Keteke liaco Ñala upa eposo liovinunga viavo, leli liovifuto viavo, leli liovilimbo

¹⁹ kuenda ingẽlẽngẽle kuenda alienge okovoko, kuenda aluwavili,

²⁰ ovifuto kuenda alienge okovolu kuenda ovivia; olombutika vielemba kuenda olosĩlo;

²¹ olonẽla kuenda inunga viovanyulu;

²² uwalo wolofesta, olosali, olosalimanda kuenda akulimba;

²³ alumũilo opeka kuenda onanga yovalatanya kuenda andembendembe kuenda otupote tuetuli.

²⁴ Kuenje ci linga okuti ca sõsẽle ci sava; ca kaile uvia ci linga ukolo; ca kaile ocifuto ca posoka, ci linga evangu; ca kaile uwalo wonanga, ci linga ocikelẽi; ca posokele, ci kakuka.

²⁵ Alume vove va kunduka losipata kuenda asualali vove kovita.

²⁶ Olombundi viaye vi lisiõsiõla, yu o lila kuenje o siala upolokoso loku tumãla posi.