ISAYA 25 - Embimbiliya - Bíblia Sagrada em Umbundu

¹ A Yehova, ove u Suku yange; hu kemainya; sivaya onduko yove; momo wa linga ovikomo. Ahala aco a sokiyiwile osimbu, hao a telisua lesunga liocili.

² Momo imbo wa li lingisa ondunda, imbo liombonge lia linga ekundu. Ocikolo cavakuakulituna ka ci lingi vali imbo, ka ci tungiwa vali.

³ Oco omanu va pama va ku muĩsa ulamba, limbo liomanu va linga usumba liu ku sumbila.

⁴ Momo wa linga ocikolo colosuke, haive vucikolo cu wa suka eci a kala lohali, haive vumbindikiyo yokehunguhungu, vundembo woku vindikiya owuya. Momo oku fuima kuava va linga usumba kua linga ndehunguhungu li punga ocimbaka,

⁵ Pamue ndowuya wovekango. Ove wimũla onjuela ya vakualofeka. Ndeci ulembo welende wimũla owuya haico ocisungo cava va linga usumba ci imuĩwa.

⁶ Vomunda yilo Yehova Ukualohoka o lingilamo olofeka viosi ofesta yovina via lẽla, ofesta yovinyu viale, yovina via lẽla haivio vie yuka upuma, ofesta yovinyu viale haivio via kenjiwa ciwa.

⁷ Kuenje vomunda yilo o nyolẽla ocisikĩlĩlo ca sikilĩla omanu vosi kuenda aluwavili a sikĩlĩla olofeka viosi.

⁸ O takisa olumue okufa, kuenje Ñala Yehova o puenya asuẽlẽla kovipala viosi; kuenda osõi yomanu vaye o yupa kilu lieve liosi; momo Yehova wa popia.

⁹ Keteke liaco ci popiwa citi, Tala, u eye Suku yetu, eye tua felevela okuti o tu popela. U, Yehova, eye tua imba ondunge. Tu sanjuki loku yolela okupopela kuaye.

¹⁰ Momo eka lia Yehova li kala komunda yilo, kuenje Moavi o kosiwila apa a kasi ndeci owangu u kosiwila vovava ovocunda.

¹¹ Kuenje o nyanyumuĩla ovoko aye vokati kaco ndeci u o liteva a nyanyumũila ovoko aye poku liteva; puãi Yehova imũla epela liaye kumue luloño wovaka aye.

¹² Kuenje ombonge yisõvi yovimbaka viaye o yi kupula loku yi kundula loku yimba posi, ndaño poneketela.