ISAYA 27 - Embimbiliya - Bíblia Sagrada em Umbundu

¹ Keteke liaco Yehova o yambula Canjangombe, onyoha yolupesi yi miloha, u yambula losipata yaye ya kola, yinene, haiyo ya pama, kuenje ipa onyoha yinene yi kasi vokalunga.

² Keteke liaco: Imbili ocisungo ocumbo cayuva.

³ Ame ndi Yehova ame ndukuaku ci tata, ndi ci tapaila olonjanja viosi. Ndi ci tata utanya luteke sanga umue o ci linga lãvi.

⁴ Onyeño si kuete. Nda nda kaile lolosongo kuenda olosanyanya vioku yaka lavio nda nda va katukila loku va yokela kumuamue.

⁵ Nda hacoko, va tilile kombonge yange. Va limbondele, va limbondele.

⁶ Koloneke viokovaso Yakoba o tuamẽla, Isareli o yova kuenje o telẽha. Va yukisa oluali luosi lepako liavo.

⁷ Wa va veta hẽ ndeci a veta ava va va veta? pamue va ipaiwa he ndeci ava va va ipaya?

⁸ Poku va tundisa loku va tuma kupãla oco a liyaka lavo. Wa vopako lofela yaye ya tema keteke liofela yokutakelo.

⁹ Eci ovawe osi ovotala a nyanyoha ndocikela, leci ka kuli vali olongunji vi kola pamue ovotala insensu oco ekandu lia Yakoba li ecelua, kuenje epako liocili liokuimuiwa kuekandu liaye li molẽha.

¹⁰ Momo imbo lia malehisua li linga elunda li kamba omanu ndekalasoko; oko onãle yi lila, haiko yi pekela, kuenje yi lia ovisapa viaco.

¹¹ Eci ovianja viaco vi kukuta kuenje vi teka, oco akãi va vi tiaña, kuenje va vi siakãla, Omo omanu vaco ka va kuete olondunge, oco u wa va lulika ka va kuatela ohenda, kuenje u wa va sovola ka vamẽla.

¹² Keteke liaco Yehova o sasa otiliku yaye tunde kolui Ferati toke kolui lue Egito, kuenje vu nõlĩwa umue, umue, ene a va Isareli.

¹³ Kuenda vali keteke liaco olumbeta lunene lu sikiwa, kuenje ava va nyelelela vofeka ya Asuria lava va takumũhila ve Egito, va tiuka, va fendela Yehova komunda yi kola ko Yerusalãi.