ISAYA 29 - Embimbiliya - Bíblia Sagrada em Umbundu

¹ A Arieli, a Arieli, a imbo kuna Daviti a tungile ocilombo,— ngongo yove! Unyamo kunyamo olofesta vi lingiwe ño-o.

² Haimo Arieli ndu talisa ohali, mu kala oku lila kuenda oku leña leña, lame ndu sokisa liko liutala.

³ Nunga ocilombo ci ku ñuala. Hu tungila ovotala elavelo. Hu ñualĩsa ocingonja.

⁴ Oco o popela kosi ya longa, upopi wove u tundilila voneketela; ondaka yove yi tundilila posi ndondaka yocilũlũ, kuenje okupopia kuove ku tundilila voneketela ndoku loñola.

⁵ Puãi owiñi wovanyãli vove u lisoka loneketela, lowiñi wolongangala u lisoka lovisaikiti vi telela. Ocipikipiki

⁶ eyambulo lia Yehova Ukualohoka liya. Liya lovilemĩlo kuenda olondindimo, lonjuvungo ya lua, liya locipepe lehunguhungu, kuenda ulienge wondalu yelisi.

⁷ Kuenje owiñi wolofeka viosi vi yakisa Arieli okuti vosi vo yakisa eye, loku yakisa ombonge yaye lava vo talisa ohali, vosi yavo va linga ndonjoi, ndocipitatulo cuteke.

⁸ Kuenje ci linga ndeci ukuanjala o lota onjoi okuti o kasi loku lia, puãi oku pasuka haimo a kasilili lonjala; pamue ndeci umue o kasi lenyona a lota onjoi okuti o kasi loku nyua, puãi oku pasuka haimo a kasilili lenyona, ka likuete. Haico ci kala lowiñi wolofeka u yakisa omunda ya Siono.

⁹ Liyokokisi. Saluki. Liveti upeke. Lingi olomeke. Kolui puãi halovinyuko. Yengengi puãi halovinako vi koluisa.

¹⁰ Momo Yehova wo sukumuĩli espiritu liotulo, wo patisi ovaso, ene wuvaprofeto; kuenje wa sikĩlĩla ovitue viene, ene wakuavitumasuku.

¹¹ Esituluilo eli liosi lio lingili ndelivulu lia yikiwa. Eci omanu va li eca ku wa kũlĩha oku tanga vati, Va li tange, eye o linga hati, Si ci tẽla momo lia yikiwa.

¹² Leci va li eca ku ka ci tẽla oku tanga vati, Va li tange, eye o linga hati, Si tẽla oku tanga.

¹³ Oco Yehova wa linga hati, Omo omanu ava vamẽla kokuange lovimẽla viavo loku sivaya lupopi wavo, osimbu ovitima viavo va vi amisa ocipãla lame, kuenje esumbilo liavo lioku sumbila lia tunda kocihandeleko comanu va ci patekela,

¹⁴ oco, tala, omanu ava ndi va lingila vali ovikomo, ndi va lingila muẽle ovilimbu lovikomo, kuenje olondunge violonoño viavo vi takata, hikũlĩhĩso wolombanga viavo u wundisua.

¹⁵ Ava va limbika Yehova ovipango viavo, kuenda ovilinga viavo via lingiwila vowelema, vati, Helie o tu lete? Helie wa tu limbuka?— ngongo yavo!

¹⁶ Ovina viosi ene vu vi ñualisa okatikitiki! Ukualombia hẽ o sokisiwa ndotuma, okuti ocina ca tungiwa ci tukula u wa ci tunga citi, Ka nungile?— pamue ocina ca lulikiwa ci tukula u wa lulika citi, Ka kuete uloño?

¹⁷ Levanone hẽ ndopo ka yi pongoloka ha yi lingi epia liovaima, kuenje epia lia limiwa hẽ ka li lingi ndesisi?

¹⁸ Keteke liaco ovisitatuĩ vi yeva olondaka vielivulu, lovaso olomeke via kaile voluvumbulu lowelema a leta.

¹⁹ Kuenje omanu va sule va sanga esanju liokaliye ku Yehova, lolosuke vi sanjukila U o kola wa Isareli.

²⁰ Momo ohangisi yi taka, kuenda ukuepembe imũha, lava va sokolola oku linga evĩho vopiwako,

²¹ haivo va pisa omunu loku pengisa latutu ondaka yimue a popia. Va tela onjanjo u o tetulula lesunga kolombundi, kuenje va pisa vakuesunga lelundi liesanda.

²² Oco Yehova, u wa yovola Avirahama, oku tukula onjo ya Yakoba, wa popia hati, Yakoba ka kutisua vali osõi, ndaño ocipala caye ka ci suvala vali.

²³ Momo eci omãla vaye va mola eci ca linga ovaka ange pokati kavo, oco va sumbila onduko yange, va sumbila muẽle U o kola wa Yakoba, va sumbila Suku ya Isareli.

²⁴ Ava va kamba esunga liovutima, ci va lomboloka, kuenda vakualonamalala va tava oku longisiwa esunga.