ISAYA 26 - Embimbiliya - Bíblia Sagrada em Umbundu

¹ Keteke liaco ocisungo eci ci imbiwa vofeka ya Yuda, citi, Tu kasi limbo lia pama; Suku wa li pamisa lovimbaka kuenda ombindikiyo.

² Yululi olombundi oco vakuesunga haivo vakuekolelo va iñilemo.

³ Ove o tumalaisa lombembua yocili utima wu wa ku kolela, momo wa ku kolela.

⁴ Koleli Yehova oloneke viosi momo Yehova Suku eye Ewe li tumãla hũ.

⁵ Momo eye wa ketisa ava va kaile kilu. Wa ketisavo imbo liaco lia kemãlẽle. Wa li ketisa muẽle, wa li tuala posi, wa li kapa muẽle voneketela.

⁶ Olomãi violosuke vi li kosa kuenda ananga olohukui.

⁷ Onjila ya vakuesunga ya tapika. Ove muẽle o tapikisa onjila ya vakuesunga.

⁸ A Yehova, vonjila yolonetululo viove omo tua ku talamẽla. Ovitima vietu via livela onduko yove lovihandeleko viove.

⁹ Utima wange u ku livela uteke, haiwo u ku sandiliya otembo yosi. Momo eci olonetululo viove vi kasi kilu lieve, oco olonungi viovoluali vi lilongisa esunga.

¹⁰ Ndaño ondingaĩvi yi lingiwa ohenda, haimo ka yi lilongisa esunga; vofeka yesunga haimo yi lingainga cĩvi, kuenje ka yi mõli unene wa Yehova.

¹¹ A Yehova, eka liove lia tumuĩwa, ovo puãi ka va li lete. Va lekisa ombili yove yokomanu vove okuti va kutiwa osõi. Ondalu ya sokiyiwila ovanyali vove yi va lie.

¹² A Yehova, ove o tu sovuila ombembua. Ovopange etu osi ove wa tu a lingila.

¹³ A Yehova, a Suku yetu, vañala vakuavo va tu vialele; puãi onduko yove, oyo lika, tu sumbila.

¹⁴ Ovo va fa, ka va kala vali lomuenyo. Va kendiwa, ka va pinduka vali. Efulilo liaco liavo olio wa va nyolẽla hailio wa imuĩla onjivaluko yavo yosi.

¹⁵ Puãi ofeka wa yi luisa, a Yehova, ofeka wa yi luisa, love wa kemainyiwa: wamisako olongave viosi viofeka.

¹⁶ A Yehova, eci tua kala lohali oco tua ku sanda; tua lisiõsuĩla ekangiso eci wa kala loku tu yambula.

¹⁷ Ndeci ukãi we mina o leña leña loku liyula lolongembia viaye eci a kasi ocipepi loku cita, haico, a Yehova, tua kala kovaso ove.

¹⁸ Tue minĩle, tua kaile lolongembia, haimo tua cita ño ofela. Ka tua popelele ofeka, ka tua nenele olonungi vofeka.

¹⁹ Ava va fa va kala lomuenyo, ovivimbi viavo vi pinduka. Ava va kasi vayambo va pasuka, va imba lonjolela. Momo owume wove owume wocinyi, kuenje ove o u lokisa vayambo owelema.

²⁰ Amanu vange, enjui iñili volonjo viene, liyikilimo; wundi okasimbu toke onyeño yi tula.

²¹ Momo tala, Yehova o tunda kocitumãlo caye oku yambuila ava va tunga kilu lieve evĩho liavo; ongongo yi situlula osonde ya yi pesekela, kuenje ka yi sitika vali vayo va pondiwa.