ISAYA 28 - Embimbiliya - Bíblia Sagrada em Umbundu

¹ Ekolowa liukasa lioloholua vie Efarimi, ngongo yalio! Lolonẽlẽho viulamba haivo viowuka vi kasi kovitue viava va kolua ovinyu, laviovo ngongo yavio!

² Ota, Yehova o kasi lu wa pama haeye ukuangusu, haeye wa soka ndekungukungu liociwe, pamue ndehunguhungu li nyõla, wa soka ndendunde lietande, o lundulula longusu.

³ Ekolowa liukasa lioloholua vie Efarimi li liataiwa lolomãi;

⁴ kuenje onẽlẽho yowuka yulamba yina yi kasi kutue womaka yovaima alua yi linga ndekuyu li teteka oku pia kondombo. Eci umue a li mõla tuli a li kuata peka o li lia.

⁵ Keteke liaco Yehova Ukualohoka o linga ekolowa liulamba. O kala kocisupe comanu vaye ndekofue liulamba,

⁶ haeye ecaeca utima wesunga kukuakutetulula; ecavo ongusu kuava va tiuwiya ovita kolombundi.

⁷ Ovo lavovo va hunga lovinyu, kuenda va yengenga levi vi koluisa. Ndaño ocitunda kuenda uprofeto va hunga lovinyu va yengenga levi vi koluisa. Ka va mõli ciwa ovinjoinjoi kuenje koku tetulula va lilondoaka.

⁸ Momo olomesa viosi vie yuka osanjo, ka pali apa ka pa kuete eliño.

⁹ Eye nga o longisa elie? Leci a yeva o ci lombolola kulie?— kuava va sumũha ale,— pamue kuava vopiwa kavele?

¹⁰ Momo ci kasi okandaka okandaka, okandaka okandaka; ocihandeleko ocihandeleko, ocihandeleko ocihandeleko; kulo kamue, oko kamue.

¹¹ Oco hacoko. Puãi Yehova o popia lomanu vaye lovimẽla via vakualofeka haivo vakuelimi liñi.

¹² Ale eye muẽle wa popele lavo, hati, Owusa haiwu, kavuluisi u wa kava; epuyuko hali,— Puãi ka va tavele oku yeva.

¹³ Oco ondaka ya Yehova kokuavo yi kala okandaka okandaka, okandaka okandaka, ocihandeleko ocihandeleko, ocihandeleko ocihandeleko; kulo kamue, oko kamue; okuti va enda va kupuka ocinyimaime, kuenje va teka, va fa vonjanjo, kuenje va kuatiwa.

¹⁴ Oco ene avakuepembe, haene wa viali omanu va kasi vo Yerusalãi, yeveleli ondaka ya Yehova.

¹⁵ Omo wa lingi hoti, Tua lisila la Kufa kuenje tua likuminya la Njembo, okuti eci endunde lieyambulo liya, ka li pitila kokuetu; momo uhembi owo wa linga ocikolo cetu kuenje elimbi lia linga ocipundo cetu,

¹⁶ oco, ca popia Ñala Yehova ceci, hati, Ota, vo Siono ñasi loku kapa ewe, ewe liaco lia setekiwa, hailio lia tĩla, li linga ewe lievindi liociseveto ca pama. U wa kolela ka kuete ohele.

¹⁷ Ocili ndi ci kapa ndukolo woku seteka kuenda esunga ndi li kapa ndopulumu yaco. Ociwe ci nyola ocikolo cuhembi, kuenda ovava a supokaila vocipundo.

¹⁸ Oco ocisila cene la Kufa cimũha, lohuminyo yene la Njembo ka yi ñuaima. Eci endunde lieyambulo li pita oco vu lundulua lalio.

¹⁹ Olonjanja viosi li pita liu wambati. Omo omẽle komẽle li pita, lutanya luteke, kuenda oku yeva ondaka yaco ku koka ño ocinjoko.

²⁰ Omo ohama yimbũmbũlu, oku tandavala ka ci tava, locilisikĩlĩlo citito, oku lisikĩlĩla ka ci tava.

²¹ Momo Yehova o katuka ndeci a linga komunda ya Peracimi, o tema ndeci a temẽle vomaka ya Giveone, okuti o linga upange waye,— upange waye u komõhĩsa!— ha lingi ocilinga caye,— ocilinga caye ci komõhĩsa!

²² Oco ko ka pembuli sanga ovikolo viene vi pamisua vali; momo nda yeva ondaka yenyõlẽho ya tunda ku Ñala Yehova Ukualohoka. Enyolẽho liaco li nyõla ofeka yosi.

²³ Kululi atuĩ; Njeveleli; Yeveleli kondaka yange.

²⁴ Ukuasaluwa he o lima ño-o, o tongeka ño oku lima? O tongeka ño-o hẽ oku pitisa osaluwa loku pitisavo ongalata?

²⁵ Eci a sokelisa osi yaco ka imbi hẽ ombuto yovingela, ka wayi hẽ okuminyu, ka kapi hẽ otiliku vilala, kuenda osevata apa yi sungulukila, kuenje kohulo yaco osepelta?

²⁶ Momo o longisiwa ciwa. Suku yaye u longisa.

²⁷ Oningele ka yi sasiwa locikuata ca tua, ndaño elola liokalosa ka va li pitaisa kilu liokuminyu, puãi oningela yi sasiwa likoti, okuminyu lombueti.

²⁸ Olomema vioku linga ombolo omunu o vi sula, ka vi sasa sasa ño-o. Eci o pitisa elola liokalosa li vi sandula ño, ka li vi keleketa.

²⁹ Eci lacovo ca tunda ku Yehova Ukualohoka, elungulo liaye li komõhĩsa, kuenda uloño waye wa piãla.